Polski dypłamat raskazaŭ, jak pryvoziŭ Kolu multfilmy na dyskach i kim dla siamji Łukašenkaŭ byŭ Makiej
«Łukašenka razumieje, što nie moža padyści da trybuny i vystupać z pramovaj da naroda, trymajučy na rukach małoha. Tamu jon pavaročvajecca nazad. Za im stajać premjer, ministry, kiraŭnik KDB, načalnik Hienštaba. I jon viadzie hetaha małoha, biare jaho za ruku i kładzie ruku Koli ŭ ruku Makieju».
Były časovy pavierany ŭ spravach Polščy ŭ Biełarusi Vitold Juraš u intervju jutub-kanału Kulisy Spraw zhadaŭ niekalki cikavych epizodaŭ, źviazanych z małodšym synam Łukašenki.
Vitold Juraš pačaŭ pracavać u pasolstvie Polščy ŭ Biełarusi ŭ 2010 hodzie jak kiraŭnik palityčnaha adździeła. Z krasavika taho ž hoda pa luty 2011‑ha jon uznačalvaŭ misiju ŭ jakaści časovaha pavieranaha ŭ spravach. Paśla sychodu z dypłamatyčnaj słužby Juraš pierajšoŭ u žurnalistyku.
«Dziadźka» Makiej
U intervju Juraš zhadvaje, što pierad adjezdam u Minsk jamu kazali, što palityčnaja karjera Uładzimira Makieja ŭžo skončana, adnak jaho ŭłasnyja nazirańni śviedčyli pra inšaje. Pavodle jaho słoŭ, Makiej, jaki zajmaŭ pasadu kiraŭnika Administracyi prezidenta, byŭ druhim čałaviekam u dziaržavie.
«Heta byŭ davoli redki momant, bo palityčny talent Łukašenki tady (bo siońnia ja liču, što jon straciŭ svaje talenty, jakija kaliści mieŭ) zaklučaŭsia ŭ tym, što tam nikoli nie było numara dva ŭ režymie. Jon zaŭsiody kłapaciŭsia, kab nie było patencyjnaha pierajemnika. Ale toj momant byŭ vyklučeńniem. Byŭ taki čałaviek — Uładzimir Makiej».
Kab patłumačyć, čamu ŭ jaho skłałasia takoje ŭražańnie, były dypłamat zhadaŭ adzin epizod:
«Adbyvajecca ŭračystaść uskładańnia viankoŭ kala pomnika z nahody vyzvaleńnia Minska. Łukašenka idzie da trybuny, kab vystupić z pramovaj. Pobač staić Kola, jaho syn, jakomu tady było hadoŭ piać ci šeść.
I jon idzie ź im. Potym [Łukašenka] razumieje, što nie moža padyści da trybuny i vystupać z pramovaj da naroda, trymajučy na rukach małoha. Tamu jon pavaročvajecca nazad. Za im stajać premjer, ministry, kiraŭnik KDB, načalnik Hienštaba. I jon viadzie hetaha małoha, biare jaho za ruku i kładzie ruku Koli ŭ ruku Makieju».
Pavodle Juraša, ubačyŭšy heta, jon užo nie staŭ słuchać pramovu Łukašenki. Jaho ŭvaha była skancentravanaja na pavodzinach Koli.
«Jon stajaŭ pobač, załaziŭ jamu pad pinžak, ciahnuŭ jaho. Makiej nachilaŭsia, hładziŭ jaho pa hałavie. Vyhladała tak, nibyta jon cichieńka kaža: «Cicha, cicha, ciapier nie, bo tata vystupaje».
I ja zrazumieŭ, što hety mały ŭsprymaje Makieja jak dziadźku. Jon adčuvaje siabie ź im u biaśpiecy.
I ja tady napisaŭ u natatcy — nie, Makiej nie na miažy adstaŭki. Nie byvaje tak, kab dyktatar davieryŭ čatyroch— ci piacihadovaje dzicia čałavieku, jaki ŭžo na vychadzie ź sistemy i pry jakim heta dzicia adčuvaje siabie svabodna. I jon dla jaho taki samy blizki dziadziečka».
Multfilmy dla Koli
Zhadany epizod, pavodle Juraša, taksama pakazvaŭ, nakolki važnaje miesca ŭ žyćci Łukašenki zajmaje małodšy syn.
«Ja zrazumieŭ, što dla Łukašenki hety mały — vielmi asablivy čałaviek. Dyktatary mohuć być žorstkimi, ale amal zaŭsiody jość adzin ci dva čałavieki, da jakich jany staviacca vielmi piaščotna. Heta moža być žančyna abo dzicia», — skazaŭ jon.
Mienavita tamu dypłamat vyrašyŭ vykarystać hetuju asablivaść. Padčas pajezdki ŭ Polšču jon kupiŭ na DVD papularnyja multsieryjały «Reks» i «Pčołka Maja» i padčas adnoj z aficyjnych uračystaściaŭ pieradaŭ ich kiraŭniku achovy Łukašenki jak padarunak dla Koli.
Praź niekatory čas kiraŭnik achovy padyšoŭ da dypłamata i paprasiŭ prajści razam.
«Heta było dziŭna dla Łukašenki — što niechta pryvioz dla Koli filmy na DVD. I heta stała nahodaj dla razmovy».
Jak śćviardžaje Juraš, u niefarmalnaj kamunikacyi Łukašenka moh vyhladać davoli niepasrednym.
«Kali Pucin vyhladaje zaŭsiody chałodnym, to Łukašenka — taki «dziadźka». Jon sam nalivaje kavu, cikavicca, ci dobra ty pajeŭ, ci tabie niešta patrebna. Moža navat skazać, što tabie treba schudnieć», — dzielicca ŭražańniami były dypłamat.
Na dumku Juraša, takaja niepasrednaść — typovaja rysa aŭtarytarnych lidaraŭ, jakija mohuć spałučać žorstkaść u palitycy z asabistaj ciepłynioj u vuzkim kole.
Što aznačaje źjaŭleńnie vychadcaŭ ź Biełarusi ŭ rasijskim śpiecpadraździaleńni dla asabliva važnych apieracyj i tajnych zabojstvaŭ?20
Što aznačaje źjaŭleńnie vychadcaŭ ź Biełarusi ŭ rasijskim śpiecpadraździaleńni dla asabliva važnych apieracyj i tajnych zabojstvaŭ?
Za dva dni na vyratavalny ŭkoł Ksiušy z Mahilova sabrali rekordnyja $300 tysiač. Mama zdała jaje ŭ dzietdom, a čužyja ludzi bjucca za žyćcio dziciaci44
Za dva dni na vyratavalny ŭkoł Ksiušy z Mahilova sabrali rekordnyja $300 tysiač. Mama zdała jaje ŭ dzietdom, a čužyja ludzi bjucca za žyćcio dziciaci4
Vychadcy z «Alfa» KDB Biełarusi zajmajuć kiraŭničyja pasady ŭ novym rasijskim supiersakretnym śpiecpadraździaleńni, pryznačanym dla zabojstvaŭ za miažoju3333
Kamientary
A toje što jany ,,úspaminajuć,, nia maje nijakaj vartaści