Siomy epizod kultavych «Zornych vojnaŭ» narešcie vyjšaŭ u šyroki suśvietny prakat i adrazu ž ustalavaŭ rekord — za try dni boks-ofis karciny skłaŭ $238 młn. Tym nie mienš my nie stali doŭha čakać i ŭžo sabrali ŭsie najaŭnyja na hety momant fakty i čutki ab vośmym epizodzie fantastyčnaj sahi.
— Scenar da vośmaha epizodu ŭžo napisany. Režysior pieršaj častcy treciaj tryłohii Džej Džej Abrams raspavioŭ pra heta časopisu Wired jašče ŭ listapadzie. Adnak Abrams adznačyŭ, što «jon jašče budzie šmat razoŭ pierapisany, jak heta zaŭsiody i adbyvajecca».
— Scenarystam vośmaj častki «Zornych vojnaŭ» i režysioram staŭ Rajan Džonsan, jaki bolš za ŭsio viadomy pa pracy nad filmam «Piatla» i tryma epizodami sieryjała «Va ŭsie ciažkija». Džonsan i pradziusar epizodu Rem Bierhman, pa słovach Abramsa, hladzieli štodzionnyja spravazdačy sa zdymak «Abudžeńnia siły», kab u scenary ažyćciavić nieprykmietny pierachod da druhoj častki novaj tryłohii.
— Maštabnyja zdymki pačnucca ŭ Łondanie na praciahu niekalkich bližejšych tydniaŭ. Pra heta raspavioŭ na sustrečy z prychilnikami Džon Bajeha, jaki syhraŭ u siomym epizodzie Fina.
Adnak u vieraśni 2015 ŭžo prachodzili nievialikija zdymki na vostravie Skielinh-Majkł ŭ Irłandyi, jaki ŭžo byŭ zadziejničany na zdymkach «Abudžeńnia siły». Viadoma, što zdymačnaja hrupa achviaravała 10 tysiač jeŭra paromnaj słužbie, jakaja pierapraŭlała ich z vyspy i na vyspu.
— U kaście ŭžo aficyjna zajaŭleny viadomy akcior Bienisia del Tora, choć pakul nie abvieščana, jakuju rolu jon budzie hrać. Ale vydańnie The Wrap, spasyłajučysia na niekalki svaich krynic, napisała jašče ŭ lipieni, što Tora stanie hałoŭnym złydniem u vośmym epizodzie.
- Akramia Bienisia del Tora padziei vośmaha epizodu buduć raźvivacca vakoł hałoŭnych hierojaŭ «Abudžeńnia siły» — Fina (Džon Bajeha), Po (Oskar Ajziek) i Rej (u vykanańni Dejzi Rydli).
— Staršynia kampanii Disney Bob Ajhier jašče ŭ sakaviku 2015 abviaściŭ datu vychadu «epizoda VIII». Vyjdzie jon u šyroki prakat 26 maja 2017 hoda — praz 40 hadoŭ i adzin dzień paśla premjery čaćviortaha epizodu «Novaja nadzieja».
— Miž siomym i vośmym epizodam u śniežni 2016 hoda ŭ prakat vyjdzie pieršy śpin-of sahi pad nazvaj «Izhoj» (Rogue One). Viadoma, što režysioram filma pryznačyli Hareta Edvardsa, viadomaha pa karcinach «Hadziła» i «Monstry», a hałoŭnuju rolu vykanaje brytanskaja aktorka Fielisici Džons. Vytvorčaść śpin-ofu pačałasia ŭ žniŭni 2015 hoda.
Padziei «Izhoja» buduć adbyvacca pamiž trecim i čaćviortym epizodami «Zornych vojnaŭ». Film raskaža pra kiraŭnika atrada paŭstancaŭ, jakaja vykradzie čarciažy pieršaj Zorki śmierci, z dapamohaj jakoj u kancy čaćviortaha epizodu sahi Luk Skajuokier z paŭstancami źniščać kaśmičnuju stancyju Hałaktyčnaj impieryi.
Kamientary