Deputaty pałaty pradstaŭnikoŭ 12 śniežnia pryniali ŭ pieršym čytańni zakonaprajekt, jaki ŭvodzić dziaržaŭnuju pošlinu za vydaču dazvołu na dopusk transpartnaha srodku da ŭdziełu ŭ darožnym ruchu.
Jak zaznačyŭ ministr finansaŭ Andrej Charkaviec, «niahledziačy na palarnaść mierkavańniaŭ nakont uviadzieńnia pošliny, varta pryznać, što jana šyroka prymianiajecca ŭ śviecie». Pavodle jaho słoŭ, pošlina budzie bracca z usich uładalnikaŭ transpartnych srodkaŭ, jak fizičnych, hetak i jurydyčnych asob. Ilhoty pry źbirańni pošliny zakranuć tolki śpiecyjalnyja transpartnyja srodki dla invalidaŭ, MNS, chutkaj dapamohi i hramadskaha transpartu.
Vieličynia pošliny budzie dyfierencyjavanaja ŭ zaležnaści ad vidu i masy transpartnaha srodku.
Jaje pamier składzie ad 3 da 25 bazavych vieličyniaŭ, u tym liku dla fizičnych asob na lehkavyja aŭtamabili — ad 3 da 10 bazavych vieličyniaŭ.
Praduhledžana samastojnaja vypłata pošliny da momantu prachodžańnia techahladu.
Jak paviedamiŭ Charkaviec, zapłanavanyja dachody ad źbirańnia pošliny składuć 1,6 trłn. rubloŭ. Hetyja srodki buduć raźmierkavanyja paroŭnu pamiž respublikanskim i miascovym biudžetami i nakiravany na ramont i budaŭnictva aŭtadaroh.
Zakonaprajekt «Ab uniasieńni źmianieńniaŭ i dapaŭnieńniaŭ u niekatoryja zakony Respubliki Biełaruś pa pytańniach pradprymalnickaj dziejnaści, padatkaabkładańnia i administracyjnaj adkaznaści» taksama praduhledžvaje:
- zachavańnie dziejnych stavak padatkaŭ na dadadzieny košt i prybytak;
- admienu lhoty pa PDK pry akazańni pasłuh paštovaj suviazi;
- zamienu amartyzacyjnaj premii inviestycyjnym vylikam pry naličeńni padatku na prybytak;
- uviadzieńnie asabovaha paradku padatkaabkładańnia ŭ vyhladzie adzinaha padatku na pastaŭleny ŭ abaviazak dachod dla mikraarhanizacyj, jakija ažyćciaŭlajuć dziejnaść pa akazańni pasłuh pa techničnym absłuhoŭvańni i ramoncie aŭtatranspartnych srodkaŭ;
- ustanaŭleńnie administracyjnaj adkaznaści za niesvoječasovuju rehistracyju transpartnaha srodku, a taksama niepadavańnie transpartnaha srodku dla dziaržaŭnaha techničnaha ahladu ci kiravańnie transpartnym srodkam, jaki nie prajšoŭ techahlad.
Ciapier čytajuć
Pahražaŭ vajskoŭcam raskryć, chto ź ich homaseksuał, kab vypytać sakrety i pradać Ukrainie. Voś za što adyjozny funkcyjanier BRSM atrymaŭ 17 hadoŭ kałonii2
Kamientary