Na tarhach pradadzieny pieršy aŭtamabil, kanfiskavany ŭ kiroŭcy-paŭtornika

30 studzienia na aŭkcyjonie ŭ handlovym domie «Uschodni» pradadzieny pieršy aŭtamabil, kanfiskavany ŭ vadziciela, dvojčy za hod zatrymanaha p`ianym za rulom.

«Fijat Ściła» 2002 hoda, dyzielny, z ab`iomam ruchavika 1,9 ł, byŭ vystaŭleny na prodaž pa canie krychu bolš čym 28 młn. rubloŭ. Tarhi pačalisia z 29,5 młn. rubloŭ.

U vyniku aŭtamašynu nabyŭ minčanin za 46 młn. rubloŭ.

13 listapada 2013 hoda sud Pieršamajskaha rajona Minska pryniaŭ rašeńnie ab kanfiskacyi aŭtamabila ŭ 28-hadovaha vadziciela za vadžeńnie ŭ stanie ałkaholnaha ap`ianieńnia. Heta byŭ pieršy vypadak prymianieńnia art. 317-1 KK paśla ŭvachodžańnia ŭ siłu papravak, jakija ŭzmacniajuć adkaznaść za kiravańnie aŭtamabilem u stanie ałkaholnaha ap`ianieńnia. 

Vadziciel «Fijata» byŭ spynieny na MKAD 27 kastryčnika. Paśla ahladu ŭ kryvi vadziciela vyjaŭlena 1 pramile ałkaholu. 14 kastryčnika 2013 hoda jon užo zatrymlivaŭsia za kiravańnie aŭtamabilem u stanie ałkaholnaha ap`ianieńnia. Tady jon byŭ aštrafavany i pazbaŭleny prava kiravańnia transpartnym srodkam. 

13 listapada ŭ budynku ADAI Pieršamajskaha rajona Minska adbyłosia vyjaznoje sudovaje pasiadžeńnie pa hetaj spravie. Varta adznačyć, što padsudny poŭnaściu pryznaŭ svaju vinu, što było ŭličana sudom pry vyniasieńni pryhavoru. Asudžanamu było pryznačana pakarańnie ŭ vyhladzie 18 miesiacaŭ papraŭčych rabot z utrymańniem 20% dachadu ŭ biudžet, štrafu ŭ pamiery 300 bazavych vieličyń (39 młn. rubloŭ), pazbaŭleńnia pravoŭ na 3 hady, a taksama kanfiskacyi aŭtamabila «Fijat», za rulom jakoha znachodziŭsia abvinavačany. 

Aŭtamabil, na jakim było ŭčyniena złačynstva, zarehistravany na inšuju asobu.

4 śniežnia ŭ prysutnaści žurnalistaŭ sudovyja vykanaŭcy suda Pieršamajskaha rajona Minska kanfiskavali «Fijat Ściła» sa štraf-stajanki ŭ rajonie Uručča. Pracedura kanfiskacyi mašyny sa štrafstajanki ŭklučała jaje vopis, pahruzku na evakuatar. «Fijat» byŭ adpraŭleny na skład časovaha zachoŭvańnia. Zatym jaho pavinna była acanić kamisija pa pracy z majomaściu pry administracyi Pieršamajskaha rajona i vystavić na tarhi praz HD «Uschodni».

Papraŭki ŭ zakanadaŭstva, jakija ŭzmacniajuć adkaznaść za kiravańnie aŭtamabilem u stanie ałkaholnaha ap`ianieńnia, nabyli moc 24 kastryčnika. Za paŭtornaje na praciahu hoda vadžeńnie ŭ niećviarozym stanie ciapier praduhledžana śpiecyjalnaja kanfiskacyja transpartnaha srodku niezaležna ad taho, naležyć jon vadzicielu ci nie. 

Uzmocniena adkaznaść za jazdu ŭ niećviarozym stanie — štraf ciapier składzie da 100 bazavych vieličyń. Art. 317 KK (parušeńnie praviłaŭ darožnaha ruchu abo ekspłuatacyi transpartnych srodkaŭ) praduhledžvaje pry ŭčynieńni DTZ u stanie ałkaholnaha ap`ianieńnia, što paciahnuła śmierć čałavieka abo pryčynieńnie ciažkaha cialesnaha paškodžańnia, pazbaŭleńnie voli na termin da 7 hadoŭ, śmierć dźviuch i bolš asob — pazbaŭleńnie voli na termin ad 5 da 10 hadoŭ.

• 0
• 0
• 0
• 0
• 0
• 0
• 0
• 0