Pa spravie «čornych sałaŭjoŭ» padletkaŭ asudzili na termin ad 10 da 13 hadoŭ
Uviesnu 2024 hoda prapahandysty paviedamili pra zatrymańnie siemiarych padletkaŭ niby za «supracoŭnictva z ukrainskimi śpiecsłužbami».
Padletki abjadnalisia ŭ «anarchisckuju jačejku «Čornyja sałaŭi» pad kiraŭnictvam Nacyjanalnaj vyzvalenčaj armii Ukrainy», kab ładzić dyviersii ŭ Biełarusi i Rasii.
Siarod zatrymanych — niepoŭnahadovyja navučency kaledžaŭ i škołaŭ roznych haradoŭ Biełarusi. Stvaralnicaj supołki ŭłady nazyvali 16‑hadovuju hramadzianku Ukrainy Maryju Misiuk.
Taksama siarod zatrymanych Trafim Barysaŭ, Siarhiej Žyhaloŭ, Dźmitryj Zacharoška, Anastasija Klimienka i Alaksandra Pulinovič. Usich padletkaŭ abvinavačvali ŭ «akcie teraryzmu» (art. 289 KK). Taksama ŭ filmie pakazali 18‑hadovaha Daniiłu Harasima, jakoha abvinavačvali pavodle troch kryminalnych artykułaŭ, siarod jakich «zdrada dziaržavie» (art. 356 KK).
Pravaabaroncam «Viasny» stali viadomyja padrabiaznaści pra adnu z zatrymanych — Alaksandru Pulinovič. Na momant zatrymańnia 16‑hadovaja dziaŭčyna vučyłasia ŭ apošnim kłasie adnoj ź minskich škołaŭ. Alaksandra lubić žyviołaŭ, maje dvaich katoŭ i płanavała pa skančeńni škoły pastupać na vieterynara ŭ ahrarny ŭniviersitet. U SIZA dziaŭčynu na niekalki dzion sadžali ŭ karcar. U niavoli jana praciahvała navučańnie i zdavała centralizavanaje testavańnie.
Jak raskazała krynica pravaabaroncaŭ, paśla vychadu prapahandysckaha filma, jaho pakazvali i inšych škołach z metaj zastrašyć vučniaŭ.
Pavodle źviestak pravaabaroncaŭ, Alaksandry Pulinovič pryznačyli 10 hadoŭ i 3 miesiacy, Maryi Misiuk — 13 hadoŭ, Dźmitryju Zacharošku — 10 hadoŭ i 6 miesiacaŭ, Trafimu Barysavu, Siarhieju Žyhalovu — pa 12 hadoŭ źniavoleńnia. Daniiłu Harasimu pryznačyli 10 hadoŭ kałonii, a taksama štraf pamieram 600 bazavych vieličyniaŭ.
Sioleta ŭ listapadzie Maryju Misiuk vyzvalili padčas čarhovaj chvali pamiłavańnia palitviaźniaŭ.
Ciapier čytajuć
Ivan Prus raskazaŭ, jak nažyŭsia na $200, pasialiŭšy kinazorku ŭ zaniadbanaj kvatery kala śmietnika ŭ Šabanach, abstaŭlenaj rečami ź jaho internata1616
Kamientary