Telekanał France 2 apublikavaŭ videa ataki na redakcyju satyryčnaha časopisa Charlie Hebdo na bulvary Ryšar-Lenuar u centry Paryža, ažyćcioŭlenaj u sieradu, 7 studzienia. Na zapisie čuvać, jak adzin z napadnikaŭ padčas stralby kryčyć «Ałach Akbar».
Pa słovach palicyjantaŭ, asoby, jakija stralali, taksama kryčali, što «adpomścili za praroka», paviedamlaje Agence France-Press u tvitary.
Pa apošnich dadzienych pravaachoŭnych orhanaŭ, jakija pryvodzić Reuters, u vyniku napadu zahinuli 12 čałaviek, u tym liku dvoje aficeraŭ palicyi. Pa źviestkach Le Figaro, zabityja čatyry karykaturysty časopisa — akramia Stefana Šarbano, heta mastaki, što malavali pad psieŭdanimami Cabu, Tignous i Wolinski.
Niezadoŭha da napadu na redakcyju ŭ Twitter'y vydańnia była apublikavanaja karykatura na lidara radykalnaj hrupoŭki «Isłamskaja dziaržava» Abu Bakr al-Bahdadzi, jakaja supravadžajecca podpisam «Z najlepšymi pažadańniami, darečy».
Jeŭrańjus taksama paviedamlaje, što mahčyma pryčynaj napadu moh stać apošni numar časopisa, dzie byŭ apublikavany prahnoz piśmieńnika Mišela Uelbieka, dzie vykazvałasia mierkavańnie, što ŭ 2022 h. prezidentam Francyi moža stać isłamist.
Prezident Francyi Fransua Ałand, jaki prybyŭ na miesca zdareńnia, nazvaŭ ataku teraktam.
Napadnikaŭ było dvoje. Im udałosia źbiehčy.
U listapadzie 2011 hoda Charlie Hebdo vypuściŭ numar, hałoŭnym redaktaram jakoha byŭ abvieščany prarok Muchamied. Na vokładcy była źmieščana karykatura na praroka, jaki pahražaje: «Sto udaraŭ bizunom, kali vam nie śmiešna». U redakcyjnym artykule havaryłasia, što časopis takim čynam vyrašyŭ adznačyć pieramohu isłamisckaj partyi na vybarach u Tunisie. Na nastupny dzień paśla vychadu numara nieviadomyja kinuli ŭ redakcyju vydańnia butelku z zapalnaj sumieśsiu, u vyniku čaho pamiaškańnie całkam zhareła.
Raniej Charlie Hebdo vyklikaŭ rezkuju krytyku z boku musulman u 2005 hodzie. Tady vydańnie pieradrukavała z dackaj haziety karykatury na praroka Muchamieda. Suprać časopisa padali pazoŭ za abrazu musulman, adnak praz dva hady abvinavačvańni źniali.
Kamientary