Źbiŭ u dvary dziaŭčynku, atrymaje dva hady kałonii-pasialeńnia
8 kastryčnika ŭ sudzie Maskoŭskaha rajona Minska abvieščany prysud pa spravie ab śmiarotnym najeździe na trochhadovuju dziaŭčynku ŭ dvary doma pa vulicy Rozy Luksiemburh 17 červienia hetaha hoda.
Sud pryznaŭ 36-hadovaha minčanina, vadziciela aŭtamabila «Ford», pad kołami jakoha zahinuła dzicia, vinavatym va ŭčynieńni złačynstva, praduhledžanaha č. 2 art. 317 KK, i pryznačyŭ jamu pakarańnie ŭ vyhladzie dvuch hadoŭ pazbaŭleńnia voli ŭ kałonii-pasialeńni. Jon taksama pazbaŭleny prava kiravańnia transpartnymi srodkami na piać hadoŭ.
Sud pastanaviŭ spahnać z asudžanaha ŭ jakaści kampiensavańnia maralnaha ŭronu paciarpiełym — baćkam zahinułaj dziaŭčynki — 200 miljonaŭ rubloŭ.
Nahadajem, 7 kastryčnika ŭ sudzie baćki zahinułaj trochhadovaj minčanki zajavili maralny isk u 1,5 młrd. rubloŭ na dvaich, a dziaržabvinavaŭca paprasiŭ pryhavaryć abvinavačanaha da pazbaŭleńnia voli na dva hady z adbyvańniem pakarańnia ŭ kałonii-pasialeńni i pazbaŭleńniem prava kiravańnia transpartnymi srodkami na piać hadoŭ.
Baćki dziaŭčynki zajaŭlali, što asnoŭnaje pakarańnie abvinavačanamu pakidajuć na mierkavańnie suda, ale paprasili, kab jaho pazbavili prava kiravańnia aŭtatranspartam na maksimalna mahčymy termin. «Mnie biez roźnicy, što budzie z hetym vadzicielem… Pasadziać nie pasadziać — mnie ad hetaha ni ciopła, ni choładna nie stanie», — skazała mama zahinułaj dziaŭčynki. Jaje pazicyju padtrymaŭ muž.
Pavodle źviestak śledstva, analiz sabranych dokazaŭ pakazaŭ, što pryčynaj DTZ źjaviłasia niaŭvažlivaść vadziciela da darožnaha stanovišča i jaho źmienaŭ.
Niahledziačy na najaŭnaść na prajeznaj častcy dvarovaj terytoryi pryparkavanych lehkavych aŭtamabilaŭ, što nie dazvalali kantralavać darožnuju situacyju, u parušeńnie patrabavańniaŭ p. 137.1 PDR, jaki zabaraniaje ruch u žyłoj zonie z chutkaściu zvyš 20 km/hadz, va ŭmovach abmiežavanaha ahladu vadziciel, jak ustanoŭlena śledčym ekśpierymientam, ruchaŭsia z chutkaściu 24 km/hadz. Akramia taho, jon nie pryniaŭ usie miery dla arhanizacyi biaśpieki piešachodaŭ, źnižeńnia chutkaści až da poŭnaha spynieńnia transpartnaha srodku, što vyklučyła b vierahodnaść najezdu na dzicia.
Padčas dopytu paciarpiełych u sudzie stała viadoma, što ŭ dzień trahiedyi abodva baćki znachodzilisia doma, u inšym rajonie horada, a za dočkami sačyli babula i dziadula. Akazałasia, što za niekalki imhnieńniaŭ da trahiedyi dzieci ź dziadulam znachodzilisia ŭ jaho mašynie, pryparkavanaj u dvary, i małodšuju dziaŭčynku, jakaja kinułasia na vulicu za starejšaj, mužčyna ŭtrymać nie zdoleŭ.
Abvinavačany ŭ sudzie poŭnaściu pryznaŭ svaju vinu, niekalki razoŭ prasiŭ daravańnia ŭ baćkoŭ zahinułaha dziciaci, a sud paprasiŭ pryznačyć pakarańnie, nie źviazanaje z pazbaŭleńniem voli, kab, pracujučy, mieć mahčymaść kampiensavać maralny ŭron.
Častku srodkaŭ — 80-90 młn. rubloŭ — jon byŭ hatovy pieradać paciarpiełym najbližejšym časam.
Kamientary