Prychilniki «russkoho mira» nazvali śviatkavańnie Dnia Voli «šeściem fašystaŭ»

Hrupa «Antimajdan #Biełaruś» u rasiejskaj sacyjalnaj sietcy «ŬKantakcie» nazvała tradycyjnaje śviatkavańnie Dnia Voli ŭ Miensku «šeściem fašystaŭ».

Hrupa, administratar jakoj ananimny, zaklikała nakiroŭvać zvaroty na imia staršyni Mienskaha harvykankamu Andreja Šorca z zaklikam «adchilić zajaŭku na praviadzieńnie mierapryjemstva». Styl zvarotu, napisanaha nieviadomymi aŭtarami, patasny:

«Składana ŭjavić, jak siabie adčuvajuć hieroi-veterany i ich blizkija, kali pa centralnych vulicach biełaruskaj stalicy chodziać maładziony z partretami Šuchieviča i Bandery, vykrykvajučy nacyjanalistyčnyja skandoŭki pad symbolikaj fašysckich kalabarantaŭ».

Uzhadvajucca i majučyja sioleta adbycca prezydenckija vybary:

«Tamu mabilizacyja palityčnych marhinalnych ruchaŭ pad fašysckimi lozunhami vyklikaje i ahulnuju zaniepakojenaść u suviazi sa zbrojnym kanfliktam va Ŭkrainie».

A zaviaršajecca zvarot zaklikam: «Čas spynić hetaje štohadovaje prynižeńnie biełaruskaha narodu!»

Amal adnačasova na internet-resursie «Ridus. Ahientstvo hraždanskoj žurnalistiki» źjaviŭsia artykuł Alaksandra Prymakova «26 krasavika ŭ Miensku mahčymyja nieparadki pry ŭdziele haściej z Ukrainy».

Aŭtar artykuła śćviardžaje, što «zachodnija specsłužby raspačali aktyŭnuju padrychtoŭku da pravakacyjaŭ u Biełarusi, kančatkovaj metaj jakich źjaŭlajecca źmiena ŭłady ŭ susiedniaj krainie». U artykule ŭzhadvajucca padziei amal 20-hadovaj daŭniny — Čarnobylski šlach 1996 hodu, kali ŭ Miensk pryjechali pradstaŭniki UNA-UNSO.

Chto raspaŭsiudžvaje takuju infarmacyju, kamu vyhadna nahniatać napružanaść pierad viasnovymi akcyjami biełaruskaj apazycyi? Na hetaje pytańnie Svaboda paprasiła adkazać kiraŭnika analityčnaha prajektu Belarus Security Blog Andreja Paratnikava.

«Ja b nia staŭ šukać tut sensacyju, tamu što peryjadyčna źjaŭlajucca takija mutnyja zakliki mutnych ludziej. Naahuł, nieviadoma, ci isnujuć hetyja ludzi ŭ pryrodzie ŭ pryncypie. Mianie bolš cikavić pytańnie, adkul nohi rastuć. Tamu što heta moža być jak źniešniaja pravakacyja, tak i ŭnutranaja, źviazanaja z baraćboj za ŭpłyvovyja resursy».

Na dumku Andreja Paratnikava, biełaruskija specsłužby pavinny na takija «ŭkidy» infarmacyi reahavać. Pryčym zakon dazvalaje hetym zajmacca lubym specsłužbam i siłavym strukturam: i MUS, i KDB, i Infarmacyjna-analityčnamu centru, i Słužbie biaśpieki prezydenta — usie jany majuć i paŭnamoctvy, i techničnyja mahčymaści. I ŭ pieršuju čarhu jany pavinny hieahrafična vyznačyć punkt, adkul hetyja hrupoŭki kirujucca:

«Moža zdarycca, što jany kirujucca, pa-pieršaje, z-za miežaŭ našaj krainy; pa-druhoje, z terytoryi našaj krainy: z pasolstva adnoj z susiednich krain; albo z terytoryi adnoj ź dziaržaŭnych arhanizacyjaŭ, siłavych struktur u našaj krainie, jakaja takim niachitrym sposabam sprabuje dakazać svaju patrebnaść i značnaść i, adpaviedna, atrymać dadatkovaje biudžetnaje finansavańnie».

Na dumku eksperta Andreja Paratnikava, niahledziačy na baraćbu za finansavyja resursy ŭnutry siłavoha bloku, tut maje miesca faktar źniešni, sproba razhajdać sytuacyju zvonku.

Da taho ž, jak śćviardžaje ekspert, na ciapierašni momant usie prarasiejskija, rusafilskija, słavianafilskija, eŭrazijskafilskija arhanizacyi — marhinalizavanyja, davoli niešmatlikija, i ŭsie jany, pa sutnaści, «pad kaŭpakom». Tamu značna bolšuju niebiaśpieku z punktu hledžańnia dziejnaha režymu ŭjaŭlajuć niearhanizavanyja prychilniki «russkoho mira».

