Sioleta ŭ Biełarusi pavinna być pabudavana bolš jak 137 km lasnych daroh, paviedamiŭ na pres-kanfierencyi 16 vieraśnia ministr lasnoj haspadarki Michaił Amieljanovič.
U nastupnym hodzie płanujecca pabudavać 172 km. «Pavodle rašeńnia kiraŭnika dziaržavy štohod nieabchodna budavać nie mienš jak 100 kiłamietraŭ, u apošnija hady my heta zadańnie pieravyšajem», — adznačyŭ Amieljanovič. Za apošnija piać hadoŭ pabudavany 641 km daroh.
Pavodle słoŭ ministra, lasnyja darohi budujucca dla pavieličeńnia abjomaŭ narychtoŭki i minimizacyi raschodaŭ na transparciroŭku, uciahvańnie ŭ haspadarčy abarot dadatkovych abjomaŭ lasnoha fondu ź ciažkadastupnych učastkaŭ. Darohi dapamahajuć taksama chutčej dabracca da miescaŭ uzharańnia ŭ lesie.
«Na budaŭnictva vydzialajuccca značnyja finansavyja srodki. Tak, sioleta abjom inviestycyj składzie 161 młrd. rubloŭ. Kab pabudavać 1 km daroh, treba prykładna 1 młrd. rubloŭ, tamu što jany prachodziać u ciažkadastupnych, bahnistych miescach i treba pravodzić vialiki abjom budaŭničych rabot. Kali paraŭnoŭvać ź Finlandyjaj, to tam košt budaŭnictva daroh značna tańniejšy. Tam inšaja hleba, niama takich bałot», — skazaŭ kiraŭnik viedamstva.
Jon nahadaŭ, što pa daručeńni prezidenta z 1 studzienia 2015 hoda budzie ŭkaraniacca vopyt viadzieńnia lasnoj haspadarki Finlandyi, jakaja źjaŭlajecca adnoj ź viadučych lasnych dziaržaŭ. «My čatyry hady vyvučali hety vopyt. Ličym, što tyja technałohii, jakija ŭkaranionyja finskimi kalehami, identyčnyja našym technałohijam, ale my adstajom pa abjomnych pakazčykach. Naprykład, u Finlandyi pry lesaadnaŭleńni vykarystoŭvajecca pasadačny materyjał z zakrytaj karaniovaj sistemaj, my pakul tolki pačynajem asvojvać hetyja technałohii. U nas dla hetaha jość dva centry — u Minsku i ŭ Mahiloŭskim lashasie. Kab vykanać zadaču pa vychadzie da 2020 hoda na 30% lesaadnaŭleńnia z vykarystańniem sadžancaŭ z zakrytaj karaniovaj sistemaj, nam treba pabudavać 23 tys. kvadratnych mietraŭ ciaplic i jašče čatyry anałahičnyja lasnyja centry. Tady my budziem u hetym pytańni iści naraŭnie z našymi finskimi kalehami», — adznačyŭ ministr.
Ciapier čytajuć
Andrej Švied, architektar represij, pryznačany staršynioj Viarchoŭnaha suda10
Kamientary