Hienprakuratura pravodzić pravierku pa fakcie budaŭnictva pablizu Kurapataŭ
Pavodle infarmacyi členaŭ hramadzianskaj inicyjatyvy «Ekśpierty ŭ abaronu Kurapataŭ», Hienieralnaja prakuratura Biełarusi pravodzić pravierku nakont vykanańnia pradpisańnia ab likvidacyi parušeńnia zakanadaŭstva na terytoryi pablizu ŭročyšča Kurapaty, nakiravanaha ŭ Minabłvykankam jašče u kancy 2012 hoda.
Ab hetym na pres-kanfierencyi 12 studzienia ŭ Minsku paviedamiŭ žurnalist i člen inicyjatyvy Marat Haravy.
Nahadajem, tady Hienprakuratura ŭbačyła parušeńnie zakanadaŭstva ab achovie historyka-kulturnaj spadčyny ŭ tym, što niekalki hadoŭ tamu STAA «BiełRestInviest» pabudavała pablizu Kurapataŭ čatyry budynki zapłanavanaha ŭ hetym miescy zabaŭlalnaha kompleksu, jaki raniej nasiŭ nazvu «Bulbaš-choł». Hetyja budynki, jak paćvierdzili pradstaŭniki hramadskaści i dziaržorhany, akazalisia uźviedzienymi ŭ zaćvierdžanaj Ministerstvam kultury achoŭnaj zonie Kurapataŭ, pryznanych pomnikam mižnarodnaha značeńnia. Niahledziačy na toje što Hienprakuratura pradpisała ŭ miesiačny termin likvidavać samo parušeńnie, a taksama pryčyny i ŭmovy, jakija hetamu sadziejničajuć, praz dva hady sprečnyja abjekty znachodziacca na raniejšym miescy.
1 śniežnia minułaha hoda Ministerstva kultury pryniało pastanovu «Ab zaćviardžeńni prajekta zon achovy historyka-kulturnaj kaštoŭnaści «Miesca hibieli achviar palityčnych represij (1930—1940-ja hady) va ŭročyščy Kurapaty (Minski rajon)», jakaja admianiła raniejšuju schiemu achoŭnych zon i ŭstanaviła novuju.
Hetym dakumientam, akramia inšaha, terytoryja, na jakoj byli pabudavany sprečnyja abjekty, vyviedziena z achoŭnaj zony historyka-kulturnaj kaštoŭnaści.
Pavodle słoŭ Haravoha, 4 śniežnia 2014 hoda členy inicyjatyvy pa abaronie Kurapataŭ nakiravali ŭ Hienprakuraturu zajavu, u jakoj nahadali, što 24 miesiacy tamu hetym orhanam było vyniesiena zhadanaje pradpisańnie, jakoje dahetul nie vykanana. «My prosim vas pravieści pravierku i raspačać kryminalnuju spravu suprać tych, chto nie vykanaŭ vaša pradpisańnie», — pracytavaŭ hramadzianski aktyvist tekst nakiravanaha ŭ prakuraturu dakumienta.
Jon dadaŭ, što, pavodle infarmacyi krynic, prakuratura ŭžo vyklikała šerah ludziej dla dačy rastłumačeńniaŭ pa faktach, vykładzienych u hetaj zajavie.
Kamientary