Litoŭcy i palaki łamanulisia zapraŭlacca ŭ Biełaruś. Voś kolki na hetym možna zekanomić
Praz vajnu ŭ Iranie, jakaja vyklikała naftavy kryzis, ceny na paliva ŭ susiednich krainach ES uźlacieli. Asabliva prykmietna padaražeła dyzielnaje paliva.
Litva — užo 2 jeŭra za litr dyziela
Dyziel u Litvie kaštuje ŭžo pa 2 jeŭra za litr (kala 6,72 rubla). U Biełarusi — 2,6 rubla, ci kala 80 jeŭracentaŭ pa ciapierašnim kursie. Takim čynam, roźnica na adnym litry składaje 1,2 jeŭra.
Praz heta pajezdki pa paliva ź Litvy ŭ Biełaruś stali bolš vyhadnymi, čym da naftavaha kryzisu, kali dyzielnaje paliva ŭ Litvie kaštavała 1,5—1,6 jeŭra za litr.
Hruba kažučy, ułaśnik Passat B4 z bakam na 100 litraŭ moža zalić poŭny bak u Biełarusi za 80 jeŭra zamiest 200 jeŭra ŭ Litvie.
Ale ahułam siarod lehkavych aŭto taki abjom sustrakajecca redka. Tamu zvyčajna razmova idzie pra 60—90 litraŭ.
U vypadku ź siaredniestatystyčnym bakam na 70 litraŭ ekanomija składaje kala 85 jeŭra.
Praŭda, heta biez uliku vydatkaŭ na apłatu pošliny na vyjezd i rehistracyju ŭ elektronnaj čarzie (pad 70 rubloŭ, ci kala 20 jeŭra). Z ulikam strachoŭki i vydatkaŭ na darohu z 85 jeŭra zastaniecca kala 50—55 jeŭra.
Ale žychary pryhraničča, jakija ŭsio jašče majuć va ŭłasnaści niejki Passat B4 ci Audi A6 C4, na zapraŭcy ŭ Biełarusi mohuć zekanomić kala 80—85 jeŭra.
Ułaśnikam bienzinavych aŭto jechać ź Litvy ŭ Biełaruś pa paliva mienš vyhadna, bo bienzin u Litvie kaštuje kala 1,7 jeŭra za litr.
Adnak, kali mašyna maje jašče i hazavuju ŭstanoŭku, to ahulnaja ekanomija budzie bolš adčuvalnaja, bo haz u Biełarusi taksama kaštuje značna tańniej — kala 40 jeŭracentaŭ suprać 0,75 jeŭra ŭ Litvie.
A što ŭ Polščy?
U Polščy paliva kaštuje krychu tańniej, čym u Litvie. Litr dyzpaliva tam pad 8 złotych (kala 1,85 jeŭra). To-bok roźnica ź Biełaruśsiu atrymlivajecca kala 1—1,05 jeŭra na litry.
Ale mienšaja roźnica ŭ canie kampiensujecca tym, što, u adroźnieńnie ad Litvy, u Polšču možna jechać z dadatkovymi 10 litrami paliva ŭ kanistry.
Tamu palak na zapraŭcy poŭnaha baka ŭ Biełarusi taksama moža zekanomić nie adzin dziasiatak jeŭra.
Pry hetym, aproč paliva, ź Biełarusi ŭ Polšču lehalna možna vieźci litr mocnaha ałkaholu i dźvie pački cyharet, što dadaje vyhady takoj pajezdcy.
Pajezdki pa paliva ŭ Biełaruś sapraŭdy vyklikajuć cikavaść u susiedziaŭ.
Tak, naprykład, u instahramie razychodzicca videa, dzie palak, jaki žyvie za 2 km ad Biełarusi, vychvalajecca tym, jak zapraŭlaje svaju Audi pa 3,2 złotaha za litr zamiest 8 złotych.
Videa padchapili adrazu niekalki pablikaŭ, dzie ŭ kamientarach abmiarkoŭvajuć, ci sapraŭdy varta jechać zapraŭlacca ŭ Biełaruś. Adny ličać, što heta dobraja mahčymaść zekanomić i zaadno nabyć tanny ałkahol i cyharety. Inšyja narakajuć na niebiaśpieku takich pajezdak, a taksama na toje, što jany zajmajuć šmat času.
Praŭda, mnohija zapeŭnivajuć, što na pajezdku ŭ Biełaruś u ich sychodzić pa 2,5—3 hadziny, tamu vyhada nibyta vidavočnaja.
U plusie ciapier i tak zvanyja biełaruskija salaravozy. Naturalna, što pa cenach, jak na zapraŭcy, nichto paliva nie pradaje, ale pa 5,5—6 złotaha za litr (kala 1,4 jeŭra) z ulikam apošniaha padaražańnia pierapradać jaho ŭ Polščy całkam realna.
Tamu Passat B4 z bakam na 100 litraŭ ciapier moža prynosić kala 50—55 jeŭra prybytku na palivie. Praŭda, jeździć u Polšču z poŭnym bakam možna nie čaściej, čym raz na 72 hadziny, a miesiačny limit składaje 600 litraŭ.
Praz hetyja i inšyja abmiežavańni mnohija čaŭnaki jeździać praź miažu raz na tydzień, kab možna było pravieźci nie tolki paliva, cyharety i ałkahol, ale i tavar na zvarotnym šlachu.
Kamientary