Jak patryjatyčna sustreć kaniec śvietu

Naviny ź piačory pad Pienzaj, dzie zamuravalisia čakajučyja kanca śvietu biełaruskija siektanty, padmyvajuć na cikavyja rozdumy.

Uraziła toje, što viera siektantaŭ ŭ chutki kaniec śvietu absalutna nie padryvaje ich davier da rodnaha režymu, jaki idejna byccam budujecca na dialektyčnym pryncypie: u 2001 hodzie siaredni zarobak budzie – 120 baksaŭ, u 2005h – 134 baksaŭ i h.d. Na dniach zamurovanyja zajavili, što nie hladziačy na zaskok z apakalipsisam, lubiać baćku i navat, kali jon asabista paprosić, kinuć zajmacca fihnioj.

Takoha nie pa-dzieckaha prajavu łajalnaści da stroju nikoli nie naziraŭ. Padumaŭ, što tema eschatałohii moža być ŭpisana ŭ pastułaty dziaržaŭnaj idieałohii.

Čamu nie?

Ujavicie siabie, što zaŭtra na zborach supracoŭnikaŭ administracyi lider abviaščaje, što 3 lipienia ŭ nas budzie nie tradycyjnyja parad i pavalnaja buchałava pad na Kastryčnickaj, a poŭny kirdyk. Viertykali i pracoŭnym kalektyvam dajucca instrukcyi - padrychtavacca da adkaznaha mierapryjemstva i adrapartavać. Pravodzicca sielektarka, pad čas jakoj Jon ŭstaŭlaje piston adstajuščym: “Ja paŭtaraju, što kiraŭniki rajonaŭ, jakija 3 lipienia nie adpraviacca na toj śviet buduć mieć vielmi žorstki razhavor. Ja navat nie vyklučaju adstaŭku ŭradu”.

Navina pra kaniec śvietu budzie mieć akijan pazityŭnych nastupstvaŭ.

Pa-pieršaje vyrašajecca prablema mižnarodnaha admoŭnaha salda. Napiaredadni kanca śvietu - hetak miesiaca za try, ludzi pačnuć pradavać zatanna svaju majomaść i pažytki - tańniej navat za kitajski šyrpatreb. Pakolki ŭ krainie ŭsio buduć nastrojeny na chutki kajuk, uvieś tavar pojdzie na ekspart, jaki budzie pieravyšać abjomy patoku impartu.

Pa – druhoje aŭtamatyčna razrulivajecca žyllovaje pytańnie. Ludzi pierabirajucca žyć u ziamlanki i inšyja nory, dzie kvadratny mietr amal ničoha nie kaštuje. Možna śmieła rapartavać, što prablema budaŭnictva sacyjalnaha žyćcia vyrašana. Darečy deficytu ciemientu taksama.

Narešcie prablema dziaržaŭnych subsidyj na kamunałku. Pakolki ludzi čakajuć finał epochi, žyvuć na ŭsim hatovym – bieź śvietu, biez haračaj vady, biez kanalizacyi, datacyj možna nie davać.

Naturalna nakont kanca śvietu možna abłamacca. Ale heta daść nahodu pravieści čarhovaje pasiedžańnie i paviesić usich foksteŕjeraŭ na Sidorskaha i kampaniju. Apošnija pryznajucca, što niešta nabłytali z dataj. Kapiec śvietu pieranosicca na dzień Ch . Fraza - “Ja paŭtaraju, što kiraŭniki rajonaŭ, jakija ŭ dzień Ch nie adpraviacca na toj śviet buduć mieć vielmi žorstki razhavor. Ja navat nie vyklučaju adstaŭku ŭradu” abaviazkovaja.

Darečy, kaniec śvietu – dobraja nahoda zaprasić naziralnikaŭ z kamandy Rušajła i rasiejskich žurnaluh. Heta budzie sadziejničać pašyreńniu praŭdzivaj infarmacyi siarod susiedziaŭ ab sapraŭdnaj sacyjalna-palityčnaj situacyi ŭ Biełarusi.

• 0
• 0
• 0
• 0
• 0
• 0
• 0
• 0