U krainie startavaŭ prajekt pa raźvićci vietraenierhietyki

U Minsku 18 śniežnia adbyŭsia ŭstanovačny sieminar prajekta «Likvidacyja barjeraŭ dla raźvićcia vietraenierhietyki ŭ Respublicy Biełaruś». 

Jak paviedamiła kiraŭnik prajekta Maryna Biełavus, pavodle jaho vynikaŭ płanujecca padrychtavać budaŭnictva vietraŭstanovak ahulnaj ustanovačnaj mahutnaściu nie mienš jak 25 MVt. «Zadača zaklučajecca ŭ tym, kab usie šlachi, jakija my projdziem dla dasiahnieńnia hetaj mety, u dalejšym stali niejkaj typavoj schiemaj, vyraznym miechanizmam, jakoha buduć prytrymlivacca inviestary», — rastłumačyła jana. 

Prajekt uklučaje, u pryvatnaści, raspracoŭku i ŭviadzieńnie ŭ dziejańnie nieabchodnych narmatyŭna-pravavych aktaŭ pa spryjańni raźvićciu vietraenierhietyki, a taksama ŭdaskanaleńnie dziaržaŭnaha kadastra ŭznaŭlalnych krynic enierhii. «My hutaryli ź niekatorymi pradstaŭnikami praktyčnaj śfiery realizacyi prajektaŭ u vietraenierhietycy, i jany žadajuć, kab kadastr byŭ bolš zručnym dla vykarystańnia patencyjalnymi inviestarami, kab možna było acanić prymalnaść dla budaŭnictva vietraparku toj ci inšaj placoŭki, adznačanaj u kadastry», — adznačyła Biełavus. 

Praduhledžvajecca taksama raspracoŭka i ŭdaskanaleńnie ŭžo isnych techničnych normaŭ, bo «nie ŭsie dziejnyja ŭ Biełarusi vietraparki pabudavanyja pa idealnaj schiemie, jak heta robicca ŭ krainach, dzie vietraenierhietyka daŭno i efiektyŭna raźvivajecca». 

Akramia taho, prajekt utrymlivaje kampanient, skiravany na «pavyšeńnie ŭpeŭnienaści ŭ rentabielnaści prajektaŭ u śfiery vietraenierhietyki». Dla hetaha prapanujecca raspracavać prahramy infarmavańnia dla maksimalnaj kolkaści metavych hrup — «ad asob, jakija prymajuć rašeńni, da šyrokaj hramadskaści», uvieści ŭ VNU vučebnyja prahramy pa ŭznaŭlalnaj enierhietycy, pavysić patencyjał miascovych śpiecyjalizavanych inžynierna-techničnych kampanij, kab inviestaram było bolš vyhadna ź imi pracavać. 

Ale asnoŭnym kampanientam prajekta, pavodle słoŭ Biełavus, stanie niepasredna raspracoŭka dakumientaŭ na budaŭnictva vietraparkaŭ sumarnaj mahutnaściu nie mienš jak 25 MVt. «Tut kryjecca ŭvieś cykł rabot — vybar placovak dla patencyjalnych vietraparkaŭ, uzhadnieńnie ich z adpaviednymi orhanami, praviadzieńnie dainviestycyjnych stadyj rabot i niepasredna prajektavańnie», — zaznačyła kiraŭnik prajekta, dadaŭšy, što važnuju rolu ŭ hetym budzie mieć stvarany fond pryvatnaha finansavańnia vietraenierhietyki. 

Raspracavanyja dainviestycyjnyja dakumienty na budaŭnictva vietraparkaŭ płanujecca pradavać na aŭkcyjonie patencyjalnym inviestaram. 

Prajekt raźličany da 2019 hoda. Jaho biudžet składaje 3 młn 345 tys. dalaraŭ: 3 młn 45 tys. dalaraŭ vydaje Hłabalny ekałahičny fond, jašče 300 tys. — Prahrama raźvićcia AAN. Bienieficyjaram i arhanizacyjaj-vykanaŭcaj vystupaje Minpryrody.

• 0
• 0
• 0
• 0
• 0
• 0
• 0
• 0