Maładaja bulba pa nierealnaj canie: čym ździŭlaje Kamaroŭka ŭ studzieńskija marazy
Kamaroŭka pracuje ŭ luboje nadvorje. Tut navat zimoj šmat samaj roznaj sadaviny, harodniny i nie tolki. Ludziej nie pužaje i maroz u -20°C. Jany aktyŭna zakuplajucca jak na krytym rynku, tak i na siezonnym. Apošni, darečy, taksama pracuje — niešta dy pradajuć, piša Tochka.by.
Zimovy fruktovy sad
Sadaviny, kaniešnie, stała mieniej, čym pierad navahodnimi śviatami. Adnak vybar usio ž taki jość. Za niekatorymi pryłaŭkami handlujuć navat jahadami. Jość piersiki, kavuny, kłubnicy, čarešni, bujaki.
Šmat i cytrusavych. Apielsiny možna znajści pa vielmi pryjemnych cenach — Br4,5—25 za kiło, limony — Br4,9—30, mandaryny — Br3,9—25.
A voś ananasy kaštujuć Br10—40.
Šmat i vinahradu. Samy tanny pradaduć za Br3,9, a voś darahija varyjanty — za Br30.
Vielmi vyhadna kuplać banany, jakija jość usiaho pa Br2,9. Churma pradajecca ŭ dyjapazonie Br4,9—25.
Vybar jabłykaŭ nie taki vialiki, i kaštujuć jany Br4—6 za 1 kh. Hruš pa-raniejšamu mała, ceny — Br6,9—15.
Pryjechała maładaja bulba
Bulbu na Kamaroŭcy pradajuć roznych hatunkaŭ. Samy tanny varyjant kaštuje Br0,99, daražejšy — Br2,8.
Samaje cikavaje: na rynku źjaviłasia rańniaja bulba z Azierbajdžana. Cana moža šakavać — Br15 za kiło. Atrymlivajecca, u 15 razoŭ daražejšaja, čym samy tanny karniapłod z susiedniaha pryłaŭka.
Cybula kaštuje Br1,99—3,5, za 1 kh, morkva — Br0,5—4, buraki — Br0,99—4.
Prystojna padaraželi tamaty. Prostyja pamidory kaštujuć Br7,9 za 1 kh. A dla amataraŭ jość varyjanty navat pa Br65.
Z ahurkami spravy lepšyja — kaštujuć jany Br3,9—24,9 za 1 kh.
Vybar piercaŭ maleńki. Za kiło ŭ vas paprosiać ad Br7,9. Bakłažany taksama ŭ najaŭnaści — Br10,9—14,9.
Košt saleńniaŭ amal nie źmianiŭsia z kanca śniežnia. U niekatorych pradaŭcoŭ možna znajści bolš tannyja ahurki — Br6 za 1 kh, ale jość i darahija — za Br15. Kvašanaja kapusta kaštuje Br8—12.
Zvyčajnaja zielanina abydziecca ŭ Br12—25 za kiło. Hryboŭ amal nie zastałosia. Šampińjony pradajucca pa Br9,5—12.
Kamientary