Amal hod minčuk uvachodzić u kvateru bokam: firma pastaviła brakavanyja dźviery
«Novyja ŭvachodnyja mietaličnyja dźviery my zamovili jašče ŭ vieraśni minułaha hoda. Dumali, chutka pastavim i zabudziem. Ale dźviery akazalisia značna mienšyja za prajom, mianiać ich firma admoviłasia, i historyja zaciahnułasia amal na hod», — raspaviadaje minčuk Viktar.
Firmu vybirali prosta: u susiednim domie adkryŭsia mahazin «Dźviery». U hetych dyleraŭ i zamovili.
«Pajšli, jak nam zdavałasia, samym prostym šlacham, — kaža mužčyna. — My, padobna, i byli pieršymi zakazčykami ŭ hetaj firmy. Pretenzija paźniej była napisanaja nie tolki ŭ adras vytvorcy, ale i ŭ adras dyleraŭ, ale zastałasia biez adkazu».
Paśla zamovy ź firmy pryjšoŭ majstar-zamierščyk, źmieraŭ prajom, uzhadniŭ kanstrukcyju i azdableńnie dźviarej. Ahavaryli i ŭmovu: staryja dźviery ŭ kvateru zastanucca, a novyja pavinny całkam adpaviadać pamieram isnujučych dźviarej. Abyšlisia dźviery amal u 5,5 miljona rubloŭ, abo ŭ 510 dalaraŭ pa kursie Nacbanka na toj momant.
«Pamiery dźviarej, prajomaŭ i inšyja paramietry, jakija majstar paznačyŭ u damovie, my, jasnaja sprava, nie praviarali — davierylisia prafiesijanału. A darma», — kaža Viktar.
Dźviery pryvieźli z zatrymkaj u dva tydni. Paśla ŭstanoŭki, kali majstar užo źjechaŭ i prajšło 2 hadziny paśla pierapynku, na praciahu jakich dźviaryma karystacca nielha, mužčyna z žonkaj vyjavili: dźviery pa pamierach nie supadali ni z prajomam, ni sa starymi dźviaryma — mietaličnaja akazałasia mienšaj amal na 10 santymietraŭ.
«Zajści ŭ kvateru my mahli tolki bokam. Pry hetym vykarystoŭvać narmalna ručku i zamki taksama nie atrymlivałasia — jany apynulisia ŭ hłybini pamiž dvuma dźviaryma. Heta značyć, kab zakryć i adkryć kvateru, prychodziłasia niamała papracavać», — kaža mužčyna.
Šyrynia vonkavych dźviarej pavinna być 64 santymietry, jak i ŭnutranaj, na spravie — 55 santymietraŭ.
Paśla vyjaŭleńnia defiektaŭ mužčyna niekalki razoŭ sazvońvaŭsia ź firmaj, jakaja pastaviła brak. Ale tam zamianić niajakasnyja dźviery na novyja admovilisia. Tamu Viktar napisaŭ piśmovuju pretenziju ŭ firmu z patrabavańniem zamianić dźviery i papiaredžańniem, što padaść u sud, kali mianiać dźviery admoviacca.
«Ščyra kažučy, upieršyniu ŭ žyćci sutyknulisia z takoj situacyjaj, — kaža Viktar. — My i ŭ sud b nie pajšli, kali b firma adrazu pahadziłasia zamianić dźviery. Ale firma na našu piśmovuju pretenziju nie adkazała, i my źviarnulisia ŭ administracyju Zavodskaha rajona i Upraŭleńnie handlu i pasłuh Minharvykankama z prośbaj dać pravavuju acenku dziejańniam firmy».
Rajonny vykankam razhledzieŭ zajavu mužčyny i padaŭ na firmu pazoŭ u sud. U svaim pazovie vykankam zapatrabavaŭ zamianić dźviery i spahnać ź firmy na karyść siamji niaŭstojku za kožny dzień praterminoŭki vykanańnia patrabavańniaŭ spažyŭca ŭ pamiery 1% — 2,7 miljona rubloŭ, jakaja potym vyrasła da 9,8 miljona, maralnuju škodu — 55 miljonaŭ rubloŭ, 145 tysiač rubloŭ za adpraŭku karespandencyi i štraf u pamiery koštu pazovu na karyść administracyi rajona.
