Pałacy biełaruskich miljanieraŭ — foty + kamientary architektara
Jakija katedžy pabudavali sabie samyja bahatyja biełarusy?
U adroźnieńnie ad svaich kaleh z susiednich krain, biełaruskija miljaniery nie vystaŭlajuć svajo žyćcio napakaz. Što nosiać, na čym jeździać, dzie žyvuć? Zrazumieła ž, što nie ŭ adnapakajoŭcy ŭ spalnym rajonie…
Karespandenty «Našaj Nivy» abjechali katedžavyja pasiołki vakoł Minska i sfatahrafavali damy samych paśpiachovych biznesmenaŭ.
My paprasili architektara Alaksandru Bajarynu acanić ich vyhlad z prafiesijnaha punktu hledžańnia. «Za vyniatkam niekalkich katedžaŭ, pierad nami ŭzory architektury nizkich estetyčnych jakaściaŭ. Hety šerah stvaraje niejki dziŭny efiekt, — kaža jana. — Najnoŭšyja technałohii, płaniroŭka padvyšanaj kamfortnaści, šykoŭny interjer… A sam dom — zusim zvyčajny, patrapany časam, tanny na vyhlad, niepryjemny. Nonsens!»
Architektar pahadziłasia prakamientavać kožny z katedžaŭ — jahonyja mocnyja i słabyja baki.
Sprabavali źviarnucca i da ryełtaraŭ, kab tyja nazvali pryblizny košt zbudavańniaŭ. Adnak adrazu ŭ niekalkich ahienctvach nieruchomaści pačuli admovu. «Ja ŭ vašaj pijar-akcyi ŭdzielničać nie budu! — patłumačyŭ svaju pazicyju dyrektar adnaho ź ich. — Da ludziej na zaŭtra pryjduć z departamienta finansavych rasśledavańniaŭ i z adździeła pa baraćbie z ekanamičnaj złačynnaściu. Tym bolš ich katedžy rehistrujucca na trecich asobaŭ, vy ničoha nie dakažacie».
Nasamreč biełaruskija miljaniery nie takija saramlivyja. Nieruchomaść jany najčaściej zapisvajuć na siabie ci žonak. Infarmacyja pra ŭłaśnikaŭ elitnych katedžaŭ atrymanaja lehalna, z adkrytych krynic.
Juryj Čyž
1963 (1 miesca ŭ rejtynhu samych upłyvovych i paśpiachovych biznesmenaŭ Biełarusi 2013)
Samy bahaty biełarus pabudavaŭ dom u Drazdach, pobač ź ministrami, sudździami i prakurorami i niepadaloku ad žyłoj rezidencyi Alaksandra Łukašenki. Heta cahlany dvuchpaviarchovik z padvałam i terasami. Na terytoryi ŭčastka jość navat valjery.
«Kłasičny prajekt vartaha architektara, ničoha lišniaha, usio na svaich miescach: fasady praparcyjnyja, elemienty fasada pryviazanyja biez pamyłak, ciomnyja škłopakiety, dastatkovaje navisańnie dachu… Pamier architekturnaha abjomu i ščylnaść architekturnych elemientaŭ harmanujuć, što śviedčyć ab razumnym padychodzie zakazčyka da pracesu prajektavańnia i pra jaho davier prafiesijanałam. Heta paćviardžaje i aharodža ŭčastka, materyjał i rašeńnie jakoj maksimalna darečy i pryviazany da prajekta doma. Minusy — niesimietryčnaje rašeńnie, skatny kazyrok nad uvachodam, što nie charakterna dla kłasiki, i ŭsiotki zanadta «viaskovy» dla kłasičnaha katedža płot», — miarkuje Alaksandra Bajaryna.
Alaksandr Šakucin
1959 (2 miesca)
Dom staršyni rady dyrektaraŭ «Amkadora» my znajšli ŭ Baraŭlanach. Jahony błokavy dvuchpaviarchovik z padvałam, mansardaj i niekalkimi terasami ničym nie vyłučajecca siarod susiednich katedžaŭ.
«Dom, pra sustreču ź jakim chočacca zabycca. Dziŭna, ale tut jak vypadkovyja elemienty, tak i nie vypadkovyja hladziacca adnolkava ahidna. Heta ŭsio prosta elemientarna niepryhoža!» — nie chavaje emocyj ekśpiert.
Vital Arbuzaŭ
1966 (3 miesca)
Imia Arbuzava mała što kaža biełarusam. Ułaśnik hrupy kampanij Fenox viadzie biznes za miažoj, adnak maje zavody i ŭ našaj krainie.
Jahonaja rezidencyja ŭ Marjalivie (łahojski kirunak) — draŭlany ciomnazialony dom za vysokim płotam, taksama draŭlanym.
«Dobraja sproba stvaryć sučasny, modny dom, adnak formaŭtvareńnie pa sastarełych pryncypach hetuju sprobu adrazu ž pryraŭniała da nula. Bolš padobna da łaźni ci haściavoha domika», — miarkuje Alaksandra Bajaryna.
