Vysoka pastaŭlenyja svajaki

Jeryn-małodšy pracuje ŭ Biełaj Padlaskaj. Linh-małodšy — u Kijevie. Baćki mohuć supierničać, a dzieci miła pracujuć pad dacham adnaho viedamstva. «NN» pisała ab bliskučych dyplamatyčnych karjerach Zachara Navumava i Andreja Sucharenki. Popleč ź imi zamiežnapalityčnyja intaresy Biełarusi adstojvajuć mnohija inšyja dzieci, ziaci, žonki.

«NN» pisała ŭžo pra bliskučyja dyplamatyčnyja karjery Zachara Navumava, syna ministra ŭnutranych spravaŭ RB, jaki pracuje pieršym sakratarom pastajannaha pradstaŭnictva pry adździaleńni AAN u Ženievie, i Andreja Sucharenki, syna byłoha staršyni KDB, jaki na toj momant zajmaŭ pasadu pieršaha sakratara pa pytańniach Rady Eŭropy pry pasolstvie Biełarusi ŭ Francyi.

Razam z tym, dzieci dvuch «siłavikoŭ» daloka nie adzinyja svajaki byłych i siońniašnich vysokich čynoŭnikaŭ, jaki pracujuć na dyplamatyčnaj nivie.

Tak, syn Sucharenkavaha papiarednika Leanida Jeryna Pavał źjaŭlajecca vice‑konsułam u Biełaj‑Padlaskaj (Polšča).

Pry pasolstvie Biełarusi va Ŭkrainie jość hrupa ŭ handlova‑ekanamičnych pytańniach, jakaja adkazvaje za raźvićcio ekanamičnych suviaziaŭ miž našymi krainami. Adnym z daradcaŭ hetaj hrupy źjaŭlajecca Siarhiej Linh, syn byłoha premjer‑ministra Biełarusi.

Da niadaŭniaha času konsułam Biełarusi ŭ Švajcaryi byŭ Ihar Załamaj, syn byłoha staršyni Bieraściejskaha abłvykankamu. Praŭda, na dadzieny momant jahonaha proźvišča niama ŭ śpisach supracoŭnikaŭ pasolstva na aficyjnym sajcie.

Syn pieršaha ministra sportu Biełarusi Ŭładzimiera Ryžankova Maksim kuryruje ŭpraŭleńnie zamiežnaj palityki pry Administracyi prezydenta. Da hetaha Ryžankoŭ‑małodšy zajmaŭ pasadu vice‑konsuła pasolstva Biełarusi ŭ Izraili. U 2005 hodzie padčas biełaruska‑polskaha dyplamatyčnaha skandału Maksim Ryžankoŭ byŭ vysłany z Polščy, jon znachodziŭsia tam pry pasolstvie ŭ jakaści daradcy‑pasłańnika.

Biełaruskaje pasolstva ŭ Kyrhyzstanie ačolvaje Valery Bryloŭ — ziać kolišniaha ministra zamiežnych spravaŭ Ivana Antanoviča. Praca ŭ Biškieku nia pieršaja na dyplamatyčnaj nivie dla Brylova, jon užo kiravaŭ pasolstvam Biełarusi ŭ Juhasłavii. Heta prypała akurat na peryjad bambiožak Biełhradu NATAŭskimi vojskami.

Jašče ceły šerah svajakoŭ vysokich čynoŭnikaŭ pracuje ŭ strukturach MZS, ale na siońnia nie za miažoj, a ŭ samoj Biełarusi. Tak, syn hieneralnaha prakurora krainy (1992—1995) Vasila Šaładonava Ihar — daradca hałoŭnaha dahavorna‑pravavoha ŭpraŭleńnia. Syn byłoha namieśnika kiraŭnika Administracyi prezydenta Aleha Słuki Jury — namieśnik načalnika konsulskaha ŭpraŭleńnia, a Dźmitry Zoryn, syn byłoha ministra lasnoj haspadarki, — daradca adździełu Centralnaj Azii i Zakaŭkaźzia.

Načalnik adździełu finansavańnia i spravazdačnaści zamiežnych ustanovaŭ Valutna‑finansavaha ŭpraŭleńnia Zinaida Śvierž — žonka pieršaha namieśnika ministra finansaŭ Anatola Śvierža. A spadarožnica žyćcia staršyni Vyšejšaha haspadarčaha sudu Viktara Kamiankova Ludmiła — načalnica Hałoŭnaha dahavorna‑pravavoha ŭpraŭleńnia.

Siarod supracoŭnikaŭ Ministerstva zamiežnych spravaŭ taksama jość proźviščy: Vasilevič, Kniazieŭ, Papkoŭ, Butevič, Kazłoŭ, ale nam nie ŭdałosia vyśvietlić, ci jany taksama svajaki adnajmiennych čynoŭnikaŭ, ci prosta majuć adnolkavyja proźviščy. Peŭna ž, u Biełarusi jość talenavityja ludzi nia tolki siarod dziaciej ministraŭ i supracoŭnikaŭ prezydentury.

• 0
• 0
• 0
• 0
• 0
• 0
• 0
• 0