Viadomyja ŭkraincy vykazali padtrymku biełaruskim dobraachvotnikam VIDEA

Viadomyja ŭkraincy vykazali padtrymku biełaruskim dobraachvotnikam, jakija sa zbrojaj u rukach adstojvajuć terytaryjalnuju cełasnaść Ukrainy.

U admysłovym videazvarocie muzyka Aleh Skrypka, muzyka i radyjo-DJ Siarhiej Kuzin, televiadoŭca Ała Mazur i viazień sumleńnia Mirasłaŭ Marynovič zachaplajucca pieśniaj zahinułaha Alesia Čarkašyna dy dziakujuć voinam-biełarusam.

33-hadovy bieraściejec Aleś Čarkašyn dałučyŭsia da biełaruskich dobraachvotnikaŭ u DUK «Pravy Siektar» na pačatku 2015 hodu pad pazyŭnym «Taras». 10 žniŭnia jon byŭ ciažka paranieny ŭ bai pad Biełakamienkaj na Danbasie. Praz 18 dzion chłopiec pamior u vajskovym špitali. Aleś dobra hraŭ na hitary. Ułasnuju pieśniu «Nie zdavajsia!» jon zapisaŭ niezadoŭha da svajoj śmierci. Adnajmiennuju kružełku i klip užo paśmiarotna zrabili siabry Čarkašyna. U płytku ŭvajšli studyjnyja zapisy, dva ź jakich pryśviečanyja vajnie va Ukrainie. Usie hrošy ad prodažu dyska pieradajuć biełarusam, što vajujuć u składzie taktyčnaj hrupy «Biełaruś» i dobraachvotnickich bataljonaŭ.

Aleh Skrypka:

«Ad siabie, ad usich ukrainskich muzykaŭ, ad usich ukraincaŭ ja chaču pieradać haračyja vitańni chłopcam-biełarusam, siabram, jakija vajujuć na ŭschodzie Ukrainy. Jany advajoŭvajuć našu ŭkrainskuju svabodu. Ja liču, što ludzi, jakija tam vajujuć, — nie dziela niejkich uznaharod, navat pryznańnia dziaržavy, bo jaje niama – jany hieroi. A biełarusy – heta ŭvohule supierhieroi, što na čužoj ziamli pralivajuć kroŭ, addajuć svaje žyćci. Nizki vam pakłon i słava vam!»

Siarhiej Kuzin:

«Hod, ci navat bolej, jak ja znajomy ź ziemlakami, siabrami, jakija vajujuć za Ukrainu. U mianie asabista ničoha akramia honaru heta nie vyklikaje. Voś što ja chaču skazać pra muzyku hetaha chłopca (na žal, nie paśpieŭ ź im paznajomicca, ale što zrabić). Heta ščyraje i sapraŭdnaje. A ŭsio astatniaje… Ja vieru: i słovam, i tamu, što jon zrabiŭ u hetaj muzycy. I voś jak raz samaje jaskravaje paćvieržańnie taho fakta, što muzyka robić čałavieka nieśmiarotnym. Tyja, chto palivajuć ich brudam, chaj chacia b pra heta padumajuć: narmalnyja, darosłyja, maładyja, kvitniejučyja ludzi pa niejkaj pryčynie – dla mnohich nieviadomaj – tak kardynalna mianiajuć svajo žyćcio».

Ała Mazur:

«Tak nie moža być, tak nie pavinna być. Heta poŭny absurd, kali ludzi, što byli hatovy za volu Ukrainy realna ryzykavać žyćciom na froncie, ciapier musiać nahadvać pra siabie. Dać hramadzianstva tym, kaho za dapamohu Ukrainie mohuć pasadzić za kraty, — pa-mojmu, najmienšaje, što mieła b zrabić niezaležnaja dziaržava svaim abaroncam. Ja nie chaču zaraz kazać tym chłopcam «Trymajciesia!». Ja chaču skazać čynoŭnikam, jakija abyjakava žyrujuć u svaich kabinietach: my hetu temu nie pakiniem, i ŭ vas nie atrymajecca zakapać jaje ŭ stosie papier. Pasłuchała Alesia Čarkašyna i ŭzhadała. Pamiatajecie: revalucyju pačynajuć idealisty, robiać ramantyki, a vykarystoŭvajuć niahodniki? Vajna źniščyła cełaje pakaleńnie ščyrych, talenavitych, nieabyjakavych, śvietłych ludziej. Pieśni našaha biełaruskaha abaroncy, hety dysk, treba słuchać usim. Heta praŭda, za jakuju zapłočana žyćciom. A jašče razdać u kožny čynoŭnicki kabiniet, kab pamiatali: nijaki tyłavy pacuk nie zmoža, pakul nichto nie bačyć, padhryźci toje, što nam udałosia advajavać».

Mirasłaŭ Marynovič:

«Mianie ŭražvaje, što kala sotni biełarusaŭ zmahli pieramahčy efiekt vielmi chłuślivaj prapahandy, jakaja zrabiła z usiaho naroda kalektyŭnaha fašysta, voraha čałaviectva. Jany nie pavieryli tamu. Jany pryjechali na našuju ziamlu i stali na jaje abaronu. Aleś Čarkašyn pryjšoŭ dapamahčy ŭ vajnie, ale ciapier jon pryjšoŭ da nas svajoj pieśniaj, u jakoj vielmi dakładna skazaŭ, čamu abaraniaje hetuju ziamlu. Heta vialiki prykład pabracimstva pamiž našymi narodami».

***

Aleh Skrypka — salist šyroka viadomaj hrupy «Vopli Vidaplasava».

Hołas viadoŭcy ŭkrainskaha «Radyjo Roks» Siarhieja Kuzina dobra znajomy mnohim biełarusam: da 2004 hodu Siarhiej pracavaŭ na «Alfa radyjo» ŭ Minsku. 

Uładalnicu vialikaj kolkaści teleŭznaharod Ału Mazur paznajuć tyja, chto pa kabielnym ci spadarožnikavym TB hladzić ukrainski kanał «1+1». 

Vice-rektar Ukrainskaha katalickaha ŭniviersiteta Mirasłaŭ Marynovič dobra viedaje košt zmahańnia za svabodu. U 1978-m jaho asudzili na 7 hod łahieraŭ strohaha režymu i 5 hod ssyłki za «praviadzieńnie antysavieckaj ahitacyi i prapahandy». Paźniej Mirasłaŭ Marynovič aktyŭna ŭklučyŭsia ŭ pravaabarončy ruch u savieckaj Ukrainie. 

• 0
• 0
• 0
• 0
• 0
• 0
• 0
• 0