Usprymańnie Trampa Maskvoj źmianiłasia, zahavaryli pra vierałomstva i nienadziejnaść

Svoj artykuł Trenin pačynaje z analizu transfarmacyi palityki Donalda Trampa. Jon nahadvaje, što napačatku svajho druhoha terminu Tramp kazaŭ pra svaju misiju «viarnuć vielič Amierycy», pra admovu ad libieralnaha hłabalizmu na karyść prahmatyzmu, «ad abarony i prasoŭvańnia intaresaŭ amierykanskaj impieryi da pavarotu tvaram da ŭłasnaj krainy i jaje prablem». Takaja palityka, na pohlad ekśpierta, taksama ŭklučała «pryznańnie raznastajnaści śvietu i najaŭnaści ŭ im niekalkich vialikich dziaržaŭ, ź jakimi ZŠA pavinny damaŭlacca».

«Pačatak jaho novaha terminu atrymaŭsia badziory», — kaža Trenin, majučy na ŭvazie, što kroki Trampa dali Rasii nadzieju na pieradzieł śvietu na śfiery ŭpłyvu. Jon uzhadvaje adnaŭleńnie kantaktaŭ Vašynhtona z Kramlom i vypracoŭku parazumieńnia nakont šlachoŭ vyrašeńnia ŭkrainskaha kryzisu («duchu Ankorydža»). Adnak hety pośpiech akazaŭsia karotkačasovym, bo, jak davodzić aŭtar, praces urehulavańnia chutka zabuksavaŭ praz supraciŭ jeŭrapiejskich sajuźnikaŭ i amierykanskaha isteblišmientu.

U vyniku navat abmiežavanyja kroki pa palapšeńni adnosin pamiž ZŠA i Rasijaj nie adbylisia, a sankcyjny cisk na rasijski enierhietyčny siektar tolki ŭzmacniŭsia.

Vašynhton praihnaravaŭ prapanovy pa zachavańni Damovy ab mierach pa dalejšym skaračeńni i abmiežavańni stratehičnych nastupalnych uzbrajeńniaŭ (SNU-3), dziejańnie jakoj skončyłasia ŭ pačatku hetaha hoda, što kančatkova razburyła sistemu jadziernaj biaśpieki.

Adnačasova, jak padkreślivaje Trenin, zamiežnaja palityka ZŠA stała jašče bolš rezkaj i siłavoj. Śviedčańniem hetaha źjaŭlajucca apieracyja ŭ Vieniesuele, udary pa Iranie i razmovy pra «źmienu režymaŭ» u inšych krainach.

«Faktyčna zamiest sastarełaj hiehiemonii kalektyŭnaha Zachadu, vybudavanaj na libieralna-hłabalisckich pačatkach, Tramp ciapier sprabuje ŭstalavać adnaasobnuju suśvietnuju hiehiemoniju ZŠA, ale ŭžo na čysta siłavoj asnovie. (…)

Dziaržava, jakaja «zasynała» pry Bajdenie-«Čarnienku», pry Trampie pierajšła ŭ kontrnastup. Meta Vašynhtona — nie stolki ŭstalavać novy suśvietny paradak, kolki sparadzić suśvietny chaos, kab panavać u im», — śćviardžaje rasijski ekśpiert.

Jak być?

Adkazvajučy na pytańnie «Jak być nam?», Trenin davodzić, što takaja palityka Vašynhtona «abjektyŭna robić Złučanyja Štaty hieapalityčnym i patencyjna vajennym praciŭnikam Rasii». Jon padkreślivaje, što navat paśla viartańnia Trampa ŭ Bieły dom Vašynhton nie pierastaŭ być praciŭnikam Maskvy va ŭkrainskim kanflikcie.

«Heta nie značyć, što ŭśled za atakaj na Iran abaviazkova adbudziecca napad na Rasiju, ale ŭ stratehičnym płanie pamknieńni administracyi Trampa viaduć ZŠA da sutyknieńnia z našaj krainaj», — davodzić ekśpiert.

«Sprava i prava Viarchoŭnaha hałoŭnakamandujučaha — vyrašać, jak praciahvać śpiecyjalnuju dypłamatyčnuju apieracyju (dyjałoh z Trampam)», — adznačaje Trenin i zaŭvažaje, što hety dyjałoh užo prynios peŭnyja vyniki: dapamoh častkova addalić Trampa ad ukrainskaha kanfliktu, uzmacnić razychodžańni pamiž ZŠA i Jeŭropaj i pakazać Rasiju jak krainu, jakaja «imkniecca da tryvałaha miru».

Pavialičyć

Adnak pierśpiektyvy dypłamatyi ekśpiert aceńvaje skieptyčna, bo ličyć, što ŭkrainski prezident «całkam i bieznadziejna nieadekvatny», «Jeŭropa rychtujecca vajavać z Rasijaj», a sam Tramp moža asłabnuć paśla vybaraŭ u Kanhres u listapadzie i niaŭdałaha raźvićcia iranskaj kampanii.

