Pasaž hałoŭnaj reinkarnacyi žaleznaha Fieliksa nakont kolkaści destruktyŭnych elemientaŭ maje niejki demaničny sens: ich, kali vieryć bosu KDB, u nas roŭna 1767, pry čym ich kolkaść nie pavialičvajecca, a ni pamianšajecca. Bajusia chutka ŭ narodzie ŭźniknuć zababony vakoł mahičnaj pryrody zhadanaj ličby.
Vystup pradstaŭnika hramadstva “Znańnia” na lekcyi “Drennyja prykmiety” u asipovicim DK imia Piacihodzia pryncypu adnaho akna.
Šanoŭnyja tavaryšy!
Siońnia my parazmaŭlajem pra h.z. drennyja prykmiety. Naprykład zakraniem temu byccam nie ščaślivych numaroŭ. Apošnim časam vielmi papularnymi stali zababony vakoł ličby 1767. Jana atrymała siarod abyvacielaŭ nazvu “destruktyŭnaja ličba”.
Naprykład siarod studentaŭ jość prykmieta, što kali zranku sieści ŭ maršrutku z numaram 1767, to ciabie abaviazkova zatrymajuć jak padazronaha ŭ rasklejcy stykiersaŭ “Hladzicie “Pał Fikšan” u biełaruskim pierakładzie” i pamarynujuć u pastarunku jak minimum sutki.
Abo voś jašče prykmieta, źviazanaja z 1767. Dapuścim ciabie niechta zvonić na mabiłu z numaru, jaki pačynajecca z 1767. Heta da taho, što Vas prymusiać prymusova padpisacca na vydańnie administracyi prezidenta. Naš kiemlivy, adnak niedaloki narod navat raspracavaŭ mietad – jak pazbavicca cisku čornych siłaŭ: u takim vypadku rajać źjeści pieradavicu Saŭbiełki, napisanuju niejkaj Kaciaj Pranik, i skazać: Jakubovič, Jakubovič, Pranik padpišy, a mianie nie biary!”.
Nielha kłaści čamadan ŭ bahažnuju jačejku z numaram 1767: heta možna pryvieści da taho, što ty nikoli nie zmožaš pastupić u hramadskaje abjadnańnie “Biełaja Ruś” i jak śled pierastrachavacca ad razryvu pracoŭnaha kantrakta.
Chodziać absalutna dzikija čutki: byccam adnamu supracoŭniku departamientu pa spravach prezidenta naličyli 1767 dołaraŭ zarobku. Na nastupny dzień jon pryjšoŭ na pracu, vyklikaŭ da siabie apazicyjnych muzykaŭ i śpiavaŭ ź imi na ŭsiu Marksa 38 “Piatroŭna, padaj vady”.
Šanoŭnyja tavaryšy, treba raz i nazaŭsiody zrazumieć, što 1767 heta abjektyŭnaja źjava. Heta jak bałans vidaŭ u pryrodzie.
Na hetym naša lekcyja zakančvajecca. U nastupny raz my parazmaŭlajem pra źjavy, na jakija sučasnaja navuka sapraŭdy nia moža dać adkaz: łochnieski monstr, śniežny čałaviek i Sajuznaja dziaržava. Da sustrečy tavaryšy.
Kamientary