Mindziča — fihuranta hučnaj karupcyjnaj spravy va Ukrainie i paplečnika Zialenskaha — znajšli ŭ Izraili. Što jon skazaŭ?

Va Ukrainie ŭ listapadzie razhareŭsia karupcyjny skandał vakoł «Enierhaatama» (sprava «Midas»). Adzin z hałoŭnych fihurantaŭ spravy — biznesoviec Cimur Mindzič, suŭładalnik studyi «Kvartał 95» i paplečnik Uładzimira Zialenskaha.

Žurnalisty «Ukrainskaj praŭdy» znajšli jaho ŭ Izraili. Jaho sustreli ŭ elitnym pradmieści Tel-Aviva. Mindzič pakinuŭ Ukrainu za 4 hadziny da vobšukaŭ u jaho. Biznesoviec maje hramadzianstva Izraila jak minimum z 2022 hoda.

Mindzič, jakoha Nacyjanalnaje antykarupcyjnaje biuro Ukrainy (NABU) padazraje ŭ karupcyi ŭ śfiery enierhietyki i ŭ dačynieńni da jakoha ŭviali ŭkrainskija sankcyi, zajaviŭ pra vialikuju miedyjnuju ataku suprać jaho i admoviŭsia kamientavać jurydyčny składnik spravy.

Jon zajaviŭ «Ukrainskaj praŭdzie», što jość «vialiki miedyjny kiejs, jaki składaje kala 90% spravy».

«To-bok mianie abvinavacili, mnie prypisali, mianie miedyjna zrabili vinavatym», — skazaŭ jon, dadaŭšy, što jość i «jurydyčny kiejs».

«U jurydyčnym kiejsie ja nie vielmi mahu davać kamientaryi, tamu što jość advakaty, jość usia historyja, jakuju ja nie mahu kamientavać», — skazaŭ Mindzič.

Jon admaŭlaje, što kali-niebudź davaŭ niejkija ŭkazańni Rustemu Umieravu, jaki byŭ ministram abarony. Pry hetym paćvierdziŭ, što zapis razmovy z Umieravym, jakuju publikavała Nacyjanalnaje antykarupcyjnaje biuro Ukrainy, sapraŭdny, ale hutarka vyrvanaja z kantekstu.

Mindzič skazaŭ, što daŭno nie kantaktuje ź Zialenskim.

Inšy fihurant spravy biznesoviec Alaksandr Cukierman u kamientaryi «Ukrainskaj praŭdzie» taksama zajaviŭ, što «detektyvy NABU razam jašče ź niekim stvaryli kino», majučy na ŭvazie apublikavanyja zapisy.

Što za karupcyjnaja sprava «Midas»

Ranicaj 10 listapada stała viadoma pra toje, što NABU pravodzić pieratrusy ŭ biznesoŭca Cimura Mindziča i ŭ tahačasnaha ministra justycyi Hiermana Hałuščanki. Tady ž krynicy «Ukrainskaj praŭdy» paviedamili, što Mindzič uciok za miažu za niekalki hadzin da pieratrusu.

U toj ža dzień Nacyjanalnaje antykarupcyjnaje biuro Ukrainy paviedamiła, što vykryła maštabnuju karupcyjnuju schiemu kradziažu srodkaŭ u śfiery enierhietyki, a taksama apublikavała aŭdyjazapisy pieramoŭ fihurantaŭ u hetaj spravie.

11 listapada žurnalisty vyjavili imiony ŭsich fihurantaŭ rasśledavańnia masavaj karupcyi ŭ «Enierhaatamie», jakija atrymali padazreńnie ad NABU. Pavodle infarmacyi prajekta «Schiemy», padazreńni atrymali Cimur Mindzič (jakoha na apublikavanych NABU aŭdyjazapisach nazyvajuć «Karłsan»), eks-daradca ministra enierhietyki Ihar Miraniuk («Rokiet»), vykanaŭčy dyrektar pa biaśpiecy «Enierhaatama» Dźmitryj Basaŭ («Tenar»), Alaksandr Cukierman («Šuharmien»), Ihar Fursienka («Rešyk»), Lesia Uścimienka i Ludmiła Zoryna.

Piać čałaviek sa śpisa padazravanych zatrymanyja. Dvoje — Mindzič i Cukierman — vyjechali z Ukrainy.

13 listapada prezident Uładzimir Zielenski ŭvioŭ u dziejańnie pastanovu Rady nacyjanalnaj biaśpieki i abarony ab sankcyjach suprać Mindziča i biznesoŭca Alaksandra Cukiermana.

22 listapada stała viadoma, što Ukraina abviaściła ŭ vyšuk fihurantaŭ spravy «Midas» Cimura Mindziča i Alaksandra Cukiermana, jakija padazrajucca va ŭčynieńni karupcyjnych złačynstvaŭ.

• 2
• 0
• 4
• 2
• 1
• 0
• 5
• 0