Vital Cyhankoŭ: Debaty, jakija nie dali pieramožcu i nie naradzili afaryzmaŭ

Na BT adbylisia teledebaty pamiž kandydatami na prezydenta. Łukašenka i Hajdukievič nie pryjšli.

Pavialičyć

Pavodle čysta subjektyŭnaha mierkavańnia, nichto z udzielnikaŭ debataŭ nie pakinuŭ niejkaha nadzvyčaj jarkaha ŭražańnia.

Vidavočna, što, naprykład, Taciana Karatkievič šmat užyvała chatnija zahatoŭki, temy i arhumenty — ekspromtaŭ amal nie było. Plus, vidavočna, jana bajałasia skazać niešta «niepapraŭnaje», padstavicca — i tamu vostryja hieapalityčnyja pytańni prosta abminała (što, mahčyma, stanovicca admietnaściu jaje kampanii). Nichto z udzielnikaŭ debataŭ nie naradziŭ niejkich jarkich frazaŭ, afaryzmaŭ (jak heta było ŭ 2010 hodzie), jakija zapaminajucca i ŭvachodziać u historyju.

Badaj, vyklučeńniem tut moža ličyć nastupnuju daścipnuju i vostruju frazu Karatkievič — «Mužčyny zaŭsiody lubiać pierabolšvać, asabliva što tyčycca ichnich vynikaŭ». (Pamiataju, jak Taciana zrabiła paŭzu, jakby razvažajučy — ale, vidać, vyrašyła, nie raźvivać hetuju temu dalej).

U svaim ustupnym słovie Karatkievič davoli žorstka vykazałasia nakont niadaŭnich słovaŭ Łukašenki pra «stabilnaść». «Jamu moža i niavažnyja ceny i zarobki.. A nam važnyja», — skazała kandydatka. Vyhladała davoli ŭpeŭniena, nie zabyvała na žestykulacyju. Svaje pytańni Ŭłachoviču i Alehu Hajdukieviču Karatkievič zadała pa-biełarusku. Va Ŭłachoviča spytała, čamu jon addaŭ palakam Maksima Bahdanoviča.

Ułachovič, badaj, upieršyniu hetak vyrazna i dakładna padkreśliŭ svaju prarasiejskaść: «Ja nie chaču tak rezka vystupać suprać ułady. Kryzis my pieražyviem tolki razam z Rasiejaj. Tolki pry adzinstvie troch brackich narodaŭ — Biełarusi, Ukrainy i Rasiei — my možam niešta dakazać NATO i Eŭraźviazu».

Aleh Hajdukievič niekalki razoŭ nastojliva dakazvaŭ hledačam, što Karatkievič — heta taja samaja apazycyja, «jakaja 20 hadoŭ sprabuje razburyć krainu». «Jana chavajecca za mirnymi pieramienami, ale kali vy jaje vybiarycie, to budzie chaos» — zajaviŭ syn kandydata Siarhieja Hajdukieviča.

Kali ŭjavić całkam niedaśviedčanaha ŭ palitycy hledača, jaki karystajecca tolki źniešnim uražańniem, to čysta vizualna, mahčyma, najbolš vyjhryšna vyhladaŭ jakraz Aleh Hajdukievič — jon hučaŭ davoli naporysta, ahresiŭna, emacyjna.

Uśled za svaim baćkam Aleh Hajdukievič taksama «aśmieliŭsia» pachvalić Łukašenku: «Ja nie bajusia heta skazać, dziakuj našamu prezydentu za ŭmacavańnie suverenitetu!»

U cełym nielha skazać, kab niechta adnaznačna padvysiŭ svoj imidž dziakujučy hetym debatam. Heta nia taja reč, jakuju zaŭtra buduć abmiarkoŭvać na kuchniach i ŭ zavadzkich kuryłkach.

• 1
• 0
• 0
• 0
• 0
• 0
• 0
• 0