Siamja novaha prezidenta Ukrainy

Apošnija čatyry hady va Ukrainy nie było pieršaj łedzi. Papiaredni prezident Viktar Janukovič nie źjaŭlaŭsia sa svajoj aficyjnaje žonkaj Ludmiłaj na publičnych mierapryjemstvach, nie brali jaje ŭ aficyjnyja zamiežnyja pajezdki. Žonka prezidenta žyła ŭ Daniecku, sama kuplała pradukty ŭ supiermarkiecie, dzie jaje nie raz sustrakali miascovyja žurnalisty. Intryha raskryłasia paśla ŭciokaŭ Janukoviča ź Miežyhorja — damaj serca eks-prezidenta była dyrektar dabračynnaha fondu «Daroha majbutńoho» Luboŭ Palažaj.

Žonka bieź piaci chvilin prezidenta Piatra Parašenki Maryna praktyčna na ŭsich mierapryjemstvach supravadžaje svajho muža.

«Ja vielmi, prosta pa-varjacku kachaju svaju žonku Marynu. My ažanilisia, kali mnie było 18 hadoŭ. Ja tady pryjšoŭ da mamy i paviedamiŭ, što ažaniusia. Jana skazała: «Boža moj, što ž ty robiš», — hetuju siamiejnuju historyju Parašenki čuli praktyčna ŭsie patencyjnyja vybarščyki padčas jaho pieradvybarčaha tura.

Žonka Maryna Parašenka, 52 hady

Parašenka paznajomiŭsia sa svajoj budučaj žonkaj na studenckaj dyskatecy. Jon — kandydat u majstry sportu pa dziudo, student Kijeŭskaha dziaržaŭnaha ŭniviersiteta. Jana — na try hady starejšaja za jaho, studentka miedycynskaha instytuta, urač-kardyjołah, dačka namieśnika ministra achovy zdaroŭja USSR. Sustrakalisia hod, paśla čaho ažanilisia. Maryna naradziła syna Alaksieja, abaraniła kandydackuju dysiertacyju i vyrašyła pryśviacić žyćcio nie miedycynie, a siamji.

Siabry siamji kažuć, što Maryna vielmi chatniaja, umieje šyć, vyšyvać, viazać i vydatna hatuje.

Žonka Parašenki zajmajecca vychavańniem dziaciej, nikoli nie krytykuje muža. Jana časta supravadžaje jaho na roznych mierapryjemstvach, addaje pieravahu stajać krychu za śpinaj muža, z presaj maje znosiny redka.

Uletku siamja Parašenki jeździć adpačyvać na mora, kaladny adpačynak pravodziać u harach na łyžach.

U siamji isnuje praviła: doma — ni słova pra palityku.

Dzieci: Alaksiej Parašenka, 29 hadoŭ

Deputat Vińnickaha abłasnoha savieta ad frakcyi «Radzima». Pracuje namieśnikam hienieralnaha dyrektara pa źniešnieekanamičnaj dziejnaści charčovaj kampanii «Padolle», jakaja ŭvachodzić u skład kancerna «Ukrprominviest». Hety kancern uznačalvaje jaho dziadula — Alaksiej Parašenka, taksama deputat Vińnickaha abłasnoha savieta.

Zachaplajecca tenisam, muzykaj, fiłasofijaj.

U vieraśni minułaha hoda Alaksiej ažaniŭsia sa svajoj adnahodkaj Julijaj Alichanavaj. Niaviestka Parašenki vučyłasia ŭ mižnarodnaj biznes-škole ŭ Francyi, pracavała ŭ Gieneral Electric, PricewaterhouseCoopers i kansałtynhavaj firmie McKinsey & Company. Alaksiej i Julija rychtujucca stać baćkami.

Jaŭhienija i Alaksandra — 14 hadoŭ, Michaił — 13 hadoŭ

Dočki zajmajucca ŭ baletnaj škole i ŭ muzyčnaj pa kłasie «fartepijana». Michaił taksama hraje na fartepijana, zachaplajecca płavańniem i himnastykaj.

U 2012 hodzie dočki Parašenki i jaho małodšy syn Michaił arhanizavali dabračynny kancert pa zbory srodkaŭ dla vyratavańnia lebiedziaŭ, jakija hinuli ad marazoŭ na Dniastry. Muzyka dziaciej budučaha prezidenta sabrała 6070 hryŭniaŭ.

Chrosnyja baćki Jaŭhienii i Alaksandry — Viktar Juščanka i Aksana Biłazir.

• 0
• 0
• 0
• 0
• 0
• 0
• 0
• 0