«Im składana prymać dapamohu». Dzie buduć žyć palitviaźni pa pryjeździe ŭ Jeŭrasajuz? Raspytali vałancioraŭ
Departavanyja va Ukrainu biełaruskija palitviaźni tolki ŭ noč na 18 śniežnia dabralisia da Varšavy, a ranicaj da Vilni — mnohija praviali ŭ darozie sutki. Vulicy la miescaŭ sustrečy ŭ Varšavie i Vilni byli poŭnyja śloz i doŭhačakanych abdymkaŭ. Važnuju rolu ŭ arhanizacyi pryjomu źniavolenych adyhrali pravaabaroncy i vałanciory.
U Polščy vyrašyła zastacca bolšaja častka z vyzvalenych 109 čałaviek — 90 viaźniaŭ. Takoje rašeńnie jany pryniali naŭprost na polska-ŭkrainskaj miažy, na pamiežnym pierachodzie «Jahadzin — Darahusk», dzie arhanizavali pryjom zajaŭ na mižnarodnuju achovu.
Inšyja ludzi tranzitam pajechali ŭ Litvu. Viktar Babaryka i Maryja Kaleśnikava, chutčej za ŭsio, adpraviacca ŭ Hiermaniju.
Adna z vałanciorak, aktyvistka Nasta Bazar raskazała «Našaj Nivie», što na bazie Centra biełaruskaj salidarnaści ludzi prajšli rehistracyju. Ludzi mieli mahčymaść adrazu źviarnucca da doktara ci psichołaha, atrymać ježu, adzieńnie, cyharety i sim-karty.
«Častku ludziej adrazu zabrali svajaki i siabry. Častku na pieršyja dni raźmieściać u haścinicy — u ludziej budzie biaspłatnaje charčavańnie. Nakolki mnie viadoma, pry nieabchodnaści ŭsich zmohuć zabiaśpiečyć biaspłatnym žytłom na čas da paŭhoda. Ja zaŭvažyła, što ŭsim pakul składana prymać dapamohu. Mnie zdajecca, heta rysa admietnaja dla ŭsich biełarusaŭ i biełarusak. Kali my ŭ biadzie, nam ciažka zhadžacca na dapamohu. A hetyja ludzi, biezumoŭna, u joj majuć patrebu», — adznačyła Nasta Bazar.
Pa infarmacyi «Našaj Nivy», tych, chto abraŭ pajechać u Litvu, taksama raśsielać pa hatelach ci kvaterach i zabiaśpiečać charčavańniem.
Niahledziačy na ciažkuju darohu i sami ŭmovy apošnich dzion, palitviaźni adžartoŭvalisia. Na prapanovu vałancioraŭ prysieści na kresła, adkazvali sa śmiecham: «Užo nasiadzielisia».
Litaraturaznaŭca i palitołah Alaksandr Fiaduta vyjšaŭ z aŭtobusa z kijočkam. Asudžany pa spravie zmoŭščykaŭ na 10 hadoŭ, za kratami jon pravioŭ čatyry hady i vosiem miesiacaŭ. Pry hetym jon taksama byŭ poŭny humaru. Na pytańnie žurnalistaŭ pra stan zdaroŭja, jon adkazaŭ tak: «Tancavać ja nie mahu. Ale ŭ vypadku nieabchodnaści dajšoŭ by siudy pieššu».
Viktar Babaryka i Alaksandr Fiaduta adznačyli arhanizavanaść pracy vałancioraŭ i va Ukrainie, i ŭ krainach ES i padziakavali ŭsim za padtrymku i dapamohu.
Ad lubych inšych kamientaroŭ žurnalistam na hety momant jon admoviŭsia, spasłaŭšysia na doŭhi čas u pałonie.
Inšyja palitviaźni taksama pakul vyrašyli ŭstrymacca ad kantaktaŭ ź miedyja, pieražyvajučy za svajakoŭ u Biełarusi.
U Łahojsku piekar admaŭlajecca pradavać svoj chleb pakupnikam, u jakich jość sabaki84
Kamientary