Novaja zbroja Rasii: kryłatyja rakiety robiać Jeŭropu biezabaronnaj?
Niadaŭna Rasija dvojčy šakavała śviet. Spačatku jana adpraviła avijacyju ŭ Siryju, a potym atakavała pazicyi bajevikoŭ Isłamskaj dziaržavy kryłatymi rakietami z Kaśpijskaha mora, jakoje za 1500 kiłamietraŭ ad toje Siryi!
Bambardziroŭka kryłatymi rakietami mieła pakazać usiamu śvietu, što rasijskaje vojska moža kankuravać z amierykancami.
Što ź siabie ŭjaŭlajuć kryłatyja rakiety? Heta mocnaja zbroja, zdatnaja lacieć niekalki tysiač kiłamietraŭ i traplać dakładna ŭ cel praź sistemu naviadzieńnia. Źbić kryłatuju rakietu siońnia amal niemahčyma: jana lacić nizka nad ziamloju, ahinajučy ŭsie pieraškody na miascovaści, tamu radyjołakacyjnyja sistemy tut biezdapamožnyja. Hipatetyčna takija rakiety možna źbić, kali ich budzie niekalki. Adnak kali ich budzie niekalki dziasiatkaŭ ci sotniaŭ, to nie.
Raniej amierykancy sa svaimi «Tamahaŭkami» ličylisia najlepšymi ŭ halinie kryłatych rakiet, rasijskija ž rakiety ličylisia adstałymi praz słabuju elektroniku i nieadładžanuju sistemu navihacyi. Ale 7 kastryčnika, paśla pusku 26 rasijskich najnoŭšych rakiet ZM14 «Kalibr» pa Siryi, Rasija pakazała, što taksama vałodaje hetaj mahutnaj zbrojaj.
Biełaruski ekśpiert Alaksandr Alesin miarkuje, što «Tamahaŭki», uziatyja na ŭzbrajeńnie ŭ 80-ch hadach, užo nielha nazyvać najlepšymi rakietami, bo ZM14 macniejšyja.
«Śviet i raniej viedaŭ, što ŭ Rasii jość novyja kryłatyja rakiety. Ale heta było jak kozyr, u jaki nie vielmi vieryłasia. Ale ruskija zapuścili svoj anałah GPS — Hłonass, i pakazali, što rakiety mohuć paśpiachova praz hetuju sistemu latać i źniščać celi. Faktyčna heta aznačaje, što ŭsia Jeŭropa ŭ radyusie 2500 kiłamietraŭ ad miescaŭ ich bazavańnia nie moža adčuvać siabie abaronienaj na ŭsie 100 adsotkaŭ», — skazaŭ «Našaj Nivie» Alesin.
Alesin dumaje, što sistema SPA NATA pieradusim maje na mecie pierachop stratehičnych rasijskich bambardziroŭščykaŭ, kštałtu TU-160. A voś z maleńkaj rakietaj jeŭrapiejskija vajskoŭcy nie zmohuć zrabić ničoha. I ciapier vychodzić, što dla taho, kab nanieści jadzierny ŭdar, Rasii navat nie treba padymać bambardziroŭščyki — dosyć zapuścić svaje novyja ZM14 ź jadziernym zaradam. I heta dobra razumiejuć na Zachadzie.
Pakul, praŭda, dakładnyja charaktarystyki ZM14 nieviadomyja — pra ich možna mierkavać tolki sa słovaŭ rasijskaha vajennaha čynavienstva. I tut maskoŭskija admirały supiarečać adzin adnamu: admirał Čarnamorskaha fłotu aceńvaŭ dalokaść palotu novych rakiet u 1600 kiłamietraŭ, a admirał Kaśpijskaha fłotu — u 2500 kiłamietraŭ. Ale ŭ lubym vypadku heta šmat. U budučyni Rasija płanuje ŭzbroić kompleksami «Kalibr» usie karabli prybiarežnaj achovy, submaryny dy inš. Zrešty, «Kalibr» možna stavić paŭsiul, choć na zvyčajnuju mašynu.
Ale tut jość prablemy: adziny zavod u Rasii, zdatny rabić «Kalibry», — heta jekaciarynburhski «Navatar». Ale jon nie daje rady masavaj vytvorčaści, tamu pakul što ŭ Rasii maksimum niekalki dziasiatkaŭ takich rakiet. Bolš za toje, ciapier na zavodzie raspačałasia kapitalnaja madernizacyja, jakaja taksama strymaje tempy vytvorčaści.
«U pierśpiektyvie, paśla pieraŭzbrajeńnia, Rasija realna moža vyraŭniać bałans vajennych siłaŭ u śviecie. Ale pakul moc Kaśpijskaha fłotu naŭrad ci pieravyšaje moc załpa adnaho amierykanskaha eśminca», — padahulniŭ vajenny ekśpiert Alesin.
U 1987 hodzie SSSR i ZŠA padpisali damovu ab likvidacyi rakiet siaredniaj i małoj dalokaści. Tady baki spadziavalisia, što heta spynić honku ŭ bajavym rakietabudavańni. Ale akazałasia, što ŭsio vyjšła naadvarot.
Ciapier čytajuć
Polski dypłamat raskazaŭ, jak pryvoziŭ Kolu multfilmy na dyskach i kim dla siamji Łukašenkaŭ byŭ Makiej8
Kamientary