Kamitet dziaržkantrolu Homielskaj vobłaści pravieryŭ dziejnaść futbolnaha kłuba «Słavija-Mazyr» i ŭstanaviŭ šerah parušeńniaŭ.
Jak paviedamlaje kantrolnaje viedamstva, futbolnym kłubam dapuščanyja fakty zanižeńnia pazarealizacyjnych dachodaŭ, što ŭličvajucca pry padatkaabkładańni, nieŭklučeńnia ŭ skład abjektaŭ abkładańnia ziamielnym padatkam ziamielnaha ŭčastka płoščaj 0,01077 ha, a taksama niesvoječasovaha pieraličeńnia padachodnaha padatku. U vyniku parušeńniaŭ futbolnamu kłubu danaličanyja i vystaŭlenyja da vypłaty padatki, zbory i pieni na 344,2 młn rubloŭ. U pieryjad z sakavika pa śniežań 2014 hoda futbolnym kłubam nie vykonvalisia ŭstanoŭlenyja miežavyja pamiery vypłat kiraŭniku i inšym rabotnikam kłuba, što pryviało da zališniaj vypłaty zarabotnaj płaty bolš jak na 102,2 młn rubloŭ.
Pavodle infarmacyi KDK Homielskaj vobłaści, futbolnym kłubam taksama dapuščanaje niametavaje vykarystańnie zamiežnaj biazvypłatnaj dapamohi na 188,2 młn rubloŭ, atrymanaj na raźvićcio dziciača-junackaha futboła.
Pry raźlikach z ustanovaj «SDIUŠAR № 1 h. Mazyra» za spažytyja kamunalnyja pasłuhi i akazanyja pasłuhi spartyŭnych pabudoŭ FK nie kampiensavanyja ŭkazanyja pasłuhi na 80,4 młn rubloŭ z ulikam staŭki refinansavańnia.
Miedycynskuju dziejnaść pa praviadzieńni masažu futbolny kłub ažyćciaŭlaŭ biez atrymańnia va ŭstanoŭlenym paradku śpiecyjalnaha dazvołu (licenzii) Ministerstva achovy zdaroŭja.
Aprača taho, futbolnym kłubam dapuščanyja skažeńnie źviestak statystyčnaj spravazdačnaści, niesvoječasovaja vypłata zarabotnaj płaty za sakavik 2015 hoda i inšyja parušeńni.
Pavodle vynikaŭ pravierki futbolnym kłubam kampiensavanyja ŭ biudžet 469,6 młn rubloŭ, častkova kampiensavanaja zališnie vypłačanaja zarabotnaja płata na 70,5 młn rubloŭ. Da administracyjnaj adkaznaści pryciahnutyja dźvie słužbovyja asoby na 4,3 młn rubloŭ, razhladajecca pytańnie ab pryciahnieńni futbolnaha kłuba da administracyjnaj adkaznaści.
Kamientary