Vyniesienyja prysudy byłym kiraŭnikam Harmałzavoda №2

Sud Zavodskaha rajona Minska vynies pryhavory byłym kiraŭnikam staličnaha AAT «Haradski małočny zavod № 2». 

Byłyja namieśnik dyrektara pa ekanamičnych pytańniach i hałoŭny buchhałtar pryznanyja vinavatymi ŭ nieadnarazovym atrymańni chabaru. Pieršaja pryhavoranaja da šaści hadoŭ pazbaŭleńnia voli z kanfiskacyjaj majomaści i pazbaŭleńniem prava zajmacca peŭnaj dziejnaściu. Kanfiskavanyja ŭ jaje 63 tys. 100 dołaraŭ ZŠA nakiravanyja ŭ dachod dziaržavy. 

Byłomu hałoŭnamu buchhałtaru pryznačanaje pakarańnie ŭ vyhladzie abmiežavańnia voli na try hady biez nakiravańnia va ŭstanovu adkrytaha typu z pazbaŭleńniem prava zajmacca peŭnaj dziejnaściu na try hady.

Namieśnik dyrektara pa ekanamičnych pytańniach harmałzavoda № 2 była zatrymanaja ŭ pačatku hetaha hoda supracoŭnikami ŭpraŭleńnia pa baraćbie z ekanamičnymi złačynstvami (UBEZ) UUS Minskaha abłvykankama i ABEZ Dziaržynskaha RAUS.

Pavodle źviestak śledstva, u pieryjad z 2007 pa 2013 hady namieśnik dyrektara nieadnarazova karystałasia svaim słužbovym stanoviščam, prymała niezakonnyja hrašovyja ŭznahrodžańni ad pradstaŭnikoŭ sielhaspradpryjemstva za spryjalnaje vyrašeńnie pytańnia ab pieraličeńni avansavych płaciažoŭ na adras sielskahaspadarčaha pradpryjemstva «Nieharelskaje» (Dziaržynski rajon) za pastaŭlenaje na zavod małako.

Ustanoŭlena, što namieśnik dyrektara pa ekanamičnych pytańniach štomiesiac atrymlivała pa 200—300 dołaraŭ za stanoŭčaje vyrašeńnie pytańnia ab avansavańni płaciažoŭ u košt nastupnych pastavak małaka. 

U niezakonnych ździełkach była zadziejničanaja i hałoŭny buchhałtar pradpryjemstva, jakaja naŭmysna, z asabistaj zacikaŭlenaści, pieraličvała avansavyja płaciažy AAT. Za heta jana taksama štomiesiac atrymlivała niezakonnyja hrašovyja ŭznaharodžańni, ahulnaja suma jakich skłała 2 tys. 700 dołaraŭ. 

Ahulnaja suma chabaru, atrymanaha namieśnikam dyrektara, skłała, pavodle materyjałaŭ kryminalnaj spravy, 22 tys. 200 dołaraŭ. Padčas vobysku pa miescy jaje žycharstva apieratyŭniki znajšli i kanfiskavali 63 tys. 100 dołaraŭ. 

Prysudy zakonnuju siłu pakul nie nabyli i mohuć być abskardžanyja va ŭstanoŭlenym zakanadaŭstvam paradku, zaznačyła staršy opierupaŭnavažany pa asabliva važnych spravach HUBEZ MUS Vieranika Paśmiećjeva. 

Jana paviedamiła, što zaraz pavodle materyjałaŭ UBEZ UUS Minskaha abłvykankama Śledčym upraŭleńniem USK pa Minskaj vobłaści pravodzicca rasśledavańnie pa kryminalnaj spravie ŭ dačynieńni da słužbovych asob pradpryjemstva «Nieharelskaje». Zhodna z apieratyŭnaj infarmacyjaj, jany byli ŭ zmovie z asudžanymi supracoŭnicami małočnaha zavoda № 2 i «padazrajucca va ŭčynieńni kradziažoŭ hrašovych srodkaŭ u asabliva bujnym pamiery, u tym liku dla davańnia im chabaru, prypiskach i štučnym pavieličeńnie abjomaŭ nadoju małaka na svaim pradpryjemstvie».

• 0
• 0
• 0
• 0
• 0
• 0
• 0
• 0