Sadzić buduć mieniej, štrafavać čaściej. Prakuratura prapanuje humanizacyju zakanadaŭstva

Hieneralny prakuror Biełarusi Piotar Mikłaševič 16 studzienia adkazaŭ na pytańni žurnalistaŭ adnosna hučnych kryminalnych spravaŭ i pracy Hieneralnaj prakuratury za 2007 hod.

Kryminalnyja spravy suprać byłoha dyrektara «Biełnaftachimu» Alaksandra Baroŭskaha ŭžo ŭ pačatku lutaha pačnie razhladać Viarchoŭny sud. Słuchańni buduć adkrytymi. Suprać Baroŭskaha zaviedzienyja try kryminalnyja spravy: pa artykule 210 «Kradziež šlacham złoŭžyvańnia zajmajemaj pasadaj» i 424 «Złoŭžyvańnie słužbovymi paŭnamoctvami». Aproč hetaha, viadziecca śledztva pa artykule 375 «Razhałošvańnie słužbovaj tajamnicy». Razam z tym, Baroŭski nie kampensavaŭ straty, jakija nanios dziaržavie, kali znachodziŭsia na vysokaj pasadzie.

Krychu inšaja sytuacyja nazirajecca ŭ kryminalnaj spravie suprać kiraŭnictva «Tajota‑centru». Jany całkam spłacili dziaržavie naniesienyja straty, jakija raŭnialisia 7 miljardam rubloŭ. Sprava suprać ich była zaviedzienaja za ŭchileńnie ad vypłaty myty pry ŭvozie ŭ krainu trochsot aŭtamabilaŭ. Piotar Mikłaševič paviedamiŭ, što abvinavačanyja źviarnulisia da A.Łukašenki z prośbaj ab vyzvaleńni ad kryminalnaj adkaznaści. Pakul adkazu niama. Śledztva pa hetaj spravie ŭžo skončanaja, ciapier adbyvajecca aznajamleńnie z materyjałami.

Što datyčyć apošniaj hučnaj kryminalnaj spravy — dyrektara ŭnitarnaha pradpryjemstva UP «Mienskhaz» Viktara Mielaškieviča, to suprać jaho vysunutyja dva abvinavačvańni: atrymańnie chabaru i złoŭžyvańni słužbovych paŭnamoctvaŭ. Pa słovach prakurora, Mielaškievič braŭ chabar za «vyrašeńnie pytańniaŭ, jakija ŭvachodzili ŭ jaho kampetencyju».

KDB praciahvaje raśśledavańnie kryminalnaj spravy śmierci biełaruskich lotčykaŭ u Samali. Užo dakładna viadoma, što adbyŭsia terakt, ale pakul nie atrymlivajecca znajści jaho vykanaŭcaŭ. Biełaruskija specsłužby spadziajucca na dapamohu amerykancaŭ, jakija nibyta viali zdymki tych miaścin sa spadarožnika.

Prakuratura praciahvaje raśśledavańnie kryminalnych spraŭ pa faktach źniknieńnia viadomych biełaruskich palitykaŭ i žurnalistaŭ, ale nijakaj novaj infarmacyjaj jany ciapier nie vałodajuć. Adnosna listoŭ Valerja Ihnatoviča da Łukašenki z prośbaj ab pierahladzie jahonaj spravy, to hieneralny prakuror upeŭnieny: niama ničoha, što b staviła prysud pad sumnieŭ.

Piotar Mikłaševič paviedamiŭ, što ŭ sud nakiravany materyjały treciaha etapu śledztva pa bandzie Marozava. Razam z tym, u prakuratury ŭźnikajuć prablemy z ekstradycyjaj złačyncaŭ u Biełaruś. Niekalkich fihurantaŭ spravy Marozava nia mohuć ekstradziravać z Rasiei, bo jany prosiać tam hramadzianstva.

Taksama Hieneralnaja prakuratura supolna ź Viarchoŭnym sudom raspracavali zakonaprajekt, nakiravany na «humanizacyju» artykułaŭ Kryminalnaha kodeksu. Ciapier vyniki hetaj pracy nakiravanyja ŭ Administracyju prezydenta. Pa słovach Mikłaševiča, hety prajekt dazvolić bolš adekvatna padychodzić da mieraŭ pakarańnia złačyncaŭ. Mikłaševič paviedamiŭ, što 90% złačynstvaŭ u Biełarusi nie pradstaŭlajuć značnaj hramadzkaj niebiaśpieki, tamu buduć bolš šyroka prymianiacca ekanamičnyja sankcyi, a nie pazbaŭleńnie svabody. Darečy, na siońniašni momant u biełaruskich turmach znachodzicca 30 tysiač čałaviek.

Hieneralnaj prakuraturaj stvoranaja baza dadzienych pa złačynstvach i pravaparušeńniach hramadzian. Źviestki z bazy dadzienych mohuć vykarystoŭvać tolki supracoŭniki adpaviednych orhanaŭ, jakija raśśledvajuć peŭnyja spravy. Pa słovach Mikłaševiča, tolki pa administracyjnych pravanarušeńniach sabrana daśje na 1 miljon 200 tysiač čałaviek.

Naprykancy pres‑kanferencyi Piotar Mikłaševič abvierh čutki, što naprykancy minułaha hodu jon pisaŭ A.Łukašenku rapart z prośbaj vyzvalić jaho z pasady. «Heta niapraŭda», — skazaŭ hienprakuror.

Źmicier Pankaviec

• 0
• 0
• 0
• 0
• 0
• 0
• 0
• 0