Za dva hady manitorynhu svabody miedyja ŭ krainach Uschodniaha partniorstva Biełaruś zastajecca na apošnim miescy
Za dva hady składańnia rejtynhu svabody ŚMI krain Uschodniaha partniorstva Biełaruś ni razu nie pakinuła apošniaje miesca. Pra heta paviedamiŭ namieśnik staršyni Biełaruskaj asacyjacyi žurnalistaŭ Andrej Bastuniec, pradstaŭlajučy vyniki apošniaha, šostaha, «Indeksa svabody miedyja Uschodniaha partniorstva», padrychtavanaha ŭ miežach prajekta «Manitorynh svabody miedyja krain UP».
Pry hetym Bastuniec padkreśliŭ, što pry padrychtoŭcy apošniaha manitorynhu ekśpierty aceńvali situacyju ŭ śfiery ŚMI ŭ krainach UP u lipieni—kastryčniku 2014 hoda. Heta značyć, patłumačyŭ jon, samyja apošnija padziei — pryniaćcie papravak u zakon ab ŚMI i błakiroŭka sajtaŭ niedziaržaŭnych ŚMI — nie ŭličvalisia. «Inakš vynik byŭ by jašče horšy», — upeŭnieny Bastuniec.
U ahulnym rejtynhu Biełaruś nabrała 401 bał i zaniała apošniaje miesca. Na piatym miescy — Azierbajdžan z 532 bałami, na čaćviortym — Armienija (946), na trecim — Ukraina (1.094), na druhim — Małdova (1.322). Pieršaje miesca ŭvieś apošni hod stabilna zajmała Hruzija. U ciapierašnim manitorynhu jana atrymała 1.367 bałaŭ.
«Indeks svabody miedyja UP» rychtavaŭsia ŭ miežach realizacyi prajekta «Manitorynh svabody miedyja krain Uschodniaha partniorstva», jaki realizujecca pry padtrymcy Jeŭrapiejskaha sajuza. U acency situacyi sa ŚMI ŭ krainach UP udzielničajuć pa 10 ekśpiertaŭ ad kožnaj krainy UP ź liku miascovych žurnalistaŭ, pravaabaroncaŭ, jurystaŭ, sacyjołahaŭ, hramadskich dziejačaŭ, jakija majuć nie mienš za 5 hadoŭ vopytu pracy ŭ svajoj halinie i padtrymlivajuć ciesnyja prafiesijnyja suviazi ź miedyjaśfieraj.
Kamientary