Kitajcy zmahajucca suprać RSS

Pakul biełaruskija ŭłady vyvučajuć dośvied inšych krainaŭ pa rehulavańni internet‑prastory, kitajskija ŭłady palapšajuć techničnuju funkcyjanalnaść takoha «rehulavańnia». Ale navat «Vialikamu kitajskamu fajervołu» heta nie zaŭždy ŭdajecca. Chitryja kitajcy, jakija prahnuć infarmacyi, znachodziać roznyja šlachi dla abychodu filtraŭ. Adzin z takich šlachoŭ daje technalohija RSS.

Tysiačy sajtaŭ naŭprost nie adčyniajucca z terytoryi Kitaju. Taki stan padtrymlivajecca praz techničnyja mechanizmy, na jakija ŭłady vydatkoŭvajuć dziasiatki miljonaŭ dalaraŭ. A taksama praz pracu tysiačaŭ kiber‑palicejskich, jakija štodnia zajmajucca manitorynham Sieciva ŭ pošukach apazycyjnych vykazvańniaŭ.

Ale ŭ Internecie raźvivajecca mnostva technalohijaŭ, za jakimi navat samyja prasunutyja čynoŭniki i palicejskija nie paśpiavajuć. Tak, daloka nia novaja technalohija RSS stvaraje niebiaśpieku dla prafiltravanaha internetu.

RSS — heta technalohija, jakaja dazvalaje sačyć za abnaŭleńniami roznych sajtaŭ, nie zachodziačy na ich. Litaralna RSS — heta anhielski skarot, jaki ŭžyvajecca dla aznačeńnia papularnaj siamji farmataŭ admysłovaha XML‑standartu, što vykarystoŭvajucca dla raspaŭsiudu i pieradrukoŭki infarmacyi ŭ internecie.

Dla čytańnia RSS‑stužak sajtaŭ vykarystoŭvajuć admysłovyja prahramy albo ŭbudavanyja ŭ sučasnyja braŭzery mechanizmy. U hetym vypadku adbyvajecca zvarot prahramy da staronki sajtu z stužkaj RSS i apracoŭka atrymanaj infarmacyi. U vypadku blakavańnia sajta dostup atrymlivajecca niemahčymym.

Druhi sposab — heta vykarystańnie veb‑ahrehataraŭ. Adnym z najlepšych siarod ich źjaŭlajecca Google Reader. Dla taho, kab karystacca im, nieabchodna zavieści paštovuju skrynku ŭ Gmail.

U hetym vypadku adzin sajt, u dadzienym vypadku Google, rehularna źviartajecca na inšy i zahružaje da siabie jaho kantent u farmacie RSS. Kali veb‑ahrehatar nie ŭklučany ŭ śpis zabaronienych sajtaŭ, to praź jaho źjaŭlajecca mahčymaść čytać stužki lubych zabaronienych sajtaŭ.

Kolkaść veb‑ahrehataraŭ u Siecivie ahromnistaja. Začynić dostup da ich usich vielmi składanaja faktyčna nierealnaja zadača.

Ale kitajskija čynoŭniki sprabujuć. U Siecivie pačali źjaŭlacca paviedamleńni, što «Vialiki kitajski fajervoł» pačaŭ blakavać on‑łajn čytalniki RSS‑stužak. Niekatoryja vydańni navat pišuć, što z terytoryi Kitaju nie adčyniajucca ŭsie staronki, u adrasach jakich sustrakajucca słovy «feeds» «rss» i «blog».

Ale pad hetymi paviedamleńniami źjaŭlajucca kamentary kitajcaŭ, jakija svabodna čytajuć zabaronienyja RSS praz Google Reader.

Jura Sidun, generation.by

• 0
• 0
• 0
• 0
• 0
• 0
• 0
• 0