Upraŭleńnie pa spravach kultury Biełdziaržuniviersiteta admianiła pakazy śpiektakla Eldara Biakirava «Branisłaŭ. Sceny z žyćcia i snoŭ» pra vybitnaha biełaruskaha vučonaha i hramadskaha dziejača Branisłava Taraškieviča, paviedamlaje partał artsiadziba.by.
Pjesa pra Branisłava Taraškieviča, jaki šyroka viadomy jak refarmatar biełaruskaj movy, była napisana Biakiravym jašče ŭ 2012 hodzie. Sioleta režysior pry padtrymcy kulturnaha ahienctva «Art Siadziba» i Asamblei niedziaržaŭnych demakratyčnych arhanizacyj sabraŭ hrupu akcioraŭ-amataraŭ, jakija ŭzialisia ŭvasobić u žyćcio jaho tvor.
Premjera śpiektakla adbyłasia 14 listapada na scenie studenckaha teatra BDU «Na bałkonie», pakaz paŭtaryŭsia 16 listapada. U chutkim časie kalektyvu stała viadoma, što śpiektakli, zapłanavanyja na 18, 20 i 23 listapada, admienienyja. Supracoŭniki ŭpraŭleńnia pa spravach kultury BDU vyviesili adpaviednuju abjavu na dźviarach pamiaškańnia, adviedzienaha dla teatra «Na bałkonie».
«Nam nie nazvali kankretnuju pryčynu zabarony śpiektakla. Dakładna mahu skazać, što ŭ pastanoŭcy my nikoha nie kryŭdzim i nie źnievažajem», — pryvodzić artsiadziba.by słovy Eldara Biakirava.
Zaraz tvorčy kalektyŭ znachodzicca ŭ pošukach novaj sceny dla pakazu hetaha śpiektakla. «Dla nas heta vielmi važnaja praca, sakralnaja i dla mianie, i dla maich akcioraŭ, ja viedaju. Škada, što los śpiektakla skłaŭsia takim čynam. Ale śpiektakl pra Branisłava, i tamu jon vytrymaje ŭsie pravakacyi i vyprabavańni. Niahledziačy na toj žach, jaki zdaryŭsia sa śpiektaklem u ścienach BDU, my b vielmi chacieli, kab našy nastupnyja pakazy byli paśpiachovyja», — skazaŭ režysior.
Alaksiej Saprykin, jaki vykonvaje rolu Taraškieviča, u svaju čarhu zajaviŭ, što «addaŭ teatru «Na bałkonie» bolš jak šeść hadoŭ, braŭ udzieł u šmatlikich śpiektaklach i dapamahaŭ u arhanizacyi fiestyvalu «Teatralny kufar», a zaraz jaho «prosta vyhaniajuć jak niepatrebny i adpracavany materyjał».
«Mahu z dakładnaściu skazać, što administracyja ŭpraŭleńnia pa spravach kultury BDU zaraz nie zacikaŭlena ŭ raźvićci teatralnaha kirunku va ŭniviersitecie. I heta nie idzie na karyść ni studentam, ni administracyi, ni akcioram», — padkreśliŭ jon.
Upraŭleńnie pa spravach kultury BDU na telefonnyja zvanki nie adkazvaje.
Ciapier čytajuć
U jakim miesiacy biełarusy pamirajuć čaściej za ŭsio?1
Kamientary