Ekanamist Źmicier Kruk: Čakać dalejšaj istotnaj devalvacyi ja nie baču padstavaŭ
Ci mahčyma dać prahnoz nakont dalejšych źmianieńniaŭ kursu? Na pytańni Vitala Cyhankova adkazvaje ekanamist Źmicier Kruk.
Cyhankoŭ: U niadaŭnaj Ekspertyzie Vadzim Iosub skazaŭ, što kurs biełaruskaha rubla našmat bolej ciapier zaležyć ad rasiejskaha, čym raniej. Ci zhodnyja vy z takoj acenkaj?
Kruk: Tak, hetaja zaležnaść jość i jana dastatkova mocnaja. Pamyłkaj było b kazać, što jana nie była raniej. Ale raniej jana štučna strymlivałasia kiravańniem kursaŭtvareńnia. Tamu my i nazirali takija skački, što byli ŭ 2011 hodzie, ci ŭ kancy 2014-ha. Našyja ŭłady žadali trymać kurs, ale nie mahli hetaha rabić bolš za miesiac-dva, i ŭ vyniku devalvavali rubiel.
Zaraz ŭłady faktyčna pryznali, što kurs našaha rubla zaležyć ad rasiejskaha, i nia ŭmiešvajučy ŭ praces kursaŭtvareńnia, my atrymlivajem pastupovaje padzieńnie nacyjanalnaj valuty.
Cyhankoŭ: Ci možna sprahnazavać dalejšuju dynamiku kursu? Zdajecca, biełaruskija ŭłady nie drukujuć novyja hrošy, u ludziej nie rastuć zarobki — usio heta pavinna hulać na ŭmacavańnie rubla.
Kruk: Suadnosiny zamiežnych i ŭnutranych čyńnikaŭ, što ŭpłyvajuć na kurs rubla, ja b acaniŭ jak 80 na 20 na karyść zamiežnych. Z unutranych nehatyŭna ŭpłyvaje taja tendencyja, što pačałasia ŭ červieni — pieravod rublovych depazytaŭ u valutnyja.
Cyhankoŭ: A heta adbyłosia z-za taho, što ŭłady pačali źnižać pracenty pa depazytach?
Kruk: Pracenty pačali źnižacca, bo ŭłady imknulisia ažyvić ekanomiku, padšturchnuć ekanamičny rost, z hetym u nas vialikija prablemy. Ale tak, ja pahadžusia, heta stała adnym z čyńnikaŭ taho, što nasielnictva pačało pieravodzić rublovyja depazyty ŭ zamiežnyja valuty.
Kali b abjadnać usie čyńniki, to možna skazać, što bolšaść unutranych čyńnikaŭ hraje na stabilizacyju rubla. Ale zamiežnyja — našmat bolš upłyvovyja. Tamu prahnazavać kurs vielmi ciažka. Što budzie z naftaj, što budzie z Kitajem, ź Iranam? — nichto nia moža skazać. Ale mnie padajecca, što dno ŭ naftavych cenach užo dasiahnutaje. Sychodziačy z hetaha, čakać dalejšaj istotnaj devalvacyi ja nia baču padstavaŭ. Naadvarot, kali cana na naftu padymiecca, varta čakać peŭnaha ŭmacavańnia biełaruskaha rubla.
Ciapier čytajuć
Raźviedka ZŠA: Biełaruś stała pieradavym vajskovym płacdarmam Rasii20
Kamientary