Daradca ministra ŭnutranych spraŭ Ukrainy Anton Hieraščanka raspavioŭ u svaim Facebook, za što hramadzianinu Biełarusi Siarhieju Karotkich (Maluta, pazyŭny va Ukrainie «Bocman») Piatro Parašenka daŭ u piatnicu, 5 śniežnia, pašpart hramadzianina Ukrainy.
«Sacsietki apošnija niekalki dzion zachłynajucca paviedamleńniami ab tym, što prezident Piatro Parašenka daŭ ŭkrainskaje hramadzianstva hramadzianinu Biełarusi, Siarhieju Karotkich (jon ža Bocman, jon ža Maluta), jaki nibyta nacyst abo nieafašyst, jaki niešta tam uzarvaŭ u Maskvie, — napisaŭ Hieraščanka. — Usia hetaja infarmacyjnaja ataka aktyŭna padahravajecca rasijskimi ŚMI i prapłočanymi trolami.
Jak ža tak?! Kłacajuć pa kłavišach čytačy sacyjalnych sietak, pałajučy praviednym hnievam?! Aj-aj-aj, paŭtarajuć im inšyja.
Pry hetym usie chto sudziać zavočna Siarhieja Karotkich, jaho nie viedajuć. A ja viedaju! I skažu słova ŭ jaho abaronu!
Kali tyja, chto aburajucca zaraz nadańniem hramadzianstva Bocmanu, siadzieli viečaram 6 maja pa kafe i restaranach abo hladzieli doma televizar, u hety čas pad Manhušam tolki što stvorany i jašče nie abstralany atrad azoŭcaŭ trapiŭ u zasadu.
I tady, mienavita Siarhiej Karotkich razam z voinam-afhancam z pazyŭnym Dušman, pavioŭ u boj maładych chłopcaŭ, jakija nikoli raniej nie byli na vajnie.
U vyniku adzin z napadnikaŭ-kulamiotčyk byŭ zabity, a ŭ pałon byŭ uziaty ceły ministr abarony DNR Kakidzianaŭ.
Kali tyja, chto kłacaje ciapier pa kłavijaturach, krytykujučy Malutu, sałodka spali a 5-j ranicy 13 červienia ŭ dzień šturmu Maryupala, Siarhiej Karotkich z aŭtamatam u rukach vioŭ šturmavyja hrupy učorašnich majdanaŭcaŭ pa vuł. Hreckaj na šturm štaba terarystaŭ, jakija trymali miesiac u žachu paŭmiljonny horad.
A potym vyłoŭlivaŭ bandytaŭ pa haryščach i padvałach, ryzykujučy kožnuju chvilinu atrymać kulu z-za vuhła.
Kali tyja, chto pałajuć praviednym hnievam sałodka spali ŭ kancy žniŭnia, Siarhiej Karotkich i pałkoŭnik Kuźmič, jaki zahinuŭ śmierciu chrabrych, i ich hrupa ŭstaloŭvali miny i fuhasy vakoł Novaazoŭska, na jakich potym padryvalisia tanki i BTR ahresara.
Kali ŭ pieršych datach vieraśnia, u dzień kali rasijskija vojski pajšli ŭ nastup na Maryupal, tyja, chto sudziać u sacsietkach Bocmana… nie viedajuć, što Siarhiej Karotkich, Andrej Bilecki i Vadzim Trajan siadzieli ŭ blindažach pad abstrełam z «hradaŭ» i haŭbic pad vioskaj Šyrokava.
Vakoł tady było piekła, a ich i ich atrad vyratavała tolki toje, što blindažy pabudavanyja pa prapanovie tahačasnaha kiraŭnika Danieckaj ADA Siarhieja Taruty byli pierakrytyja 200-t milimietrovym słojem stali, jakija vytrymlivali pramyja traplańni 152 i 122 milimietrovych snaradaŭ.
Paśla taho, jak rasijcy vyrašyli, što paśla takoha masiravanaha abstrełu na ŭmacavańniach azoŭcaŭ, nichto nie zastaŭsia ŭ žyvych, jany pajšli ŭ nastup i atrymali ŭ adkaz škvał ahniu, jaki ich spyniŭ.
Ja nie mahu i nie maju prava pieraličyć tut usio raźviedvalnyja dyviersijnyja apieracyi, u jakich udzielničaŭ Siarhiej Karotkich.
Moža być jon, ci Andrej Bilecki cii Vadzim Trajan kali-niebudź napišuć pra heta ŭ miemuarach.
Ale ja viedaju, što Siarhiej Karotkich, jak nichto inšy zasłuhoŭvaje atrymańnia ŭkrainskaha hramadzianstva, bo pakazaŭ, što abarona Ukrainy — heta sens usiaho jaho žyćcia.
Pačynajučy z 5 maja Siarhiej Karotkich, jon ža Bocman, jon ža Maluta vajuje ŭ składzie «Azova» jak instruktar. Ciapier staŭšy hramadzianinam Ukrainy jon budzie vajavać, jak kadravy vajskoviec», — napisaŭ A. Hieraščanka.
Ciapier čytajuć
18‑hadovy były palitviazień raskazaŭ, što jon svajak Cichanoŭskaj. Jaho zatrymali, kali jon jechaŭ vajavać za Ukrainu4
Kamientary