Pavieł Tapuzidzis
1956 (4 miesca)
Ułaśnik «Tytuń-Inviesta» i hipiermarkietaŭ «Karona» maje dva katedžy. U pieršym, u Drazdach, praciahvajecca ramont. Bolš pradstaŭničy dom Tapuzidzis pabudavaŭ u Ratamcy na bierazie Minskaha mora, na ŭskrajku svajho ž «Robinsan Kłaba».
«Takija katedžy nazyvajucca «Davajcie zrobim ścipła i z hustam». Na biudžet heta, jak praviła, nie ŭpłyvaje. Budynak dobra pasadžany ŭ płoskaści, adnak detali abjomu daloka nie idealnyja. Namiok na styl «kantry», dobraŭparadkavańnie z kłasiki, zielanina ŭschodniaja — pa elemientach dobra, a razam — nie zrazumieła što», — vynosić svoj vierdykt architektarka.
Uładzimir Piefcijeŭ
1957 (12 miesca; 1 miesca ŭ rejtynhach 2009 i 2011 hadoŭ)
Handlar zbrojaj Uładzimir Piefcijeŭ buduje siadzibu ŭ Raŭbičach (łahojski kirunak). Heta faktyčna dva budynki, kožny pa čatyry pavierchi. Ich ahulnaja płošča pieravyšaje 1700 m2!
«Vydatny žyły dom, z apłombam i zapałam! Heta padkuplaje. Pasyły hledača da kanstruktyvizmu i minimalizmu pry ŭsioj svajoj biazładnaści tym nie mienš dazvalajuć adnieści budynak da sučasnaj internacyjanalnaj architektury. Fasadnyja materyjały — śviata dla architektara siońnia. Prajektavać takija damy z takim biudžetam — heta mienavita toje, dla čaho my vučylisia na architektury! — radujecca Alaksandra Bajaryna. — Adno tolki nie zrazumieła, što ŭ dvary hetaha katedža robić łaźnia / haściavy domik z sałamianym dacham!»
Uładzimir Aleksandrovič
1957 (17 miesca)
Były deputat pałaty pradstaŭnikoŭ, dyrektar budaŭničaj kampanii «IteraBieł» pasialiŭsia za Nacyjanalnaj biblijatekaj. Na jahonym učastku dva damy — draŭlany i cahlany.
«Škada, što tradycyja farmavać vulicu fasadami žyłych damoŭ u nas stračana. Ciapier kožny chavajecca, jak moža. Moža być, heta ścipłaść? Abo žadańnie być i žyć «nievidzimkaj»? — razvažaje architektar. — Rašeńnie bałkona, dachu, pryviazka mansardnych voknaŭ i adlehłaść ad voknaŭ vierchnich pavierchaŭ da dachu dajuć zrazumieć, što nie ŭsio było hładka ŭ pracesie pabudovy. Budynak eklektyčny i dosyć pasredny».
Aleh Chusajenaŭ
1964 (22 miesca; 2 miesca ŭ rejtynhu 2008)
Trochpaviarchovik na Cniancy (poŭnač Minska) naležyć žoncy i synu saŭłaśnika aŭtamabilnaha chołdynha «Atłant—M». Ciapier Chusajenaŭ zachapiŭsia stvareńniem pieršaha biełaruskaha fondu pramych inviestycyj «Zubr Kapitał».
«Katedž z šerahu tych «pierachodnych», na jakich my, architektary, vučylisia. Źjaviłasia mahčymaść zrabić niešta cikavaje, biudžet dastatkovy dla ŭvasableńnia, ale abodva ŭdzielniki, architektar i zakazčyk, jašče tolki robiać svaje pieršyja kroki. Zakazčyk vučycca daviarać śpiecyjalistu, architektar sprabuje ŭvasobić svaju zadumu, nie padazrajučy, što ŭ stykach i vuzłach atrymaje adny sucelnyja «kasiaki». Siońnia takoje ŭžo nichto nie voźmiecca ni zamović, ni zaprajektavać», — padsumoŭvaje Alaksandra Bajaryna.
Viktar Šaŭcoŭ
1963 (30 miesca; 8 miesca ŭ rejtynhu 2009)
Pravasłaŭnamu miecenatu Viktaru Šaŭcovu ŭdałosia vyjści na volu paśla pieryjadu apały i viarnucca ŭ Drazdy. Kryminalnaja sprava suprać ułaśnika «Biełzamiežbuda» i «Trastbanka» spynienaja.
«Prajektavali kłasiku — atrymali eklektyku, pryčym eklektyku z pamyłkami: zanadta maleńkija vokny dla takoha abjomu, rustoŭka niedarečnych pamieraŭ, usie elemienty fasada jak byccam ŭziatyja ź inšaha, maleńkaha damka, vynas elemientaŭ niedastatkovy, malunki aharodžy ź inšaj pieśni, arka zanadta spadzistaja — pierad nami «samabud» z płoskimi, dziciačymi «nalepkami», — razvažaje architektar.
Viktar Piatrovič
1964 (42 miesca; 6 miesca ŭ rejtynhu 2011)
Kampańjon Paŭła Tapuzidzisa žyvie ŭ centry Minska, zusim pobač sa svajoj «Karonaj», faktyčna pasiarod parkoŭki. «Niama słoŭ, heta prosta strašny son architektara», — padsumoŭvaje Alaksandra Bajaryna.
Kamientary