13 červienia pasolstva Vialikabrytanii ŭ Minsku spyniaje pryjom dakumientaŭ na vizy
Vizavy adździeł pasolstva Vialikabrytanii ŭ Minsku 13 červienia 2014 hoda spyniaje pryjom dakumientaŭ na vizy.
Jak paviedamlaje pres-słužba pasolstva, heta źviazana ź finalnaj pieradačaj paŭnamoctvaŭ pa pryjomie dakumientaŭ na vizy kampanii «Telepierformans Limited».
30 vieraśnia 2013 hoda departamient pa vizach i imihracyjnych pytańniach MUS Vialikabrytanii (UKVI) abjaviŭ ab tym, što ŭ jakaści kamiercyjnych partnioraŭ pa akazańni pasłuh u vizavych centrach pa ŭsim śviecie byli vybrany kampanii «VFS Hłobał» (VFS Global) i «Telepierformans Limited» (Teleperformance Ltd).
Jak adznačajecca ŭ paviedamleńni, pieradača adkaznaści za pryjom zajaŭ na vizy Vialikabrytanii ŭ Biełarusi Vizavamu centru pavinna była adbycca da 1 krasavika 2014 hoda. «Niahledziačy na zatrymki ŭ arhanizacyi pracesu pryjomu zajaŭ u novym Vizavym centry ŭ Minsku, paŭnamoctvy pa pryniaćci rašeńniaŭ ab vydačy viz byli pieradadzieny vizavamu adździełu pasolstva Vialikabrytanii ŭ Maskvie daterminova. Tamu praces pierachodu na novy kantrakt budzie zavieršany da 18 červienia 2014 hoda», — adznačaje pres-słužba.
Z 18 červienia 2014 hoda kampanija «Telepierformans Limited» raspačynaje kiravać dziejnaściu Vizavaha centra ŭ Minsku. Da adkryćcia pastajannaha ofisa Vizavy centr budzie časova raźmiaščacca ŭ Minsku ŭ budynku haścinicy «Prezident-Hatel» pa vuł. Kirava, 18,
i budzie adkryty dla padačy dakumientaŭ na vizu pa papiarednim zapisie z 09.00 da 15.00 z paniadziełka pa čaćvier i z 11.30 da 15.00 u piatnicu (akramia dziaržaŭnych śviataŭ). Pieršapačatkova «Telepierformans Limited» nie budzie prapanoŭvać poŭny kompleks dadatkovych pasłuh, takich jak pryjarytetny razhlad zajavy, adznačajecca ŭ paviedamleńni.
Klijenty, jakija padaduć dakumienty da 18 červienia, zmohuć zabrać svaje pašparty ŭ vizavym adździele pasolstva Vialikabrytanii ŭ Minsku da 27 červienia 2014 hoda, ale tolki paśla taho, jak atrymajuć paviedamleńnie ab tym, što ich zajava była apracavanaja i dakumienty hatovy. Tyja klijenty, čyje zajavy nie buduć apracavanyja da 27 červienia, atrymajuć dadatkovaje paviedamleńnie ab tym, dzie i kali jany zmohuć zabrać svaje dakumienty.
«UKVI imkniecca zabiaśpiečyć mahčymaść braniravańnia času i daty padačy dakumientaŭ u Vizavym centry na praciahu piaci pracoŭnych dzion z momantu rehistracyi ankiety.
Razhlad standartnych vizavych zvarotaŭ budzie zajmać nie bolš čym 15 pracoŭnych dzion, a vizavych zvarotaŭ, źviazanych ź pierajezdam na pastajannaje miesca žycharstva, nie bolš čym try miesiacy», — havorycca ŭ paviedamleńni.
Dadatkovuju infarmacyju možna atrymać na sajcie Vizavaha centra ŭ Minsku www.ge2by.tpcontact.co.uk, a taksama na staroncy pasolstva Vialikabrytanii ŭ Biełarusi www.gov.uk/world/belarus.
Kamientary