Siońnia lidar Abjadnanaj hramadzianskaj partyi Anatol Labiedźka pravioŭ terminovuju pres-kanfierencyju. Padstavaj stali pretenzii da partyi z boku Ministerstva justycyi.
U liście ź Miniusta na adras AHP śćviardžałasia, što niekatoryja aktyvisty partyi parušyli zakon ab praviadzieńni masavych mierapryjemstvaŭ, arhanizavaŭšy akcyi, što nie adnosilisia da vybaraŭ miascovych deputataŭ.
AHP adkazała, što nie prymała rašeńni ab praviadzieńni masavych mierapryjemstvaŭ, adnak ŭ liście ad 1 krasavika Miniust abvinavaciŭ partyju ŭ parušeńni paradku arhanizacyi masavych mierapryjemstvaŭ. U liście paviedamlajecca, što «palityčnaja partyja moža być likvidavana pavodle rašeńnia Viarchoŭnaha Suda za adnarazovaje parušeńnie zakanadaŭstva ab masavych mierapryjemctvach».
Labiedźka rascaniŭ hety list jak vyniasieńnie papiaredžańnia de-fakta.
«Ja vymušany zajavić: toje, što adbyvajecca ŭ adnosinach da AHP z pačatku hetaha hoda, my kvalifikujem nie inakš jak śpiecapieracyju, nakiravanuju na stvareńnie pieraškodaŭ u dasiahnieńni metaŭ našaj dziejnaści. A apošnim časam u adras AHP prahučali i pahrozy ab likvidacyi partyi.
Upieršyniu za 20 hadoŭ režymu Łukašenki my sutyknulisia z tym, što aficyjna zarehistravanych kandydataŭ i ich davieranych asobaŭ nie prosta brutalna zatrymlivajuć, a prapuskajuć praz administratyŭnyja pracesy i kidajuć za kraty.
Pa-druhoje, my bačym, što takija dziejańni byli nakiravany vyklučna suprać AHP. Ja mahu spasłacca na namieśnika načalnika RUUS Savieckaha rajona, jaki adkryta mnie zajaviŭ: «Vam što, bolš za ŭsich treba»? A zatym jon pieraličyŭ temy, jakija nie vyklikajuć pytańniaŭ.
Heta značyć, što ŭ vinu AHP pastavili pasłańnie, ź jakim partyja pajšła da vybarcaŭ, to bok patrabavańnie sumlennych i svabodnych vybaraŭ. Niama sumlennych i svabodnych vybaraŭ — niama pieramienaŭ, niama pieramienaŭ — niama raźvićcia.
Nam jasna dali zrazumieć, što nieprymalnymi źjaŭlajucca tema piersony Alaksandra Łukašenki, u źviazku ź joj tema karupcyi, tema ŭkrainskaha Majdanu — toje, da čaho moža davieści ekanamičnaja i sacyjalnaja situacyja i ŭ Biełarusi. Nieprymalnymi jość tema ČS pa chakiei, palitviaźniaŭ i skradzienych biełaruskich palitykaŭ».
Labiedźka skazaŭ, što za ŭsim hetym staić «arhanizatar usich vybarčych kampanij u Biełarusi — KDB». U jakaści paćviardžeńnia hetaha palityk pryhadaŭ, što 24 sakavika Łukašenka sa spravazdačaj ab vynikach vybaraŭ deputatach miascovych savietaŭ pryniaŭ mienavita staršyniu KDB.
«A jašče kaliści načalnik KDB Sucharenka zajaviŭ, što heta «my pieramahli na vybarach». Heta nonsiens», — padkreśliŭ Labiedźka.
Taksama Labiedźka zasiarodziŭ uvahu na słovach Jarmošynaj pra toje, što miascovyja vybary byli «repietycyjaj prezidenckich».
Labiedźka dadaŭ, što ŭ śviatle vyšejnazvanych akaličnaściaŭ AHP u čaćvier 10 krasavika praviadzie palityčnuju radu, na jakoj budzie razhladacca pytańnie ab praviadzieńni čarhovaha źjezda, a taksama ab stratehii dziejnaści partyi ŭ vypadku pazbaŭleńnia jurydyčnaj rehistracyi.
«My stavilisia da miascovych vybaraŭ jak da lohkaj prahułki.
Adnak bačycie, čym jana zakončyłasia dla nas, tamu ciapier usio surjozna. Kali jany ličać, što pazbaviŭšy nas jurydyčnaha statusu, jany asłablajuć našu palityčnuju strukturu, to heta vialikaja palitčnaja pamyłka», — skazaŭ Labiedźka.
Što cikava, pramaŭlaŭ tolki lidar AHP, žurnalisty nie zadali nivodnaha pytańnia.
Ciapier čytajuć
U Poznani hiniekołah vydaliŭ 24‑hadovaj biełaruscy matku i jaječniki bieź jaje zhody. Jamu pahražaje da 20 hadoŭ turmy21
Kamientary