«U momant ustanoŭki dźviarej z nami žyli dvoje pažyłych ludziej: moj baćka i baćka majoj žonki. Moj baćka na toj momant byŭ užo vielmi chvory — ankałohija, chvaroba prahresavała. Pieryjadyčna vyklikali chutkuju dapamohu, jakaja z usim svaim abstalavańniem nie mahła prosta tak patrapić unutr kvatery. U kancy studzienia baćka pamior, adbyłosia heta ŭ dzień pieršaha sudovaha pasiedžańnia. Heta značyć, my vymušanyja byli marnavać čas, niervy i siły na razborki z brakarobami, kansultacyi sa śpiecyjalistami, adryvajučysia ad kłopatu pra blizkaha čałavieka, — raspaviadaje Viktar. — Baćka žonki — invalid pa zroku, — i dla jaho realnaja prablema adkryć hetyja złaščasnyja dźviery z kvatery, bo jon prosta nie bačyć zamočnaj śvidraviny. U vyniku adnym zamkom my nie karystajemsia naohuł, jon navat nie raspracavany, što adznačyli ekśpierty, praŭda, vusna».
Paśla pieršaha pasiadžeńnia sud pryznačyŭ sudovuju ekśpiertyzu, jakaja zamieryła dźviery i zrabiła nastupnyja vysnovy:
— ełastyčnyja ŭščylnialnyja prakładki ŭ miescy złučeńnia dvuch pałotnaŭ dźviarej adsutničajuć;
— śvietłavy prajom pamiž dźviuma dźviaryma, draŭlanaj i mietaličnaj, pamienšyŭsia z 64 da 55 santymietraŭ, što pryviało da składanaściaŭ pry karystańni;
— adbyłosia zrušeńnie levaj stvorki dźviarej adnosna draŭlanaj na 9 sm, što pryviało da niazručnaści karystańnia, bo ručka i zamok apynulisia ŭ hłybini miždźviernaj prastory.
Usie hetyja niedachopy, jak pakazali ekśpierty, paŭstali ŭ vyniku taho, što pry zamiery i dalejšym vyrabie nie była ŭličanaja šyrynia mietaličnych dźviarnych vušakoŭ.
«My amal hod uvachodzim u kvateru bokam, — kaža Viktar. — Žyć z takimi dźviaryma niazručna i niebiaśpiečna. Dy i niezrazumieła, čamu maja siamja pavinna adčuvać niazručnaści z-za niajakasnaj pracy inšych ludziej, jakim my za hetuju pracu jašče i hrošy zapłacili».
Padčas pieršaha pasiadžeńnia suda siamja vyrašyła bolš nie źviazvacca z hetaj firmaj i źmianiła svaje iskavyja patrabavańni: paprasiła skasavać damovu ź firmaj na vyrab i ŭstanoŭku dźviarej, spahnać košt dźviarej u ekvivalencie 510 dalaraŭ pa kursie na momant vyniasieńnia rašeńnia suda, pamiery niaŭstojki i maralnaj kampiensacyi zastalisia raniejšymi.
Čarhovaje pasiadžeńnie suda, kudy byli pradstaŭlenyja vyniki ekśpiertyzy, prajšło 27 maja. U vyniku sud pryniaŭ bok siamji. Praŭda, patrabavańni zadavoliŭ tolki častkova.
«Sud pastanaviŭ skasavać damovu, vypłacić nam sumu pa damovie ŭ pamiery 7,4 miljona rubloŭ i za adpraŭku karespandencyi, a sumu niaŭstojki tolki častkova — 5 miljonaŭ rubloŭ, — kaža Iłona. — Taksama pastanaviŭ vypłacić 2 miljony rubloŭ maralnaj škody».
Zapłacić firma i štraf u biudžet Zavodskaha rajona — 14,4 miljona rubloŭ i dziaržpošlinu ŭ pamiery 1,1 miljona rubloŭ.
Kamientary