Akciora Šaja Łabafa aryštavali za bojku padčas śviatkavańnia maślenicy ŭ Novym Arleanie

Jak paviedamili ŭ palicyi Novaha Arleana, 39‑hadovaha Łabafa vyhnali z ustanovy paśla taho, jak jon zładziŭ tam deboš.

Departamient palicyi Novaha Arleana paćvierdziŭ, što prykładna a 12:45 nočy palicejskija byli vyklikanyja ŭ rajon Faburh Maryńji, raźmieščany pobač z Francuzskim kvartałam, dzie znachodziŭsia epicentr śviata.

Zhodna z sudovymi dakumientami, mieniedžar bara chacieŭ vyvieści Łabafa z ustanovy, ale akcior pasprabavaŭ udaryć jaho.

Zatym, paśla taho jak jaho vyvieli, Łabaf nibyta ŭdaryŭ kułakom adnaho z naviedvalnikaŭ, jaki dapamahaŭ mieniedžaru bara, a paźniej viarnuŭsia i ŭdaryŭ druhoha mužčynu ŭ nos.

«Niekalki čałaviek pasprabavali ŭtrymać jaho na padłozie — jaho ŭ kančatkovym vyniku adpuścili ŭ nadziei, što jon sydzie, — ale, jak paviedamlajecca, jon znoŭ udaryŭ taho ž paciarpiełaha, nanosiačy ŭdary kułakami ŭ vierchniuju častku cieła. Zatym Łabaf, pa paviedamleńniach, atakavaŭ inšaha čałavieka — udaryŭšy jaho ŭ nos», — havorycca ŭ pres-relizie palicyi.

Vidavočcy ŭtrymlivali Łabafa da prybyćcia palicyi, paśla čaho jaho dastavili ŭ balnicu. Paźniej jaho vypisali, aryštavali i vystavili abvinavačvańni pa dvuch punktach ab naniasieńni pabojaŭ.

Paviedamleńni ab nienaležnych pavodzinach Łabafa pa ŭsim Novym Arleanie źjaŭlalisia na praciahu niekalkich dzion. Rabotnik miascovaha bara Ms Mae's Robiert Skuz, raskazaŭ časopisu Hollywood Reporter, što akcior pryjšoŭ tudy ŭ «niekalki kanfliktnym stanie».

«U razhar bojki jon vydaŭ frazu: «Ty viedaješ, chto ja taki?»», — raskazaŭ Skuz.

Paviedamlajecca, što Łabafa paprasili syści paśla taho, jak jon pasprabavaŭ prajści za barnuju stojku i nalić napoi naviedvalnikam.

Łabaf raniej raskazvaŭ ab svaich prablemach z ałkaholem. Paśla aryštu ŭ 2017 hodzie ŭ Savanie, štat Džordžyja, jon prajšoŭ kurs reabilitacyi pa rašeńni suda i hety dośvied natchniŭ jaho na stvareńnie paŭaŭtabijahrafičnaha filma «Miły chłopčyk».

Tym nie mienš u 2020 hodzie anhlijskaja śpiavačka i partniorka akciora pa hetym filmie FKA twigs, sapraŭdnaje imia jakoj Talija Barniet, padała na jaho ŭ sud, abvinavačvajučy Łabafa ŭ sieksualizavanym hvałcie, napadzie i pryčynieńni emacyjnaj škody.

U pazovie i ŭ intervju New York Times Barniet zajaviła, što Łabaf, ź jakim jana sustrakałasia z 2018 pa 2019 hod paśla znajomstva na zdymkach filma «Miły chłopčyk», śviadoma padvierh jaje ryzycy zaražeńnia infiekcyjaj, jakaja pieradajecca pałavym šlacham, sprabavaŭ zadušyć i ŭdaryŭ ab aŭtamabil. Łabaf admaŭlaje ŭsie abvinavačvańni ŭ svoj adras. U lipieni 2025 hoda baki dasiahnuli pazasudovaha pahadnieńnia.

Pradstaŭniki Łabafa pakul nie kamientavali ŚMI toje, što adbyłosia.

• 1
• 0
• 0
• 2
• 0
• 0
• 0
• 0