Fiederalnaja palicyja Šviejcaryi aryštavała ŭ Ciurychu dzieviać čynoŭnikaŭ FIFA, ekstradycyi jakich patrabujuć Złučanyja Štaty. Aryšty byli zroblenyja ranicaj u sieradu ŭ adnym z hatelaŭ Ciurycha.
Aryštavanyja abvinavačvajucca ŭ ZŠA, siarod inšaha, u admyvańni hrošaj, vymahalnictvie i machlarstvie z vykarystańniem elektronnych pieravodaŭ.
Kiraŭnictva FIFA źjazdžajecca ŭ Ciurych na štohadovy źjezd, jaki pačniecca ŭ piatnicu i ŭ chodzie jakoha pavinien być abrany novy prezident arhanizacyi. Ciapierašni prezident Zep Błater choča być pieraabranym na piaty termin.
Krychu paźniej stali viadomyja imiony dzieviaci zatrymanych.
Siarod aryštavanych — vice-prezidenty FIFA Džefry Ueb i Euchienia Fihiereda, były člen vykankama FIFA Džek Uornier, a taksama Eduarda Li, Chulia Roča, Kostas Takas, Rafael Eskieviel, Chase Maryja Maryn i Nikałas Leas.
Paviedamlajecca, što abvinavačvańni taksama pradjaŭlenyja Alechandra Burzaka, Aaronu Devidsanu, Uha Džynkisu i Maryjana Džynkisu, jakija majuć dačynieńnie da spartyŭnaha markietynhu, a taksama Chase Marhulisu, jaki vystupaŭ pasiarednikam pry, jak miarkujecca, niezakonnych ździełkach.
Dziejučy kiraŭnik arhanizacyi Jozef Błater adsutničaje ŭ śpisach aryštavanych abo padazravanych.
U zajavie ministerstva ŭnutranych spraŭ Šviejcaryi havorycca, što prakuratura Uschodniaha rajona Ńju-Jorka rasśleduje spravu, zhodna ź jakoj aryštavanyja padazrajucca ŭ atrymańni chabaraŭ, jakija vyličvajucca miljonami dalaraŭ, z 1990-ch da siońniašniaha dnia.
Nakolki viadoma, palicejskija ŭ cyvilnym ŭziali klučy ad pakojaŭ haścinicy Baur au Lac i padnialisia ŭ numary. Apieracyja prajšła bieź jakich-niebudź incydentaŭ.
Hienieralny sakratar FIFA Žerom Valkie prybyŭ u hatel, dzie prajšli aryšty, ale admoviŭsia kamientavać. FIFA maje namier «razabracca ŭ situacyi» pierš čym rabić aficyjnyja zajavy.
Ciapier čytajuć
«Miesiačny płaciež paciahnie na 340 rubloŭ». Što budzie ŭ Biełarusi z mabilnym internetam?22
Kamientary