Kitaj abviaściŭ pra adkryćcio najbujniejšaha ŭ Azii padvodnaha radovišča zołata. Jano znachodzicca kala paŭnočna-ŭschodniaha ŭźbiarežža krainy, pobač z paŭvostravam Šańdun, i, pavodle acenak, utrymlivaje sotni ton kaštoŭnaha mietału, piša South China Morning Post.
Jak paviedamlajuć kitajskija ŭłady, heta adkryćcio značna pavialičyła ahulnyja paćvierdžanyja zapasy zołata ŭ rajonie haradskoha pavieta Łajčžoŭ — ciapier jany pieravyšajuć 3900 ton.
Takim čynam, rehijon vyjšaŭ na pieršaje miesca ŭ krainie jak pa zapasach, tak i pa zdabyčy zołata, što składaje kala čverci ŭsich załatych resursaŭ Kitaja. Pry hetym dakładny abjom mienavita padvodnaha radovišča pakul nie raskryvajecca.
Apošnija hady Kitaj aktyŭna raźvivaje hieołaharaźviedku: z 2021 hoda ŭ hetuju śfieru było ŭkładziena kala 64 miljardaŭ dalaraŭ, u vyniku čaho adkryta kala 150 novych radoviščaŭ karysnych vykapniaŭ. Novaja znachodka śviedčyć, što realnyja zapasy zołata ŭ krainie mohuć być značna bolšymi, čym mierkavałasia raniej, asabliva na fonie rostu suśvietnych cen na hety mietał.
Kitaj zastajecca najbujniejšym u śviecie zdabyŭcam załatoj rudy — letaś u krainie było zdabyta 377 ton. Adnak pa paćvierdžanych zapasach zołata jon usio jašče sastupaje Paŭdniovaj Afrycy, Aŭstralii i Rasii.
Zołata važnaje nie tolki jak srodak abarony ad finansavych ryzyk, ale i jak stratehičny materyjał dla pramysłovaści, u tym liku elektroniki i aerakaśmičnaj haliny.
Ciapier čytajuć
«Biełaruś ciabie lubić». Repartaž z raźvitańnia ź Mikitam Miełkazioravym6
Kamientary