Stymulacyja elektryčnym tokam dapamahła zdarovym i chvorym na šyzafreniju
Ale niekatoryja navukoŭcy śpišuć heta na efiekt płaceba.
Daśledčyki Univiersiteta Džona Chopkinsa, ZŠA, prademanstravali pazityŭny efiekt mikrapalaryzacyi — stymulacyi mozhu pastajannym tokam. Ab vynikach daśledavańnia, pradstaŭlenaha ŭ časopisie Clinical Schizophrenia and Related Psychoses, raspaviadaje N+1.
Uździejańnie na mozh elektryčnym tokam palepšyła vyniki testaŭ zdolnaściej rozumu jak piaci chvorych na šyzafreniju, tak i kantrolnaj hrupy z šaści ich rodzičaŭ.
U pryvatnaści, palepšylisia karotkačasovaja vierbalnaja i vizualnaja rabočaja pamiać, što paharšajucca ŭ chvorych na šyzafreniju.
Kožny z paddoślednych prachodziŭ dva paŭhadzinnych sieansy: u katodnym režymie panižałasia aktyŭnaść peŭnaha ŭčastku hałaŭnoha mozhu, zatym u anodnym — stymulavałasia. Uździejańnie było nakiravanaje na častku łobnaj kary, što ličycca adkaznaj za karotkačasovuju pamiać.
Prychilniki mikrapalaryzacyi śćviardžajuć, što jana palapšaje ŭvahu, pamiać, viehietatyŭnyja i inšyja funkcyi: katodny tok supakojvaje, a anodnaja depalaryzuje niejrony i pryvodzić ich da bolšaj hatoŭnaści adkazvać na sihnały inšych niervovych kletak.
Praciŭniki kažuć, što tolki ŭ adnoj z mnostva raniejšych rabot byli vyjaŭlenyja vidavočnyja źmieny ŭ mozhu, u astatnich palapšeńnie pamiaci ci kreatyŭnaści možna śpisać na efiekt płaceba — pacyjentu stała lepiej, bo jon pavieryŭ, što jamu stanie lepiej.
Daśledavańni ŭpłyvu elektryčnaha toku na niervovuju tkanku i mozh viaducca ź siaredziny XIX stahodździa. Šyrokamu vykarystańniu takoj terapii zaminaje składanaść uliku efiektu ad lekavańnia i vialiki roskid vynikaŭ pry vykarystańni roznych pryboraŭ. Na siońnia navukoŭcy pravodziać ekśpierymient na bolšaj vybarcy pacyjentaŭ i z rehularnych sieansaŭ chočuć vyznačyć doŭhačasovyja efiekty ŭździejańnia elektryčnaści na mozh.
Kamientary