Vykładčyca MDŁU Jaleckaja: Nichto nie naviazvaje studentam niejkija pohlady
U redakcyju «Našaj Nivy» čytač dasłaŭ list, u jakim aburajecca śpisam ekzamienacyjnych tem dla ispytu pa adnym z kursaŭ 5-ha kursa pierakładčyckaha fakulteta Minskaha dziaržaŭnaha linhvistyčnaha ŭniviersiteta.
Jon aburaŭsia farmuloŭkaj temaŭ u palityčnym błoku śpisu: temy pieradajuć prarasijski i antyzachodni pohlad na palityčnyja padziei, u tym liku na kryzis va Ukrainie.
Karespandent «NN» pahutaryŭ z vykładčycaj MDŁU Alenaj Jaleckaj, jakaja składała ekzamienacyjnyja pytańni. Jaleckaja patłumačyła, što farmuloŭka tem zaklikaje da dyskusii, a studentaŭ nie schilajuć da niejkaha kankretnaha pohladu:
«Naš kurs nazyvajecca «Discussion. Debates» (Dyskusija. Debaty). Asnoŭnaja zadača studentaŭ — navučycca arhumientavana adstojvać niejki punkt hledžańnia. Vy možacie mieć svoj pohlad, ale vy musicie abjektyŭna hladzieć na prablemy. A farmuloŭka temy — heta tolki materyjał dla debataŭ, takim čynam jany mohuć być paviornutyja inšym bokam.
Voś u nas jość tema pra aborty. Jana moža być sfarmulavana jak «Abort — vybar žančyny», a moža być sfarmulavana jak «Abort — naŭmysnaje zabojstva dziciaci». I nichto nie prymušaje studentaŭ kazać, što tak heta i jość, nichto nikoha ni da jakoha punktu hledžańnia nie prymušaje».
Što tyčycca padziej va Ukrainie, to Jaleckaja zapeŭniła, što, naprykład, u minułym hodzie tema pra Majdan była sfarmulavana jak «People's revolution» — to bok «Narodnaja revalucyja».
Ciapier čytajuć
U čym pryčyna niezadavolenaści žycharoŭ mikrarajona Lebiadziny ŭ Minsku? Voś što nasamreč tam płanavali budavać6
Kamientary