Pieršaja biełaruskaja RSZA «Pałanez» moža adkryć novuju staronku ŭ biełaruskim VPK
Na paradzie 9 Maja ŭ Minsku budzie prademanstravanaja pieršaja stvoranaja ŭ Biełarusi sistema załpavaha ahniu «Pałanez». Heta ciažki pa ahniavoj mocy, ale vysokamabilny kompleks, jaki, zhodna z paviedamleńniami ŚMI, moža mieć pavyšanuju dalokaść stralby.
RSZA ŭstanoŭlenaja na čatyrochvosnym šasi vysokaj prachodnaści MZKC-7930. Minski zavod kołavych ciahačoŭ («Vołat») maje hłyboki dośvied raspracoŭki i sieryjnaj pastaŭki šasi roznych kłasaŭ dla rakietnych sistem. Pakul niama kankretnych dadzienych pra sistemu kiravańnia ahniom novaha kompleksu, adnak možna z peŭnaściu skazać, što biełaruski vajenna-pramysłovy kompleks całkam zdolny samastojna zabiaśpiečyć našu armiju adpaviednaj elektronikaj i prahramami. Zastajecca pytańnie adnosna rakiet, jakija mohuć być vykarystanyja ŭ Pałanezie.
Biełaruski vajskovy analityk Alaksandr Alesin miarkuje, što novy kompleks moža častkova być padobnym da kitajskaj RSZA NORINCO AR3, jakaja zdolnaja vykarystoŭvać rakiety adrazu niekalkich typaŭ i kalibraŭ — jany buduć vypuskacca z hiermietyčnych transpartna-puskavych kantejnieraŭ (TPK). TPK patrebnaha typu buduć ustaloŭvacca na pavarotnuju płatformu šasi, a paśla zapusku rakiet pustyja kantejniery možna budzie pierazaradzić na zavodzie ci prosta vykinuć.
RSZA NORINCO AR3.
Takaja schiema daje kompleksu zdolnaść vykonvać šyroki śpiektr zadač, robić jaho ŭniviersalnym, što važna dla biełaruskaj armii, jakaja zaraz pa finansavych pryčynach nie moža dazvolić sabie mieć nabor roznaha ŭzbrajeńnia na ŭsie vypadki.
Anałahičnyja amierykanskija sistemy M270 MLRS mohuć akramia zvyčajnaha naboru rakiet dla RSZA vypuskać apieratyŭna-taktyčnyja rakiety MGM-140 ATACMS roznych typaŭ z dalokaśćciu ahniu da 300 km.
Z savieckaj armii Biełarusi, jak i inšym postsavieckim krainam, dastalisia RSZA «Śmierč», jakija možna ličyć peŭnymi anałahami «Pałaneza», adnak miarkujecca, što novaja biełaruskaja sistema budzie mieć bolšuju dalokaść ahniu (u «Śmierča» — da 120 km). Plus, kali budzie vykarystanaja apisanaja vyšej schiema, heta zrobić biełaruski «Pałanez» mašynaj novaha dla Biełarusi pakaleńnia.
Pakul nieviadoma, kali pačałasia praca nad novaja rakietna-artyleryjskaj sistemaj, adnak jaje stvaralniki dobra razumiejuć tuju važniejšuju rol, jakuju adyhrała artyleryja ŭ sučasnych kanfliktach — najpierš, va Ukrainie.
U situacyi, kali avijacyja abodvuch bakoŭ nie mieła svabody ruk, artyleryja, jak i 100 i 200 hadoŭ tamu, zastavałasia hałoŭnym srodkam źniščeńnia praciŭnika na poli boju.
Cikavaja i nazva biełaruskaj RSZA — u honar uračystaha tanca, jaki ctaŭ papularnym ŭ Jeŭropie i ŭ Rasii ŭ XVII—XVIII st. Najbolš viadomaja ŭ našaj štodzionnaj kultury muzyka dla pałaneza aŭtarstva Michaiła Kleafasa Ahinskaha, jaki ŭdzielničaŭ u paŭstańni pad kiraŭnictvam Tadevuša Kaściuški na Vilenščynie i Minščynie, stvaryŭ ułasny bataljon strałkoŭ, zmahaŭsia z rasijskimi i pruskimi vojskami.
Ciapier čytajuć
«Łukašenka pavinien panieści adkaznaść za saŭdzieł u rasijskaj ahresii». Ministr zamiežnych spraŭ Ukrainy raskazaŭ pra novuju palityku ŭ dačynieńni da Biełarusi2727
Kamientary