Padarožža ź Minska ŭ Mažajsk i nazad: alimpijka, darožnaja palicyja, Rośsija dla russkich
Piša Valer Bułhakaŭ.
Źjeździŭ z Alesiem Paškievičam na minułym tydni ŭ Mažajsk (rajcentr za 80 km ad Maskvy), dzie ŭ tamtejšaj drukarni zabirali novuju knihu.
U knihi byŭ navaročany makiet (niekalki sotniaŭ zdymkaŭ, u tym liku za 60 štuk kalarovych), + chacieli vydać jakasna ŭ ćviordaj vokładcy ź dźviuma zakładkami-lase, tamu vybar paŭ na Mažajski palihrafkambinat.
Chaču padzialicca ŭražańniami.
1. Tak zvanaja alimpijka ŭ Dubrovienskim rajonie ŭjaŭlaje ź siabie žaluhodnaje vidovišča, jama na jaminie. Nie viercie ŭ mif pra jaje cudoŭny stan.
Naahuł, stan darohi ŭ Viciebskaj vobłaści nadzvyčaj kiepski. I heta płatnaja daroha!
2. Stan rasiejskaha ŭčastka ad miažy ź Biełaruśsiu i da Smalenska lepšy, čym viciebski adcinak, ale dalej taksama pačynajucca jamy i vyboiny.
3. Na darozie šmat milicyi (pad Viaźmaj nas spyniła HIBDD), ale pašpartnaha kantrolu na miažy niama (letaś byŭ).
4. Rasiejskaja darožnaja palicyja paluje na biełaruskija mašyny, jakija mohuć ciahnuć tavar, tamu pry sabie treba mieć usie spraŭnyja dakumienty. U mianie praviarali navat miedyčnuju daviedku — heta pry tym, što za sotni padarožžaŭ u Litvie i Polščy mianie naahuł tolki raz spyniła darožnaja palicyja.
5. Na zvarotnym šlachu zrazumieŭ, čamu mnie reža voka rasiejski krajavid paabapał darohi. Na ŭsim kavałku ad Mažajska i da samaj miažy Biełarusi niama NIVODNAHA zasiejanaha ci choć jak uroblenaha pola. Uściaž bałotnaha vidu biarozki, inšaja čezłaja raślinnaść, jakaja voka nie ciešyć.
6. Jak zajazdžaješ u Rasieju, pieršyja vioski, jakija lažać pry darozie, nazyvajucca «Ptuški» i «Ziuźki». Biełaruskija nazvy traplajucca prynamsi da Darahabuža.
7. Mažajsk — horad depresiŭny. Što ŭraziła: mašyny spres jeździać pa tratuarach, lubiać parkavacca kala samoha hanku-ŭvachodu ŭ kramy.
8. Sami kramy častkova zachavalisia ŭ niaźmiennym vyhladzie z savieckich časoŭ — tolki «obvietšali».
9. Zajšoŭ u aŭtakramu kupić amyvajku, u joj śmiardzieła, na padłozie lažaŭ brud, plunuŭ i vyjšaŭ.
10. Viartajučysia, nastroiŭsia na FM-stancyju radyjo «Viciebsk». Paśla vypusku navin, pračytanaha a 21.00, pastavili ADNU KAMPAZICYJU ź niejkaha navamodnaha stylu, jakaja hučała roŭna da 22.00.
11. Upieršyniu prajechaŭ 45 km pa novaj akružnoj Minska. Za ŭvieś čas sustreŭ na joj 4 (čatyry) mašyny.
12. Jak zajazdžaješ u Maskoŭskuju vobłaść, ciabie sustrakaje vializny biłbord «Podmoskov́je za ŁDPR». Pierad apošnimi parłamienckimi vybarami ŭ Rasiei bačyŭ u Rudni (rajcentr u Smalenskaj vobłaści, na miažy ź Loźnienskim rajonam Biełarusi) rekłamu na rejsavym aŭtobusie: Rośsija dla russkich (V.V.Žirinovskij).
13. Nasupierak stereatypam, kiroŭcy ŭ Mažajsku vietłyja i prapuskajuć na pierachodzie piešachodaŭ.
Kamientary