Kiraŭnik ŭkrainskich hreka-katalikoŭ: Mnohija adčuvajuć siabie zdradžanymi Vatykanam, rasčaravanymi pałavinčataściu praŭdy
Va Ukrainskaj hreka-katalickaj carkvie skieptyčna aceńvajuć sustreču Papy rymskaha Francyska z Patryjarcham Ruskaj pravasłaŭnaj carkvy Kiryłam.
Pra heta pradstajaciel UHKC Śviatasłaŭ (Šaŭčuk) skazaŭ u intervju pres-słužbie UHKC.
«Biezumoŭna, hety tekst vyklikaŭ hłybokaje rasčaravańnie siarod mnohich viernikaŭ našaj carkvy i prosta nieabyjakavych hramadzian Ukrainy», — kamientuje Šaŭčuk zajavu, padpisanuju na sustrečy ŭ Havanie.
«Siońnia bahata chto źviartaŭsia da mianie z hetaj nahody i kazali, što adčuvajuć siabie zdradžanymi Vatykanam, rasčaravanymi pałavinčataściu praŭdy ŭ hetym dakumiencie i navat ŭskosnaj padtrymkaj z boku apostalskaj stalicy ahresii Rasii suprać Ukrainy. Ja, viadoma, razumieju hetyja pačućci», — praciahnuŭ Šaŭčuk.
Status UHKC, jakaja padparadkoŭvajecca Vatykanu, ale prytrymlivajecca pieravažna ŭschodniaha abradu, zastajecca vostraj temaj u adnosinach Rymska-katalickaj carkvy i Maskoŭskaha patryjarchatu.
U sumiesnaj dekłaracyi carkoŭnyja lidary vykazali nadzieju, što ich sustreča zrobić uniosak u prymireńnie ŭ tych śfierach, dzie isnujuć supiarečnaści pamiž hreka-katolikami i pravasłaŭnymi. Na dumku Papy i Patryjarcha, minułyja mietady «ŭnijatyzmu» nie jość šlacham adnaŭleńnia adzinstva, adnak carkoŭnyja hramady, jakija źjavilisia ŭ vyniku histaryčnych abstavinaŭ, majuć prava isnavać.
«Z našaha šmathadovaha dośviedu možna skazać: kali Vatykan i Maskva arhanizujuć sustrečy abo padpisvajuć niejkija ahulnyja teksty, to nam nie varta čakać ad hetaha ničoha dobraha», — dadaŭ Šaŭčuk.
Pavodle jaho, punkty ŭ sumiesnaj zajavie dvuch carkoŭnych lidaraŭ, pryśviečanyja Ukrainie, vyklikajuć u jaho bolš pytańniaŭ, čym adkazaŭ: u pryvatnaści, 26-y punkt, dzie Patryjarch i Papa zaklikajuć ŭsie baki kanfliktu da razvažlivaści, hramadskaj salidarnaści i aktyŭnaj miratvornaści.
«Stvarajecca takoje ŭražańnie, što Maskoŭskaja patryjarchija abo ŭparta nie pryznajecca, što źjaŭlajecca bokam kanfliktu, heta značyć adkryta padtrymlivaje ahresiju Rasii suprać Ukrainy […] abo źviartajecca pierš za ŭsio da svajho sumleńnia, zaklikaje samu siabie da razvažlivaści, hramadskaj salidarnaści i da dziejnaha budaŭnictva śvietu», — skazaŭ kiraŭnik ŭkrainskich hreka-katalikoŭ.
Ciapier čytajuć
«Patrabavali, kab ja z kalehami pry dzieciach pa-biełarusku nie razmaŭlała». Ci sutykajucca biełaruskamoŭnyja z bulinham u krainie21
Kamientary