Biełarus viadzie kanał pra budaŭnictva i ramont. U jaho ŭžo bolš za miljon padpisčykaŭ
Pavieł pakazvaje, jak robić ramonty pad kluč, i raźbiraje častyja pamyłki.
Pavieł Sidoryk — minski śpiecyjalist pa ramoncie. A bolš jak 10 hadoŭ tamu, u vieraśni 2015 hoda, mužčyna vyrašyŭ zapuściŭ svoj jutub-kanał. U samym pieršym videa małady čałaviek razam z kaleham raskazvaje i pakazvaje, jak nanosić špatloŭku na ścieny z dapamohaj admysłovaha aparata. U videa ciapier 47 tysiač prahladaŭ. Zatoje nastupnaje — pra pamyłki, jakija dapuskajuć pry ramoncie na kuchni, — zalacieła na 1,3 miljona prahladaŭ.
Ahułam na kanale bolš za 300 videa. U bolšaści ź ich aŭtar pakazvaje, jak treba vykonvać adździełačnyja, santechničnyja i inšyja raboty. Sakret pośpiechu, vidać, u nadzionnych temach, jakija chvalujuć mnohich z tych, chto vyrašyŭ rabić ramont ułasnaručna.
Ciapier na jutub-kanał «Pavieł Sidorik. Riemont i otdiełka» padpisanyja bolš za 1,1 miljona čałaviek. Samaje papularnaje videa «Ramont kvatery. 1 hod za 60 chvilin. Usio rablu sam» maje 23 miljony prahladaŭ.
Taksama Pavieł robić ahlady abjektaŭ, na jakich rabiŭ ramont ad A da Ja. Adzin z apošnich — ramont pad kluč u kvatery na 60 mietraŭ u Novaj Baravoj.
Z hetaj ža kvateraj vyjšła 4‑hadzinnaje videa, u jakim pakazvajecca ŭvieś praces ramontu ad hołych ścien da całkam hatovaha žytła. Ź jaho vynikaje, što ŭvieś hety praces zaniaŭ paŭtara hoda.
Pad hetym, jak i pad inšymi videa błohiera-budaŭnika, šmat pazityŭnych kamientaroŭ, u jakich hledačy dziakujuć jamu za infarmacyju. Mnohija adznačajuć prafiesijanalizm: «Takuju jakasnuju pracu nie soramna vystavić na ahlad! Kožny etap — supierprafiesijna».
«Pryjemna hladzieć videa ad tvorčaha i pracavitaha čałavieka. Cikava i zajmalna. Pośpiechaŭ!»
Jość i krytyčnyja kamientary: «Na vychadzie prościeńka niejak, panyła… Błatnoje miesca i pavierch, stolki času i pracy, a nadać šyku i razynački kvatery niečaha nie chapiła».
Aproč ramontaŭ u kvaterach, Pavieł niekalki hadoŭ tamu nabyŭ sabie ŭčastak za 35 kiłamietraŭ ad Minska, dzie buduje sabie dom, pra što taksama zdymaje roliki.
Apošni vyjšaŭ litaralna na dniach. U im błohier raspaviadaje, što vyrašyŭ źmianić prajekt i abraŭ rabić płoski dach.
Aproč ułasnaha kanała na jutubie, Pavieł Sidoryk byŭ ekśpiertam u TB-šou «Naš ramont» (anałah rasijskaha «Kvaternaha pytańnia»). Viadoŭcami «Našaha ramontu» ŭ roznyja časy byli šoŭmien Jaŭhien Bułka i śpiavak Vital Karpanaŭ.
Taksama błohier-budaŭnik aktyŭna ŭdzielničaje ŭ roznych źlotach majstroŭ i inšych mierapryjemstvach dla budaŭnikoŭ.
Jak vynikaje z publikacyi ŭ časopisie, dzie Paŭła nazvali «Dudziom u temie ramontaŭ», da prychodu ŭ błohierstva i budaŭnictva biełarus dziesiać hadoŭ adpracavaŭ u maskoŭskaj drukarni.
«Mama, davaj napišam zajavu ŭ milicyju, jon mianie ŭžo dastaŭ». Maci školnika z Bresta, jaki skončyŭ žyćcio samahubstvam, raskazała pra ckavańnie syna2929
Kamientary