Dalejšaja narmalizacyja adnosinaŭ adpaviadaje «našym ahulnym intaresam», zajaviŭ ministr zamiežnych spraŭ Hiermanii Frank-Valter Štajnmajer na sustrečy sa svaim biełaruskim kaleham Uładzimiram Makiejem 18 listapada ŭ Bierlinie.
«Heta byŭ pieršy vizit biełaruskaha ministra zamiežnych spraŭ za mnohija hady, — adznačajecca ŭ paviedamleńni niamieckaha źniešniepalityčnaha viedamstva. — Frank-Valter Štajnmajer rascaniŭ siońniašni vizit Uładzimira Makieja jak važny sihnał i zajaviŭ ab «realnaj pierśpiektyvie pakrokavaha palapšeńnia adnosinaŭ pamiž Biełaruśsiu i Zachadam».
Pavodle słoŭ Štajnmajera, sustreča stała mahčymaj dziakujučy zrucham u Biełarusi: vyzvaleny palitźniavolenyja, prezidenckija vybary, u adroźnieńnie ad 2010 hoda, prajšli mirna, chacia jany nie va ŭsim adpaviadali jeŭrapiejskim standartam. Ciapier nieabchodna pasprabavać stvaryć atmaśfieru nieabchodnaha davieru dla ŭzajemnaha zbližeńnia, ličyć kiraŭnik MZS Hiermanii. Prypynieńniem sankcyj Hiermanija i ES vydali Biełarusi «kredyt davieru».
Akramia vybudoŭvańnia dvuchbakovych adnosinaŭ razmova na sustrečy dvuch ministraŭ išła ab kanflikcie na ŭschodzie Ukrainy i vykanańni minskich pahadnieńniaŭ.
Jak paviedamiła pres-słužba biełaruskaha źniešniepalityčnaha viedamstva, u Bierlinie Makiej taksama sustreŭsia z savietnikam kanclera FRH pa pytańniach źniešniaj palityki i biaśpieki Krystofam Chojshienam, staršynioj hiermanska-biełaruskaj parłamienckaj hrupy bundestaha Olivieram Kačmarekam i členami hetaj hrupy, pradstaŭnikami hiermanskaj ekśpiertnaj supolnaści.
«U chodzie sustreč i pieramoŭ razhledžany šyroki śpiektr pytańniaŭ dvuchbakovaha paradku dnia, raźvićcia dyjałohu pamiž Biełaruśsiu i Jeŭrapiejskim sajuzam, udziełu Respubliki Biełaruś u pracesach jeŭrazijskaj intehracyi, uzajemadziejańnia z Hiermanijaj u miežach mižnarodnych arhanizacyj, asabliva z ulikam jaje budučaha staršynstva ŭ ABSIE ŭ 2016 hodzie, aktualnyja prablemy mižnarodnaj palityki. U miežach vizitu dasiahnuty šerah kankretnych damoŭlenaściaŭ, nakiravanych na dalejšuju aktyvizacyju biełaruska-hiermanskaha supracoŭnictva», — adznačajecca ŭ paviedamleńni.
18 listapada ŭ Minsku na kanfierencyi «Vychad na novyja rynki» pasoł Hiermanii ŭ Biełarusi Pieter Detmar zajaviŭ, što, prypyniajučy sankcyi ŭ dačynieńni da biełaruskich čynoŭnikaŭ i šerahu pradpryjemstvaŭ, Jeŭrasajuz pakazvaje, što hatovy pačać budavać adnosiny ź Biełaruśsiu z čystaha lista. «Prypynieńnie sankcyj ES — heta adkaz na toje, što adbyvałasia ŭ vašaj krainie ŭ apošni čas. I hetym žestam my zaprašajem vas pačać adnosiny z nula, z čystaha lista. Spadziajusia, my zmožam pabudavać paŭnacenny dyjałoh», — zajaviŭ pasoł. Pavodle jaho słoŭ, prypynieńnie sankcyj źjaŭlajecca vyraznym sihnałam Jeŭrasajuza ab tym, što jon «hatovy zapluščyć vočy na padziei ŭ Biełarusi papiarednich hadoŭ i hatovy nadavać uvahu tamu, što moža być u budučyni».
29 kastryčnika Jeŭrasajuz na čatyry miesiacy prypyniŭ dziejańnie sankcyj u dačynieńni da 170 fizičnych asob i troch pradpryjemstvaŭ.
Cichanoŭskaja: Dzieci nie pierajechali ŭ ZŠA, a prosta časova buduć z tatam dziela biaśpieki39
Kamientary