Na dumku Paratnikava, hetyja ludzi nie ŭvachodziać ni ŭ jakija arhanizacyi, jany pierapisvajucca ŭ sietcy «Ŭkantakcie», pierapoščvajuć niejkija malunki, zakliki, pieśni, ale pry hetym adbyvajecca niezaŭvažna samaradykalizacyja — ludzi pahružajucca ŭ hety anturaž, i jon pačynaje im zamianiać realnaje žyćcio, realny śviet. Praz takija hrupy, jakija byccam by stvoranyja realnymi ludźmi, ažyćciaŭlajecca zbor bazy dadzienych pra voś takich samaradykalizavanych, niearhanizavanych ludziej, jakija nikudy nia chodziać i, akramia znosinaŭ u sacyjalnych sietkach, nijakaj aktyŭnaści nie prajaŭlajuć.

Spadar Paratnikaŭ miarkuje, što ŭ kryzisny momant značnuju ich častku možna arhanizavać i kinuć dla niejkich pravakacyjaŭ.

«To bok, ja dumaju, idzie praca na budučyniu. Heta praca dosyć pradumanaja, i ciapier, sutyknuŭšysia z procidziejańniem biełaruskich specsłužbaŭ, peŭnyja źniešnija hulcy sprabujuć abapiercisia na voś hetuju častku — jakaja niearhanizavanaja, a tamu słaba adsočvajecca, — patencyjnych prychilnikaŭ voś hetaha «russkoho mira»», — miarkuje spadar Paratnikaŭ.

Hrupa «Antimajdan #Biełaruś» u sacyjalnaj sietcy «Ŭkantakcie» — adnosna nievialikaja, u joj zarehistravana 1556 čałaviek. Kolki ź ich nakiravała zvarot da staršyni Mienharvykankamu z zaklikam zabaranić akcyju 25 sakavika, nieviadoma.

Na dumku adnaho z zajaŭnikaŭ akcyi na Dzień Voli Alaksieja Janukieviča, usie hetyja infarmacyjnyja «ŭkidy» — častka šyrejšaj infarmacyjnaj ataki na Biełaruś, jakaja pačałasia ŭ źviazku z nabližeńniem prezydenckich vybaraŭ. I akcyja 25 sakavika ci «Čarnobylski šlach» — nie asnoŭnyja jejnyja mety:

«Adnak jany imknucca vykarystać i ŭ tym liku voś hetyja akcyi, stvaryć adpaviednuju atmasferu vakoł ich, kab razhojdvać sytuacyju — ci, jak minimum, vypraboŭvać sytuacyju, nakolki jana moža razhojdvacca. Pry tym, što, naturalna, padtrymki ŭ hramadztvie takija zakliki nia majuć nijakaj. Ale dla peŭnych rasiejskich infarmacyjnych resursaŭ heta moža być nahodaj, kab cytavać zvaroty aburanych biełaruskich hramadzianaŭ, to bok stvarać bačnaść, nibyta tut, u Biełarusi, narod vystupaje suprać nacyjanalnaj idei i suprać akcyjaŭ, jakija ładziać nacyjanalnyja siły».

Ale pilnaść na akcyi ŭ Dzień Voli, kali ŭłady jaje dazvolać, budzie padvyšanaja, chacia ŭ ciapierašniaj sytuacyi stvarać admysłovyja družyny dziela achovy paradku pieraškadžaje milicyja, kaža lider Partyi BNF Alaksiej Janukievič:

«Adnak z našaha boku buduć jak minimum jasnyja, zrazumiełyja instrukcyi, zakliki dla ŭdzielnikaŭ šeścia. I pra toje, jak ludziam siabie pavodzić, reahavać na mahčymyja pravakacyi. Nu i, naturalna, što tyčycca źmiestu plakataŭ, źmiestu infarmacyjnych materyjałaŭ, my jašče dadatkovyja vysiłki prykładziem, kab utrymać jasnuju idealahičnuju, idejnuju liniju, što 25 sakavika — heta adznačeńnie Dnia biełaruskaj Niezaležnaści, kab nia dać padstavaŭ dla niejkich pravakacyjaŭ. Budziem zaklikać sumnieŭnyja lozunhi prybirać».

Pavodle stanu na 15 hadzin 18 sakavika dazvołu na praviadzieńnie akcyi 25 sakavika pakul niama. Krajni termin adkazu Mienharvykankamu — 20 sakavika, za 5 dzion da padziei.

• 0
• 0
• 0
• 0
• 0
• 0
• 0
• 0