Krainy ES zaklikali raspracavać płan baraćby z rasijskaj prapahandaj
Litva, Vialikabrytanija, Danija i Estonija zaklikali Jeŭrakamisiju raspracavać płan dziejańniaŭ dla baraćbie z rasijskaj prapahandysckaj kampanijaj.
Pra heta havorycca ŭ liście ministraŭ zamiežnych spraŭ čatyroch krain, jaki adrasavany kiraŭniku zamiežnapalityčnaj ustanovy ES Fiederycy Mahieryni, paviedamlaje Delfi.lt.
List padpisali ministry Litvy, Vialikabrytanii, Danii i Estonii Linas Linkiavičus, Filip Chemand, Marcin Lidehor i Kiejt Pientus-Razimanus.
Jany papiaredzili, što «Rasija chutka pašyraje svaju kampaniju dezinfarmacyi i prapahandy» z metaj padtrymki «palityčnych i vajskovych metaŭ rasijskaha ŭrada».
Ministry zaklikali zabiaśpiečyć nadziejnuju i kankurentazdolnuju infarmacyjnuju alternatyvu dla ruskamoŭnych žycharoŭ i tych, chto karystajecca «kantralavanymi Rasijaj ŚMI».
Jany prapanavali abmierkavać temu rasijskaj prapahandy na sustrečy ministraŭ krain ES na pačatku hoda i zaklikali zamiežnapalityčnuju ŭstanovu ES raspracavać płan dziejańniaŭ na 2015—2016 hh.
Aŭtar inicyjatyvy — kiraŭnik MZS Litvy Linas Linkiavičus u piatnicu skazaŭ, što ministry «nie prapanoŭvajuć cenzuru ci zabaronu, ale chočuć, kab byli stvoranyja ŭmovy dla pa-sapraŭdnamu biesstarońnich, svabodnych krynic infarmacyi».
Pavodle jaho, Rasija vydzialaje miljardnyja sumy kantralavanym dziaržavaj ŚMI i tamu treba «ŭmacavać ustojlivaść hramadstva da manipulacyj».
«Chaciełasia b, kab my nie tolki na słovach, ale i kankretnymi dziejańniami nadavali bolš uvahi stvareńniu ŭmoŭ dla taho, kab ludzi atrymlivali alternatyŭnuju, svabodnuju, abjektyŭnuju infarmacyju. Ni ŭ jakim vypadku jana nie pavinna kantralavacca inšaj «spraviadlivaj» uładaj, bo heta taksama niesvabodnaja infarmacyja», — skazaŭ ministr.
Prynamsi ŭ liście ŭ Brusel prapanujecca stvaryć u internecie płatformu, na jakoj budzie padavacca infarmacyja ab chłuśni i manipulacyi, prapahandzie, nadavacca padtrymka inicyjatyvam dla stvareńnia telekanałaŭ, sietkavych partałaŭ, radyjostancyj i drukavanych ŚMI na ruskaj movie, jakija buduć zaachvočvać abmien pradukcyjaj ŭnutry ES, prapanoŭvać źmiest dziejnym rasiejskim ŚMI.
Nahadajem, raniej prezident Estonii Toomas Chiendryk Ilvies zaklikaŭ zhurtavacca dla baraćby suprać prapahandy Kramla i «paralelnaj realnaści», jakuju Rasija stvaraje ŭ infarmacyjnaj prastory.
Ciapier čytajuć
Łukašenka vykazaŭsia pra deficyt miedykaŭ i prapanavaŭ im pracavać bolš9
Kamientary