Asobna Trenin papiaredžvaje pra nienadziejnaść Trampa jak partniora. U jakaści prykładu jon pryvodzić pavodziny ZŠA ŭ adnosinach da Irana ŭ 2025 i 2026 hadach, jakija nazyvaje «vierałomstvam».

«Dadatkovuju pikantnaść situacyi nadaje toje, što amierykanskija pieramoŭščyki na rasijska-ŭkrainskim i iranskim kirunkach — heta adny i tyja ž ludzi, maksimalna nabližanyja da kiraŭnika Biełaha doma. Tramp u litaralnym sensie haspadar svajho słova, inakš kažučy — partnior nienadziejny. Heta nie aznačaje, što ź im nielha mieć znosiny; prosta vieryć jamu (ci jaho podpisu) zusim nie abaviazkova», — pavučaje ekśpiert i praciahvaje nahniatać:

«Nie varta taksama ni na chvilinu zabyvać, što realnaja amierykanskaja vajennaja daktryna stavić zadaču niejtralizacyi (abiezhałoŭlivańnia — u litaralnym sensie) vyšejšaha kiraŭnictva dziaržavy-praciŭnika ŭ samym pačatku kanfliktu. Harantyi biaśpieki Rasii — u tym liku na ŭkrainskim kirunku — mohuć być zabiaśpiečanyja pierš za ŭsio vajskovymi srodkami samoj Rasii. Raźličvać tut daviadziecca tolki na samich siabie».

Na pohlad ekśpierta, rasijska-amierykanskija adnosiny ŭ najbližejšaj budučyni buduć vielmi abmiežavanyja. Jon adznačaje, što epocha kantrolu nad stratehičnymi ŭzbrajeńniami faktyčna zaviaršyłasia, a «stratehičnaja stabilnaść u śviecie krytyčna asłabła».

«Patrabujecca pieraasensavańnie situacyi va ŭmovach šmatpalarnaha jadziernaha śvietu, i pierš za ŭsio raspracoŭka novych madelaŭ strymlivańnia i stabilnaści sumiesna z azijackimi partniorami Rasii — Kitajem, Indyjaj, Pakistanam, Paŭnočnaj Karejaj. Z Vašynhtonam nieabchodna pastajanna znachodzicca ŭ kantakcie dla vyklučeńnia niebiaśpiečnaha nieparazumieńnia ŭ kryzisnych situacyjach, ale pieramovy i navat kansultacyi, jakija viaducca pa starych formach, kančatkova stracili relevantnaść», — piša Trenin.

Na jaho dumku, vojny ZŠA i Izraila suprać Irana nanieśli mocny ŭdar pa sistemie nieraspaŭsiudžańnia jadziernaj zbroi, jakaja «siońnia bolš, čym kali-niebudź, słužyć adzinaj realnaj harantyjaj ad napadu z boku ZŠA». U toj ža čas, «faktyčnaja admova Vašynhtona ad jadziernych harantyj biaśpieki svaim sajuźnikam u Jeŭropie, Azii i na Blizkim Uschodzie šturchaje hetych sajuźnikaŭ da stvareńnia ŭłasnych jadziernych arsienałaŭ abo pašyreńnia najaŭnych».

Pavialičyć

A što z ekanomikaj?

U ekanamičnaj śfiery Trenin taksama nie bačyć chutkaha palapšeńnia adnosin. Choć patencyjał supracoŭnictva pamiž Rasijaj i ZŠA tearetyčna vialiki, jon ličyć, što na praktycy heta małaimavierna.

«Antyrasijskija sankcyi — heta «ŭsurjoz i nadoŭha». Bolšaja ich častka ŭviedzienaja zakonami ZŠA — hetyja sankcyi i nie mohuć być pierahledžanyja prezidentam. Bolšaść ciapier žyvučych hramadzian Rasii nie dačakajucca ni admieny, ni navat istotnaha pasłableńnia hetych abmiežavańniaŭ. Nam maje sens pryniać ciapierašniaje stanovišča spraŭ jak doŭhaterminovuju realnaść i vybudoŭvać svaju hieaekanamičnuju stratehiju z uporam na ŭnutranaje raźvićcio i adnosiny ź niezachodnimi partniorami».

Trenin padkreślivaje, što supracoŭnictva pamiž Maskvoj i Vašynhtonam u rehijanalnych pytańniach faktyčna źmianiłasia kanfrantacyjaj. Jon pryvodzić prykłady Vieniesueły, Irana (hetuju krainu jon nazyvaje «stratehičnym partnioram Rasii»), Kuby, Paŭnočnaj Karei i Kitaja («asnoŭnaha mižnarodnaha partniora Rasii»).

«Na ŭsich pieraličanych kirunkach u našych intaresach — umacoŭvać adnosiny z partniorami i sajuźnikami, jakija padviarhajucca cisku i pahrozam z boku ZŠA. Ich supraciŭ moža zatarmazić abo spynić kontrnastupleńnie Trampa. Sama pa sabie Amieryka nie spynicca nikoli», — zakančvaje svoj analiz Trenin.

• 2
• 0
• 12
• 3
• 0
• 0
• 0
• 0