Litoŭskija deputaty źviarnuli ŭvahu na spravu hramadzianina Litvy Siarhieja Botviča, jaki haładaje ŭ «Voŭčych Norach»
Uradženiec Biełarusi, hramadzianin Litvy i Francyi, palitviazień Siarhiej Botvič, jaki vosieńniu 2022 hoda atrymaŭ 13 hadoŭ za «ahienturnuju dziejnaść» i zaraz znachodzicca ŭ papraŭčaj kałonii №22 pad Ivacevičami, trymaje haładoŭku. Jon nie pryznaje svajoj viny. Litoŭskija deputaty źviarnuli ŭvahu na jaho spravu.
Deputackaja hrupa voźmie spravu Siarhieja Botviča pad svoj kantrol. Ab hetym zajaviła Viktoryja Čmilicie-Nilsien byłaja śpikierka Siejma Litvy, lidarka frakcyi libierałaŭ u litoŭskim parłamiencie, u efiry prahramy «Per tvora».
Siarhiej Botvič, narodžany ŭ Biełarusi hramadzianin Litvy, Francyi i Rasii, vosieńniu 2022‑ha atrymaŭ 13 hadoŭ za «špijanaž».
Jaho zatrymali letam 2021 hoda, asudzili ŭ kancy 2022 hoda. Tolki praź dziesiać miesiacaŭ paśla suda infarmacyja pra jaho trapiła ŭ ŚMI — praces byŭ zakryty, jak i ŭsie padobnyja spravy ŭ Biełarusi ciapier. Tolki praz čatyry hady paśla zatrymańnia pieršaja infarmacyja pra detali spravy stała viadomaja žurnalistam.
Siarhiej Botvič naradziŭsia ŭ Śvisłackim rajonie, ale paśla raspadu SSSR atrymaŭ hramadzianstva Rasii, a paźniej — Litvy i Francyi. Asnoŭny jaho kapitał byŭ zarobleny na aptovym handli vuhalem. U 2010‑ch jon vyrašyŭ inviestavać u radzimu i pačaŭ budavać zavod pa pierapracoŭcy draŭniny ŭ Hrodzienskaj vobłaści.
Adnak prajekt išoŭ ciažka, i ŭ 2018 hodzie na jaho zaviali kryminalnuju spravu za nibyta prysvajeńnie 734 tysiač jeŭra inviestaraŭ. Botvič praciahvaŭ naviedvać Biełaruś, nie ličačy siabie złačyncam.
Pavodle krynic «Našaj Nivy», u 2020 hodzie Botvič staŭ achviaraj šantažu: ad imia vysokapastaŭlenaha siłavika ŭ jaho patrabavali hrošy. Botvič źviarnuŭsia ŭ KDB, dzie jamu prapanavali paŭdzielničać u «apieratyŭnaj hulni» — dać chabar pad kantrolem śpiecsłužbaŭ.
Vynikam stała zatrymańnie pasylnych i vobšuki ŭ padraździaleńni taho siłavika, jakoha adnak paźniej apraŭdali, i jon atrymaŭ padvyšeńnie.
U 2021 hodzie Botviča zaprasili ŭ Biełaruś «dapoŭnić śviedčańni», harantavaŭšy biaśpieku. Jon pryjechaŭ na sustreču na aŭtamabili «Mazeraci», ale zamiest kabinieta śledčaha trapiŭ u SIZA pavodle abvinavačvańnia ŭ špijanažy na karyść Litvy.
Botvič śćviardžaje, što jaho katavali: trymali ŭ adzinočcy, pravodzili 10‑hadzinnyja dopyty bieź ježy i vady, niahledziačy na ciažkija chvaroby (cukrovy dyjabiet, hipiertanija, padahra). Ad jaho patrabavali samaahavoru — pryznańnia ŭ pracy na litoŭskuju raźviedku.
U vyniku Botvič byŭ asudžany na hihancki termin i adpraŭleny ŭ kałoniju «Voŭčyja Nory» (PK-22), jakaja viadomaja svaimi surovymi ŭmovami.
Zaraz Botvič znachodzicca ŭ krytyčnym stanie. Jak paviedamlajuć byłyja viaźni, jon — dyjabietyk, ale nie atrymlivaje naležnaha dohladu i charčavańnia.
Jaho pryznali «złosnym parušalnikam», što pazbaŭlaje jaho prava na pasyłki i zakupki ŭ kramie.
Troje jahonych synoŭ, dvoje ź jakich žyvuć za miažoj, napisali adkryty humanitarny zvarot da Alaksandra Łukašenki. Jany prosiać prajavić spahadu, pierahledzieć spravu abo pamiłavać baćku pavodle zdaroŭja, padkreślivajučy, što ich prośba — nie palityčnaja, a vyklučna čałaviečaja.
13 śniežnia stała viadoma, što Siarhiej Botvič abviaściŭ haładoŭku. Haładoŭka ŭskładniajecca najaŭnaściu ŭ mužčyny surjoznych zachvorvańniaŭ. Lekaŭ, jakija jamu nieabchodnyja, u Biełarusi niama, a rodnym prynieści jamu patrebnyja preparaty nie dazvalajuć. «Haładoŭka dla jaho — heta śmiarotnaja ryzyka», — paviedamiła krynica, padkreślivajučy: toje, što Botvič vyrašyŭ pajści na haładoŭku, śviedčyć pra toje, što inšych varyjantaŭ u jaho nie zastałosia.
Kamientary