Niezaležnaja ekśpiertnaja hrupa Bellingcat ŭ čaćvier apublikavała poŭnuju viersiju dakłada pa rasśledavańni krušeńnia Boeing u Danbasie. U dakumiencie paćviardžajucca vysnovy, raniej apublikavanyja ekśpiertami. U pryvatnaści, aŭtary paŭtarajuć zaklučeńnie ab tym, što 17 lipienia 2014 hoda samalot «Małajzijskich avijalinij» byŭ źbity ź zienitna-rakietnaha kompleksu «Buk».
Adzinaje, što adroźnivaje vynikovy dakład ad papiarednich materyjałaŭ prajekta pa hetaj temie, — heta analiz alternatyŭnych viersij trahiedyi, pradstaŭlenych rasijskim Ministerstvam abarony i kancernam «Ałmaz-Antej», i ich abviaržeńnie.
«Alternatyŭnyja scenary, pradstaŭlenyja Ministerstvam abarony Rasijskaj Fiederacyi i kancernam «Ałmaz-Antej», u lepšym vypadku hłyboka pamyłkovyja, a ŭ horšym — ujaŭlajuć ź siabie naŭmysnyja sproby ŭvieści hramadskaść u zman z dapamohaj sfabrykavanych dokazaŭ», — śćviardžajuć aŭtary Bellingcat.
Vykarystańnie rakiet
Rasijski vytvorca ŭzbrajeńniaŭ «Ałmaz-Antej» pradstaviŭ svaju viersiju zdareńnia 2 červienia 2015 hoda. Ekśpierty kancerna zajavili, što dla ŭdaru pa MH17 vykarystoŭvałasia rakieta «ziamla — pavietra», i heta mahła być tolki rakieta 9M38M1, vypuščanaja sistemaj «Buk-M1». «Vytvorčaść rakiet «Buk-M1» była spyniena ŭ 1999 hodzie. Tady ž Rasija pieradała ŭsie, što zastalisia, rakiety takoha typu mižnarodnym klijentam», — pryvodziać aŭtary dakładu Bellingcat zajavu ekśpiertaŭ «Ałmaz-Anteja».
«Niahledziačy na heta, karystalniki internetu znajšli mnostva vyjaŭ rakiet 9M38M1 ŭ rasijskich častkach», — havorycca ŭ dakładzie. U pryvatnaści, takaja madel rakiety vykarystoŭvałasia ŭ 53-j zienitna-rakietnaj bryhadzie, adznačajuć udzielniki daśledavańnia sa spasyłkaj na dadzienyja Reuters.
Miesca zapusku
Akramia taho, u dakładzie pryvodzicca viersija Minabarony Rasii, jakoje ŭskłała adkaznaść za trahiedyju na Ukrainu. Aŭtary dakumienta abviarhajuć hetuju viersiju.
U pryvatnaści, jany praanalizavali spadarožnikavyja zdymki, pradstaŭlenyja viedamstvam u paćvierdžańnie svajoj viersii. Paraŭnaŭšy hetyja zdymki sa zdymkami kampanij Digital Globe i Google Earth toj ža miascovaści ad 17 lipienia, Bellingcat pryjšła da vysnovy, što pradstaŭlenyja rasijskim vajennym viedamstvam dokazy byli zroblenyja «za niekalki tydniaŭ da 17 lipienia».
Ekśpierty źviartajuć uvahu na toje, što «Ałmaz-Antej» nazyvaje toje ž miesca pusku rakiety, što i Minabarony Rasii, — viosku Zaroščanskaje, raźmieščanuju «ŭ 20 km na zachad ad imaviernaha miesca pusku pad Śniežnym».
Aŭtary dakładu nahadvajuć svaje vysnovy ab tym, što hety «Buk» byŭ pieraviezieny na hruzaviku z Daniecka ŭ Śniežnaje, a zatym adpraviŭsia na poŭdzień ad Śniežnaha. Adtul, adznačajuć jany, kala 16:20 pa miascovym časie była puščanaja rakieta, jakaja źbiła MH-17.
U dakumiencie ZRK ŭmoŭna nazyvajecca «Buk 3ch2» — pa nadpisach na pravym borcie, jakija bačnyja na fotazdymkach, apublikavanych u francuzskim vydańni Paris Match, zroblenych u Daniecku. Pa dadzienych Bellingcat, padobnaja na hety «Buk» mašyna nibyta była ŭ składzie vajennaha kanvoju, jaki jechaŭ z Kurska ŭ Milerava Rastoŭskaj vobłaści ŭ červieni 2014 hoda. Raniej hety «Buk» znachodziŭsia ŭ składzie 53-j zienitna-rakietnaj bryhady, jakaja dysłakujecca niedaloka ad Kurska, śćviardžajecca ŭ dakumiencie.
***
17 lipienia 2014 hoda pasažyrski Boeing avijakampanii Malaysia Airlines upaŭ niedaloka ad Daniecka. Jon lacieŭ rejsam MH17 z Amsterdama ŭ Kuała-Łumpur, na jaho borcie znachodzilisia 298 čałaviek.
21 lipienia 2014 h pradstaŭnik Minabarony Rasii hienierał-lejtenant Andrej Kartapołaŭ zajaviŭ, što rasijskija srodki abjektyŭnaha kantrolu (SAK) 17 lipienia zafiksavali ŭkrainski šturmavik Su-25 u niepasrednaj blizkaści (prykładna 3-5 km) ad Boeing 777. Niezadoŭha da katastrofy vajenny samalot, pavodle dadzienych SAK, pačaŭ nabor vyšyni, ruchajučysia ŭ kalidory dla hramadzianskich łajnieraŭ prosta da rejsa MH17. Pavodle viersii Minabarony, Su-25 moh źbić samalot.
Ukraina i šerah zachodnich krain ličać, što rakieta była vypuščanaja z terytoryi, padkantrolnaj bajevikam «DNR». Mižnarodnaja hrupa śledčych pad kiraŭnictvam Niderłandaŭ viadzie kryminalnaje rasśledavańnie abstavinaŭ krušeńnia Boeing na ŭschodzie Ukrainy. 13 kastryčnika Rada biaśpieki Niderłandaŭ płanuje apublikavać dakład ab techničnych pryčynach krušeńnia «Boinha». Kančatkovuju spravazdaču Mižnarodnaja śledčaja hrupa pakaža ŭ kancy 2015 hoda.
U lipieni 2015-ha pradstaŭnik u hienprakuratury Niderłandaŭ Vim de Brun paviedamiŭ, što ŭ ramkach mižnarodnaha rasśledavańnia jany prapracoŭvajuć dźvie viersii. «Jość viersija, što samalot byŭ źbity rakietaj kłasa «ziamla — pavietra», jość viersija, što jon byŭ źbity rakietaj kłasa «pavietra — pavietra», — adznačyŭ jon. Vim de Brun dadaŭ, što na toj momant śledčyja dahetul dakładna nie vyjavili asob, adkaznych za krušeńnie samalota.
Kamientary