Hruzavy samalot biełaruskaj kampanii «Transavijaekspart», jaki pieravoziŭ bomby, paškodziŭ adzin z ruchavikoŭ pry pasadcy na vajskovaj bazie imia karala Chalida ŭ Saudaŭskaj Aravii, paviedamiŭ The Aviation Herald.
Internet-resurs, jaki śpiecyjalizujecca na navinach i incydentach u avijacyi, piša, što avaryja zdaryłasia 26 śniežnia 2015 hoda. Samalot Boeing 747-200 z rehistracyjnym numaram EW-460TQ, jaki nakiroŭvaŭsia ź Minska rejsam AL-9703, pry pasadcy na vajskovaj bazie ŭ Saudaŭskaj Aravii paškodziŭ adzin z ruchavikoŭ. Na sajcie apublikavanyja dva fotazdymki paškodžanaha ruchavika, adnak pa ich niemahčyma identyfikavać samalot i jaho prynaležnaść niejkaj avijakampanii.
Sa spasyłkaj na svaje krynicy The Aviation Herald śćviardžaje, što samalot pieravoziŭ «100 ton bombaŭ, pryznačanych dla vykarystańnia va ŭzbrojenym kanflikcie ŭ Jemienie». Paviedamlajecca taksama, što samalotam kiravaŭ piłot, jaki «nie lataŭ apošnija siem miesiacaŭ».
Pavodle źviestak resursu, niahledziačy na toje, što paškodžany ruchavik nie padlahaŭ adnaŭleńniu, samalot na nastupny dzień vylecieŭ u Minsk na troch ruchavikach.
U «Transavijaeksparcie» «źbiantežanyja hetym artykułam, bo jon nie adpaviadaje rečaisnaści», zajaviŭ u kamientaryi BiełaPAN namieśnik dyrektara kampanii pa kamiercyjnaj pracy Arciom Sikorski.
«Sprava ŭ tym, što samalot, ukazany ŭ artykule, na momant hetaha incydentu znachodziŭsia naohuł u ZŠA, — skazaŭ jon. — My nie možam zrazumieć, čym kiravaŭsia aŭtar hetaha artykuła, jakimi źviestkami i hetak dalej. Prosta heta ŭsio padobna na niejki niadobrasumlenny krok (kankurentaŭ). U nas z 26 listapada novaje kiraŭnictva kampanii. I niejkija dziejańni roznych bakoŭ ciapier robiacca pry sprobie ŭpłyvu i vyciskańnia kampanii z rynku. Nie ŭsim padabajecca, što kampanija pačała hałavu padymać».
Na pytańnie BiełaPAN, ci znachodzilisia 26 śniežnia 2015 hoda ŭ Saudaŭskaj Aravii inšyja samaloty kampanii i ci byli ź imi incydenty, Sikorski skazaŭ: «Inšy samalot znachodziŭsia. Incydent zdaryŭsia, jon ciapier znachodzicca ŭ stadyi rasśledavańnia. Jaho rasśleduje inśpiekcyja pa biaśpiecy palotaŭ. Sutnaść incydentu zaklučałasia ŭ tym, što samalot paškodziŭ ruchavik na pasadcy».
Pavodle słoŭ Sikorskaha, jon nie moža nazvać rehistracyjny numar paciarpiełaha samalota, pakul viadziecca rasśledavańnie. Namieśnik dyrektara tolki paćvierdziŭ, što heta taksama «Boinh». «Jany (u artykule) spasyłajucca na samalot EW-460, jaki tam nie znachodziŭsia. I tam jość fotazdymki ruchavika, ale niezrazumieła, da jakoha samalota hety ruchavik adnosicca», — dadaŭ Sikorski.
Na pytańnie, ci adpaviadaje rečaisnaści infarmacyja ab tym, što paciarpieły pry pasadcy ŭ Saudaŭskaj Aravii samalot pieravoziŭ bomby, Sikorski adkazaŭ: infarmacyja pra hruz źjaŭlajecca kamiercyjnaj tajnaj.
Jon taksama śćviardžaje, što paciarpieły samalot u Minsk nie viartaŭsia. «Pavietranaje sudna znachodzicca ŭ lizinhu, pavodle ŭmoŭ jakoha samaloty ekspłuatujucca zamiežnym lotnym składam, — skazaŭ Sikorski. — Adkaznaść za padrychtoŭku lotnaha składu ŭ adpaviednaści z dahavoram niasie lizinhadaŭca hetaha samalota, i za technična spraŭny stan taksama. My jaho tolki kantralujem, kab jon byŭ technična spraŭnym. Ciapier u nas užo padrychtavanyja svaje ekipažy dla hetych samalotaŭ. My ich budziem najbližejšym časam vyvodzić».
AAT «Avijakampanija «Transavijaekspart» pracuje na rynku avijacyjnych pieravozak hruzaŭ z 1992 hoda i źjaŭlajecca adnym z najbujniejšych ekspłuatantaŭ rampavych samalotaŭ Ił-76, paviedamlaje sajt kampanii.
Ciapier čytajuć
Raźviedka ZŠA: Biełaruś stała pieradavym vajskovym płacdarmam Rasii33
Kamientary