Čym zajmałasia «Biełaja Ruś» u minułym hodzie?

Siarod planaŭ na 2007 h. u haradzienskim abjadnańni «BR» značyŭsia cikavy punkt: u peryjad praviadzieńnia padpisnoj kampanii vieści pracu pa pavieličeńni kolkaści padpisčykaŭ na dziaržaŭnyja peryjodyki.

Hramadzkaje abjadnańnie «Biełaja Ruś» było stvoranaje ŭ červieni 2004 h. u Horadni z metaj «padtrymki palityčnaha kursu krainy, abjadnańnia prahresiŭnych siłaŭ hramadztva na asnovie idealohii biełaruskaj dziaržavy». U traŭni 2007 h. rektar Haradzienskaha dziaržaŭnaha ahrarnaha ŭniversytetu Vitold Pieścis inicyjavaŭ stvareńnie piarvičnych arhanizacyjaŭ HA «Biełaja Ruś» pa ŭsioj krainie. Pavodle aficyjnaj infarmacyi na siońnia ŭ skład abłasnoj arhanizacyi «BR» uvachodziać 1 haradzkaja (Horadnia), 17 rajonnych i bolš za 580 «piarvičak». Usiaho haradzienskaje abjadnańnie naličvaje kala 10 tysiač siabroŭ. Čym zaniataja takaja kolkaść ludziej, i čym ich dziejnaść adroźnivajecca ad dziejnaści BRSM, ź jakim «Biełuju Ruś» pačali paraŭnoŭvać z momantu pieršych zhadak pra arhanizacyju, žartam nazyvajučy «beerseemam dla darosłych»? Prapanujem pašukać adkaz na hetaje pytańnie, najpierš praanalizavaŭšy pracu «piarvički» «Biełaj Rusi» Haradzienskaha dziaržaŭnaha ahrarnaha ŭniversytetu, čyj rektar i «zavaryŭ kašu». Piarvičnaja arhanizacyja HDAU była stvoranaja ŭ lutym 2005 h. Na siońnia ahulnaja kolkaść jaje siabroŭ składaje 239 čałaviek, ź ich vykładčykaŭ — 62, supracoŭnikaŭ — 22, studentaŭ 151 i aśpirantaŭ — 4.

Na minuły hod ŭniversyteckaja «piarvička» zaplanavała mierapryjemstvy arhanizacyjnaha, infarmacyjnaha, idealahičnaha, vychavaŭčaha, spartyŭna‑ i kulturna‑masavaha, azdaraŭlenčaha i ekalahičnaha charaktaru. Siarod ich vyłučajucca niekatoryja punkty: vieści pracu pa pavieličeńni kolkaści padpisčykaŭ na dziaržaŭnyja vydańni ŭ peryjad praviadzieńnia padpisnoj kampanii, pryniać aktyŭny ŭdzieł u vybarach u miascovyja orhany ŭłady. U astatnim plany «biełych rusaŭ» mała čym roźnilisia ad planaŭ siabroŭ universyteckaj arhanizacyi BRSM — usio tyja ž studenckija budatrady, dapamoha veteranam, dy ekskursii ŭ Biełavieskuju pušču dy na «liniju Stalina». Akramia taho starejšyja tavaryšy paciaśnili małodšych patryjotaŭ u arhanizacyi ŭniversyteckich śviataŭ i konkursaŭ. Bolš za toje, šerah mierapryjemstvaŭ dublujecca ŭnutry samoj arhanizacyi: tak, udzieł u fotavystavie «Fłora i faŭna» adnačasova zaplanavany ŭ ramkach kulturna‑masavaj pracy i dziejnaści ekalahičnaha hurtka «Pryniamońnie».

Pryciahvaje ŭvahu afarmleńnie ŭniversyteckaha sajtu. Hałoŭnaja staronka nahadvaje sajt niejkaj rasiejska‑brytanskaj kampanii — infarmacyja pra ruska‑ i anhłamoŭny interfejs vykananaja ŭ vyhladzie ściahoŭ RF i Vialikabrytanii. Biełaruskaj movy na sajcie, jak i ŭ raździele, pryśviečanym arhanizacyi, zaklikanaj «abjadnać prahresiŭnyja siły hramadztva na asnovie idealohii biełaruskaj dziaržavy», niama. U hetym kantekście nia dzivić, što aficyjnaja nazva našaj krainy napisanaja z pamyłkaj — respublika Biełaruś.

U miežach Horadni «Biełaja Ruś» zaśviaciłasia ŭletku minułaha hodu, kali abłasnyja ŭłady źbirali tak zvany «Saviet palityčnych partyj i hramadzkich arhanizacyj». Jaho zadačaj było zaśviedčyć padtrymku hramadzkaści rekanstrukcyi ŭ Starym horadzie.

• 0
• 0
• 0
• 0
• 0
• 0
• 0
• 0